ທະນາຄານແຫ່ງ ສປປ ລາວ ອອກຫນັງສືແຈ້ງການເຕືອນພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານລັດຖະກອນ, ທະຫານ, ຕໍາຫຼວດ, ຕະຫຼອດຮອດຜູ້ທີ່ຢູ່ ອາໄສຢູ່ ສປປ ລາວ ໃນຂອບເຂດທົ່ວປະເທດ ໃຫ້ມີສະຕິລະວັງຕົວ ຕໍ່ການເຄື່ອນໄຫວຂອງມິດສາຊີບທີ່ແອບອ້າງເອົາຊື່ທະນາຄານທຸລະກິດມາສ້າງ ເພຈປອມ ແລ້ວເຄື່ອນໄຫວໂຄສະນາຊວນເຊື່ອວ່າມີການປ່ອຍເງິນກູ້ໃນຮູບແບບອອນລາຍ.
ຫ້ອງການ ທະນາຄານແຫ່ງ ສປປ ລາວ (ທຫລ) ຂໍແຈ້ງມາຍັງທ່ານຊາບວ່າ: ໃນປັດຈຸບັນໄດ້ມີມິດສາຊີບ ຈໍານວນຫນຶ່ງເຄື່ອນໄຫວແອບອ້າງເອົາຊື່ທະນາຄານທຸລະກິດ ຊຶ່ງປະກອບມີ ທະນາຄານພັດທະນາລາວ ແລະ ທະນາຄານ ຮ່ວມພັດທະນາ ມາສ້າງເພຈປອມຢູ່ Facebook ແລ້ວເຄື່ອນໄຫວໂຄສະນາວ່າສາມາດປ່ອຍເງິນກູ້ໃນຮູບແບບອອນ ລາຍ ໂດຍມີຂັ້ນຕອນອະນຸມັດທີ່ວ່ອງໄວ, ການກູ້ຢືມແມ່ນງ່າຍດາຍ ພຽງແຕ່ຕ້ອງການບັດປະຈໍາຕົວ ເເລະ ປື້ມສໍາ ມະໂນຄົວ ກໍ່ໄດ້ຮັບເງິນກູ້ທັນທີພາຍໃນເວລາ 30 ນາທີ. ເພຈດັ່ງກ່າວໄດ້ນໍາໃຊ້ໂລໂກ້ທະນາຄານ, ຮູບພາບອົງກອນ, ວີດີໂອ ແລະ ພະນັກງານຂອງທະນາຄານ ໃນການໂຄສະນາດັ່ງກ່າວ, ຜູ້ທີ່ສົນໃຈກູ້ເງິນແມ່ນຕ້ອງໄດ້ໂອນເງິນຊໍາລະຄ່າ ທໍານຽມກ່ອນ ໂດຍອ້າງວ່າຈະໄດ້ຮັບຄ່າທໍານຽມດັ່ງກ່າວຄືນພ້ອມກັບເງິນກູ້, ຜູ້ທີ່ຫຼົງເຊື່ອໂຄສະນາດັ່ງກ່າວ ເມື່ອໂອນ ເງິນຄ່າທໍານຽມແລ້ວ ຈະຖືກບຼອກເບີທັນທີ.
ສະນັ້ນ, ຫ້ອງການ ທຫລ ຂໍຖືເປັນກຽດແຈ້ງມາຍັງ ພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານລັດຖະກອນ, ທະຫານ, ຕໍາຫຼວດ, ຕະຫຼອດຮອດຜູ້ທີ່ຢູ່ອາໄສຢູ່ ສປປ ລາວ ໃນຂອບເຂດທົ່ວປະເທດ ຈົ່ງມີສະຕິລະວັງຕົວ ແລະ ບໍ່ໃຫ້ ຫຼົງເຊື່ອຕໍ່ການໂຄສະນາລັກສະນະດັ່ງກ່າວ. ທະນາຄານແຫ່ງ ສປປ ລາວ ຍັງບໍ່ໄດ້ອະນຸຍາດໃຫ້ທະນາຄານທຸລະກິດໃດ ໃນ ສປປ ລາວ ປ່ອຍກູ້ຜ່ານລະບົບອອນລາຍ.