ກອງປະຊຸມຊີ້ແຈງຕໍ່ສື່ມວນຊົນກ່ຽວກັບຂະບວນການໃຫ້ວັກຊິນປ້ອງກັນມະເຮັງປາກມົດລູກ ແລະ ໂຄວິດ-19 ໃນໂຮງຮຽນທົ່ວປະເທດ

0
584

ກອງປະຊຸມຊີ້ແຈງໃຫ້ຄວາມກະຈ່າງແຈ້ງຕໍ່ສື່ມວນຊົນກ່ຽວກັບຂະບວນການໃຫ້ວັກຊິນປ້ອງກັນມະເຮັງປາກມົດ ລູກ ແລະ ໂຄວິດ-19 ໃນໂຮງຮຽນທົ່ວປະເທດໄດ້ຈັດຂຶ້ນໃນວັນທີ 8 ສິງຫາ ນີ້ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍມີ ທ່ານນາງ ດາວດວງຈັນ ບູລົມມະວົງ ຮອງຫົວໜ້າຫ້ອງການກະຊວງສາທາລະນະສຸກ, ມີທ່ານ ບັນດິດ ຊຸມພົນພັກດີ ຫົວໜ້າສູນສຸຂະພາບແມ່ ແລະ ເດັກ ກະຊວງສາທາລະນະສຸກ, ທ່ານ ຢູນັດ ຫົວໜ້າພະແນກສາທາລະນະສຸກປະຈຳອົງການອຸຍນີເຊັບ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ເດັກຍິງ ແລະ ໄວໜຸ່ມທຸກຄົນ ອາຍຸລະຫວ່າງ 10 ຫາລຸ່ມ 17 ປີ ຈະໄດ້ຮັບການປ້ອງກັນຈາກໄວຣັດສ໌ HPV -ຊຶ່ງເປັນສາເຫດຫຼັກທີ່ພາໃຫ້ເກີດ ມະເຮັງປາກມົດລູກ ໃນຂະບວນການສັກວັກຊີນກັນ ມະເຮັງປາກມົດລູກ ຢູ່ໃນໂຮງຮຽນຂອງທຸກແຫ່ງໃນ ສປປ ລາວ ຊ່ວງເດືອນ ກັນຍາປີ 2023.

ມະເຮັງປາກມົດລູກເປັນ ມະເຮັງທີ່ພົບເຫັນຫຼາຍທີ່ສຸດເປັນອັນດັບສອງ ສໍາລັບມະເຮັງທີ່ເກີດໃນແມ່ຍິງ ໃນ ສປປ ລາວ ແລະ ມະເຮັງປາກມົດລູກ 99.7% ແມ່ນເກີດຈາກເຊື້ອໄວຣັດສ໌ HPV. ເພື່ອແກ້ໄຂບັນຫາດັ່ງກ່າວ, ລັດຖະບານແຫ່ງ ສປປ ລາວ ໄດ້ຮັບການສະໜັບສະໜູນຈາກກອງທຶນກາວີ ໂດຍຜ່ານອົງການອະນາໄມໂລກ ແລະ ອົງການ ຢູນິເຊັບ ໄດ້ນຳເຂົ້າວັກຊີນກັນມະເຮັງປາກມົດລູກ ແລະ ໃຫ້ບໍລິການທົ່ວປະເທດເລິ່ມແຕ່ປີ 2020 ຊຶ່ງຄວາມຄືບໜ້າຂອງຂະບວນການດັ່ງກ່າວຄືເດັກຍິງ ອາຍຸ 12-16 ປີ ຫຼາຍກວ່າ 90% ໃນ ສປປ ລາວ ໄດ້ຮັບວັກຊີນກັນມະເຮັງປາກມົດລູກແລ້ວຢ່າງໜ້ອຍໜຶ່ງຄັ້ງ.

ທ່ານ ດຣ ພອນປະເສີດ ອຸນາພົມ, ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກໄດ້ ກ່າວວ່າ: “ ຂະບວນການໃຫ້ວັກຊີນຄັ້ງນີ້ ເປັນຂີດໝາຍອັນໜຶ່ງ ໃນການສົ່ງເສີມສຸຂະພາບຂອງເດັກຍິງ ແລະ ໄວໜຸ່ມ ໃນ ສປປ ລາວ. ວັກຊີນ ຊະນິດນີ້ ສາມາດປ້ອງກັນເດັກຍິງຈາກ ມະເຮັງປາກມົດລູກ ແລະ ຂ້ອຍຮູ້ສຶກພູມໃຈ ທີ່ໄດ້ເຫັນເດັກຍິງ ແລະ ໄວໜຸ່ມລາວ ໄດ້ຮັບວັກຊີນກັນມະເຮັງປາກມົດລູກ ໃນສາມປີຜ່ານມາ.”

“ວັກຊີນກັນມະເຮັງປາກມົດລູກສາມາດປ້ອງກັນເດັກຍິງຈາກພະຍາດຮ້າຍໄດ້. ວັກຊີນກັນມະເຮັງປາກມົດລູກແມ່ນໃຫ້ບໍລິການໂດຍບໍ່ເສຍຄ່າ ສໍາລັບເດັກຍິງທຸກຄົນທີ່ມີິອາຍຸລະຫວ່າງ 10 ຫາລຸ່ມ 17 ປີ. ວັກຊີນຊະນິດນີ້ປອດໄພ, ມີປະສິດທິພາບສູງ, ສາມາດປົກປ້ອງເດັກຍິງຈາກມະເຮັງປາກມົດລູກຊຶ່ງເປັນພະຍາດທີ່ເປັນອັນຕະລາຍແກ່ຊີວິດໄດ້” – ທ່ານ ດຣ ສຸລິຍາ ຈັນນາວົງ, ຮັກສາການຫົວໜ້າທີມວັກຊີນ, ອົງການອະນາໄມໂລກ ປະຈຳ ສປປ ລາວ.

“ເດັກຍິງທຸກຄົນທີ່ມີອາຍຸລະຫວ່າງ 10 ຫາລຸ່ມ 17 ປີຕ້ອງໄດ້ຮັບວັກຊີນກັນມະເຮັງປາກມົດລູກສອງຄັ້ງສຳລັບໃນປີ 2023. ວັກຊີນເຫຼົ່ານີ້ປອດໄພ ແລະ ມີປະສິດທິພາບ ພ້ອມດຽວກັນນັ້ນວັກຊີນກັນມະເຮັງປາກມົດລູກ ຍັງສາມາດສັກພ້ອມກັບວັກຊີນໂຄວິດ-19 ໄດ້”- ທ່ານ ດຣ. Mohammed Yunus.

ເດັກຍິງອາຍຸ 10 ຫາລຸ່ມ 17 ປີ ທຸກຄົນສາມາດໄປຮັບ ວັກຊີນກັນມະເຮັງປາກມົດລູກໄດ້ ທີ່ ໂຮງຮຽນ ແລະ ໃນສະຖານທີ່ບໍລິການສາທາລະນະສຸກ ທີ່ໃກ້ບ້ານທ່ານ ວັກຊີນກັນ ມະເຮັງປາກມົດລູກ ມີໃຫ້ບໍລິການໃນຂອບເຂດທົ່ວປະເທດ.

ວັກຊີນດັ່ງກ່າວໄດ້ຮັບທຶນສະໜັບສະໜູນຈາກກອງທືນກາວີ, ອົງການອະນາໄມໂລກ, ອົງການຢູນິເຊັບ ໂດຍຮ່ວມກັບກະຊວງສາທາລະນະສຸກ ແລະ ກະຊວງສຶກສາທິການ ແລະ ກິລາໃນການໃຫ້ບໍລິການ ໂດຍເຊື່ອມສານກັບການສັກວັກຊີນໂຄວິດ-19.

ລັດຖະບານແຫ່ງ ສປປ ລາວ ຊ່ວຍປົກປ້ອງໄວໜຸ່ມ ແລະ ເດັກຍິງລຸ້ນຕໍ່ໄປຈາກການເປັນມະເຮັງປາກມົດລູກ ໂດຍ ການໃຫ້ບໍລິການວັກຊີນ.