ອີງຕາມການລາຍງານສຳນັກຂ່າວຕ່າງປະເທດ ໃນວັນທີ 20 ມິຖຸນາ 2023 ນີ້ວ່າ: ເກີດເຫດການສະເທືອນຂວັນຂຶ້ນໃນເມືອງໂມເຮນາ, ລັດມັດທະຍະປະເທດ, ປະເທດອິນເດຍ, ເມື່ອພໍ່ຄົນໜຶ່ງໄດ້ກໍ່ເຫດຄາຕະກໍາລູກສາວອາຍຸ 18 ປີ ແລະ ຄູ່ຮັກຂອງນາງອາຍຸ 21 ປີ ໂດຍການໃຊ້ຫີນມັດຖ່ວງສົບ ແລ້ວຖິ້ມລົງແມ່ນ້ຳທີ່ມີແຂ້.
ທາງຄອບຄົວຂອງຝ່າຍຍິງ (ຊີວານີ ໂທມາ) ບໍ່ຍອມຮັບຄວາມສຳພັນຂອງນາງກັບຝ່າຍຊາຍ (ຮາເດສະຍຳ ໂທມາ) ເຊິ່ງເປັນໜຸ່ມທີ່ອາໄສຢູ່ໝູ່ບ້ານໃກ້ຄຽງ, ໂດຍພໍ່ຂອງຝ່າຍຊາຍໄດ້ໄປແຈ້ງຄວາມກັບເຈົ້າໜ້າທີ່ຕຳຫຼວດວ່າ: ລູກຊາຍ ແລະ ແຟນຂອງລູກຊາຍໄດ້ຫາຍຕົວໄປຫຼາຍອາທິດແລ້ວ ແລະ ສົງໃສວ່າທັງຄູ່ຖືກຄາຕະກຳ ເບື້ອງຕົ້ນຕຳຫຼວດສົງໄສວ່າ: ທັງຄູ່ລົບໜີ ແຕ່ການສອສວນຄົນໃນໝູ່ບ້ານບໍ່ມີໃຜເຫັນທັງສອງຄົນອອກໄປນອກໝູ່ບ້ານ.
ເຈົ້າໜ້າທີ່ຈຶ່ງໄດ້ທຳການສືບສວນທັງສອງຄອບຄົບຢ່າງໜັກ ຈົນສຸດທ້າຍພໍ່ຂອງຝ່າຍຍິງຍອມຮັບສາລະພາບວ່າ: ຕົນໄດ້ສັງຫານທັງສອງຄົນດ້ວຍປືນ ແລະ ມັດຮ່າງໄວ້ກັບກ້ອນຫີນ ກ່ອນຈະໂຍນລົງແມ່ນ້ຳຊຳເບວ ເຊິ່ງມິແຂ້ອາໄສຢູ່ ປະມານ 2500 ໂຕ, ປັດຈຸບັນທາງເຈົ້າໜ້າທີ່ໄດ້ທຳການເລັ່ງຫາຮ່າງຂອງທັງສອງໃນແມ່ນ້ຳ.
ທັງນີ້, ການຄາຕະກຳດັ່ງກ່າວຄືການ ຂ້າເພື່ອຮັກສາກຽດສັກສີ ເຊິ່ງເປັນການຂ້າຄົນໃນຄອບຄົວທີ່ນຳຄວາມເສື່ອມເສຍເຂົ້າມາໃຫ້ແກ່ວົງຕະກູນ ຫຼື ເຮັດໃຫ້ຕະກູນເສຍຊື່ສຽງ ເຊັ່ນ: ການແຕ່ງງານກັບຄົນທີ່ມີສາສະຫນາທີ່ແຕກຕ່າງກັນ, ຕ່າງຊົນຊັ້ນນວັນນະ ຫຼື ການມີເພດສໍາພັນກ່ອນການແຕ່ງງານ ແລະ ອື່ນໆ.