ພັທ ພອນໄຊ ກຸນນຸວົງ ຮອງພະແນກຕຳຫລວດ ຜູ້ຊີ້ນຳວຽກງານສຶບສວນ-ສອບສວນ ໃຫ້ຮູ້ວ່າ: ທາງເຈົ້າໜ້າທີ່ໜ່ວຍງານສືບສວນ-ສອບສວນຄະດີອາຍາ ປກສ ນະຄອນໄກສອນພົມວິຫານ ໄດ້ຮັບແຈ້ງຄວາມຈາກ ຜູ້ເສຍຫາຍ ວ່າ: ໄດ້ມີຄົນຮ້າຍລັກລົດຈັກ, ຈາກນັ້ນທາງເຈົ້າໜ້າທີ່ວິຊາສະເພາະຈຶ່ງລົງເກັບກຳຂໍ້ມູນຫຼັກຖານຕ່າງໆ ຢູ່ໃນສະຖານທີ່ເກີດເຫດ, ຈົນຮອດວັນທີ 25 ກໍລະກົດ 2023 ຈຶ່ງສາມາດກັກຕົວ ທ້າວ ຂັນທະຈັກ ຫຼື ເປເລ້ ອາຍຸ 40 ປີ ບ້ານ ຈອມແກ້ວ ນະຄອນ ໄກສອນ ພົມວິຫານ ແຂວງ ສະຫວັນນະເຂດ.
ຜ່ານການສອບສວນ ຜູ່ກ່ຽວໃຫ້ການສາລະພາບວ່າ: ໃນໄລຍະເດືອນ 05 ປີ 2023 ແມ່ນໄດ້ພົ້ນໂທດອອກມາຈາກຄ້າຍຄຸມຂັງແກ້ງຄັນ ຈາກນັ້ນກໍ່ໄດ້ເລີ່ມເຄື່ອນໄຫວເລາະຫາລັກຊັບ ຜູ້ກ່ຽວແມ່ນໄດ້ຍ່າງເລາະຕາມເຮືອນປະຊາຊົນຖ້າພົບເຫັນລົດຈັກທີ່ມີກຸນແຈສຽບໄວ້ ກໍ່ຈະລົງມືລັກ ຜູ້ກ່ຽວໄດ້ລັກລົດຈັກຢູ່ພາຍໃນເທດສະບານ ນະຄອນ ໄກສອນ ພົມວິຫານ ລວມ 03ຄັ້ງ, ໄດ້ລົດຈັກ 03ຄັນ, ເຊີ່ງແມ່ນໄດ້ນຳໄປຂາຍຢູ່ຕ່າງເມືອງ ແລະ ຫລັງຈາກໄປຂາຍໄດ້ເງິນມາກໍ່ໄດ້ໄປຊື້ຢາບ້າເສບ,ສ່ວນຄະດີດັ່ງກ່າວທາງເຈົ້າໜ້າທີ່ວິຊາສະເພາະ ປກສ ນະຄອນໄກສອນພົມວິຫານ ໄດ້ສະຫຼຸບສົ່ງໃຫ້ອົງການໄອຍະການສືບຕໍ່ດຳເນີນຄະດີໄປຕາມຂັ້ນຕອນຂອງກົດໝາຍ.
ປະຈຸບັນທາງເຈົ້າໜ້າທີ່ ກອງບັນຊາການ ປກສ ນະຄອນໄກສອນພົມວິຫານ ສາມາດເກັບກູ້ລົດໄດ້ ຈຳນວນ 03 ຄັນ ແລະ ໄດ້ມອບຄືນໃຫ້ເຈົ້າຂອງລົດແລ້ວ.
ຕໍ່ມາໃນວັນທີ 21ມີນາ 2022 ເຈົ້າໜ້າທີ່ກອງບັນຊາການ ປກສ ນະຄອນໄກສອນພົມວິຫານ ໄດ້ຮັບການລາຍງານຈາກພົນລະເມືອງດີວ່າ: ມີຄົນຮ້າຍບໍ່ຮູ້ຈຳນວນມາລັກເຫຼັກຕະແກ໋ງປິດທໍ່ລະບາຍນ້ຳ ຢູ່ຂອບເຂດເທດສະບານນະຄອນ ໄກສອນ ພົມວິຫານ ຈຳນວນຫຼາຍຈຸດ,ທາງຄະນະພັກ-ຄະນະກອງບັນຊາການ ປກສ ນະຄອນ ຈິ່ງໄດ້ແຕ່ງຕັ້ງພະນັກງານວິຊາສະເພາະລົງເກັບກຳຂໍ້ມູນຫຼັກຖານ ຕົກມາຮອດວັນທີ 10 ກໍລະກົດ 2023 ເຈົ້າໜ້າທີ່ວິຊາສະເພາະ ຈິ່ງໄດ້ພົບເຫັນເຫຼັກຕະແກ໋ງປິດທໍ່ລະບາຍນ້ຳ ຈຳນວນ 15 ອັນ ຢູ່ຮ້ານຮັບຊື້ເຫຼັກເສດເຂດບ້ານອຸດົມວິໄລ ນະຄອນ ໄກສອນ ພົມວິຫານ.ຜ່ານການສອບຖາມເຈົ້າຂອງຮ້ານໄດ້ໃຫ້ການວ່າ:ເຫຼັກຕະແກ໋ງ ດັ່ງກ່າວແມ່ນຮັບຊື້ນຳປະຊາຊົນຄົນບ້ານ ໜອງຜື ນະຄອນ ໄກສອນ ພົມວິຫານ,ທາງເຈົ້າໜ້າທີ່ ໄດ້ກັກຕົວເຈົ້າຂອງຮ້ານ ຂື້ນມາຫ້ອງການກອງບັນຊາການ ປກສ ນະຄອນ ເພື່ອທຳການສືບສວນ-ສອບສວນ ເຈົ້າຂອງຮ້ານ ໄດ້ຮັບສາລະພາບວ່າ: ເຫຼັກຕະແກ໋ງປິດທໍ່ລະບາຍນ້ຳ ຈຳນວນ 15 ອັນ ແມ່ນຮັບຊື້ນຳທ້າວ ລຳພັນ ຄົນບ້ານໜອງຜື ນະຄອນ ໄກສອນ ພົມວິຫານ ຊື້ອັນ 01 ລາຄາ 40.000 ກີບ,ມີຈຳນວນ 15 ອັນ.
ຕົກມາຮອດວັນທີ 31 ກໍລະກົດ 2023 ຈຶ່ງໄດ້ກັກຕົວຜູ້ກໍ່ເຫດຊື່: ທ້າວ ລຳພັນ ອາຍຸ 25 ປີ ບ້ານ ໜອງຜື ຢູ່ນະຄອນໄກສອນພົມວິຫານ ແຂວງສະຫວັນນະເຂດ ຜ່ານການສອບສວນ ເບື້ອງຕົ້ນຜູ່ກ່ຽວໄດ້ຮັບສາລະພາບວ່າ: ໄດ້ພາກັນ ເຄື່ອນໄຫວລັກຊັບ ແຕ່ ຕົ້ນປີ 2022 ເປັນຕົ້ນມາ ຕໍ່ກັບການກະທໍາ ຫຼື ການເຄື່ອນໄຫວຂອງພວກກ່ຽວແມ່ນໄດ້ສ້າງຜົນເສຍຫາຍຕໍ່ຊັບສິນຂອງລັດ ແລະ ຂອງປະຊາຊົນ ສ້າງຄວາມບໍ່ສະຫງົບ ,ຄວາມບໍ່ເປັນລະບຽບຮຽບຮ້ອຍພາຍໃນສັງຄົມ ເຊິ່ງຜິດຕໍ່ລະບຽບກົດໝາຍ ເຊິ່ງທາງເຈົ້າໜ້າທີ່ຈະໄດ້ສືບຕໍ່ຂະຫຍາຍຜົນ ນໍາຈັບບັນດາຜູ້ທີ່ຮ່ວມຂະບວນການທີ່ຍັງຈັບບໍ່ທັນໄດ້ ເພື່ອນໍາຕົວພວກກ່ຽວມາດໍາເນີນຄະດີຕາມຂັ້ນຕອນຂອງກົດຫມາຍຕໍ່ໄປ.