ເນື່ອງຈາກຝົນຕົກຕິດຕໍ່ກັນ ຫຼາຍວັນ ແລະ ໜັກສົມຄວນເລີ່ມ ແຕ່ວັນທີ 31 ກໍລະກົດ ຫາວັນ ທີ 2 ສິງຫາ 2023 ເຮັດໃຫ້ນ້ຳ ຕາມສາຍເຊ, ຫ້ວຍຮ່ອງຄອງບຶງ ຕ່າງໆເພີ່ມລະດັບສູງຂຶ້ນຢ່າງ ໄວວາ ແລະ ໄຫຼເຂົ້າຖ້ວມບ້ານເຮືອນ ແລະ ພື້ນທີ່ການຜະລິດຂອງ ປະຊາຊົນໃນຫຼາຍເມືອງຂອງ ແຂວງສະຫວັນນະເຂດເປັນຕົ້ນ ແມ່ນເມືອງອາດສະພັງທອງ ກໍມີຫຼາຍບ້ານໄດ້ຮັບຜົນກະທົບ ຈາກນ້ຳຖ້ວມເຊັ່ນວ່າ: ບ້ານແຈ ລະມອງ, ບ້ານໂພນນົກຂຽນ, ບ້ານປົ່ງນາ, ບ້ານດົງເຫັນ, ບ້ານ ດົງກິໂລ, ບ້ານຫຼຽນໄຊ ແລະ ບັນດາບ້ານທີ່ຢູ່ລຽບຕາມແຄມສາຍ ນ້ຳເຊຈໍາພອນ ແມ່ນໄດ້ຮັບຜົນກະທົບເກືອບໝົດທຸກບ້ານ.
ນອກນີ້ ກໍຍັງມີເມືອງພະລານໄຊ, ເມືອງອາດສະພອນ, ເມືອງຈຳພອນ, ເມືອງຊົນນະບູລີ, ເມືອງສອງຄອນ ທີ່ໄດ້ຮັບຜົນກະທົບກະນ້ຳຖ້ວມໃນຄັ້ງນີ້, ສ່ວນຄວາມເສຍຫາຍ ເບື້ອງຕົ້ນແມ່ນຍັງບໍ່ສາມາດປະເມີນໄດ້.
ຕໍ່ສະພາບການດັ່ງກ່າວ, ຈຶ່ງໄດ້ຂໍຮຽກຮ້ອງມາຍັງພໍ່ແມ່ປະຊາຊົນທີ່ຕັ້ງບ້ານເຮືອນໃກ້ແຄມສາຍເຊຈໍາພອນ, ຊັງຊັງຊອຍ, ເຊບັ້ງຫຽງ ແລະ ສາຍຫ້ວຍຕ່າງໆຈົ່ງມີສະຕິລະວັງຕົວ ແລະໃຫ້ກະກຽມຄວາມພ້ອມຕະຫຼອດເວລາ ເພື່ອຮັບມືກັບໄພທໍາມະຊາດທີ່ຈະເກີດ ຂຶ້ນໄດ້ທຸກເວລາ.
ແຫຼ່ງຂ່າວ ສະຫວັນພັດທະນາຂ່າວ