ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ວັນທີ 3 ສິງຫາ 2023 ຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ບັນດາພະແນກການຂັ້ນແຂວງ ໂດຍຮ່ວມກັບອໍານາດການປົກຄອງ ເມືອງຫີນບູນ ໄດ້ເຄື່ອນໄຫວຕິດຕາມສະພາບຜົນກະທົບ ຈາກໄພນໍ້າຖ້ວມ ຢູ່ເຂດບໍ່ໂພນຕິ້ວ ເຊິ່ງເປັນເຂດທໍາອິດຂອງເມືອງຫີນບູນ ທີ່ໄດ້ຮັບຜົນກະທົບຈາກນໍ້າຖ້ວມ.
ເນື່ອງຈາກຝົນຕົກຕໍ່ເນື່ອງເປັນເວລາຫລາຍວັນ ໄດ້ເຮັດໃຫ້ນໍ້າປ່າໄຫລລົງສູ່ຫ້ວຍນໍ້າປະແທນ ເພີ່ມປະລິມານຈໍານວນຫລາຍ ເຮັດໃຫ້ ລະດັບນໍ້າເພີ່ມຂຶ້ນຢ່າງໄວວາ ໄຫລຖ້ວມບ້ານເຮືອນປະຊາຊົນ ສ້າງຜົນເສຍຫາຍທາງດ້ານວັດຖຸ, ຊັບສິນ ໃຫ້ແກ່ຄອບຄົວຂອງພໍ່ແມ່ປະຊາຊົນ ເປັນຈໍານວນຫລາຍ ໂດຍສະເພາະ ບ້ານເຮືອນທີ່ຕັ້ງລຽບແຄມຫ້ວຍນໍ້າປະແທນ ຖືກນໍ້າເຊາະເຈື່ອນ, ນໍ້າຖ້ວມຂັງຈໍານວນຫລາຍຫລັງ, ເສັ້ນທາງຄົມມະນາຄົມໄປມາຫາສູ່ ລະຫວ່າງບ້ານ ຖືກຕັດຂາດບໍ່ສາມາດສັນຈອນໄດ້, ລວມເຖິງລະບົບໄຟຟ້າກໍຖືກປິດການບໍລິການ, ຕະຫລອດຮອດພື້ນທີ່ທໍາການຜະລິດຂອງປະຊາຊົນ ເຊິ່ງຈຸດທີ່ຖ້ວມຫລາຍກວ່າໝູ່ ປະກອບມີ: ບ້ານມ່ວງໄຂ່, ບ້ານ ນາຄໍາ ແລະ ບ້ານນ້ອຍ.
ຕໍ່ຜົນກະທົບດັ່ງກ່າວ, ທ່ານເຈົ້າແຂວງຄໍາມ່ວນ ກໍໄດ້ສະເໜີມາຍັງຄະນະການນໍາຂອງເມືອງຫີນບູນ ຈົ່ງໄດ້ເອົາໃຈໃສ່ປະສານສົມທົບກັບທຸກພາກສ່ວນ, ທຸກຂະແໜງການຂອງເມືອງ ແລະ ຄະນະການຈັດຕັ້ງບ້ານທີ່ໄດ້ຮັບຜົນກະທົບ ຈົ່ງໄດ້ຮ່ວມກັນເຝົ້າລະວັງຕິດຕາມຢ່າງໃກ້ຊິດ ແລະ ກະກຽມພາຫະນະ, ອຸປະກອນ ລວມທັງກໍາລັງຄົນ, ເພື່ອຊ່ວຍເຫລືອປະຊາຊົນ ໃຫ້ທ່ວງທັນ, ໃນໂອກາດຕິດຕາມສະພາບຜົນກະທົບນໍ້າຖ້ວມຄັ້ງນີ້ ທ່ານ ຍັງໄດ້ນໍາເອົາ ເຄື່ອງບໍລິໂພກ ທີ່ປະກອບມີ: ນໍ້າດື່ມ, ປ໋ອງປາ ແລະ ໝີ່ສໍາເລັດຮູບ ລວມມູນຄ່າທັງໝົດ 19 ລ້ານກວ່າກີບ ໄປມອບໃຫ້ການຈັດຕັ້ງບ້ານທີ່ໄດ້ຮັບຜົນກະທົບ ເພື່ອນໍາໄປແຈກຢາຍ ຊ່ວຍເຫລືອຄອບຄົວປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ ເພື່ອເປັນການແກ້ໄຂ ບັນເທົາທຸກ ໃນເບື້ອງຕົ້ນ.