ຕົກລະດູແລ້ງມາແລ້ວ ວຽກງານການທ່ອງທ່ຽວເລິ່ມຈະຄຶກຄື້ນ ເພາະໄປ-ມາສະດວກສະບາຍ ດັ່ງນັ້ນ, ຈຶ່ງເປັນໂອກາດທີ່ອົງການຈັດຕັ້ງທີ່ກ່ຽວຂ້ອງ ຕ້ອງລົງໄມ້ລົງມືໃສ່ແລ້ວ ເພາະການທ່ອງທ່ຽວມີແຕ່ລາຍໄດ້ ໂດຍບໍ່ໄດ້ລົງທຶນຫຼວງຫຼາຍ ສຳຄັນທີ່ສຸດນັ້ນແມ່ນເຮົາຈະເຮັດແນວໃດ ໃຫ້ສະຖານທີ່ທ່ອງທ່ຽວເປັນທີ່ຮູ້ຈັກຂອງສັງຄົມ ດຶງດູດຄົນໄປທ່ຽວໃຫ້ໄດ້ ແລະສ້າງສະຖານທີ່ທ່ອງທ່ຽວໃຫ້ເປັນທີ່ຕິດໃຈ.
ແນວໃດກໍຕາມໃນໄລຍະທີ່ຜ່ານມານັ້ນ ການທ່ອງທ່ຽວຢູ່ບ້ານເຮົາຍັງບໍ່ທັນໄດ້ ຖືກໂຄສະນາເຜີຍແຜ່ຢ່າງເອົາຈິງເອົາຈັງ ສະຖານທີ່ທ່ອງທ່ຽວຫຼາຍແຫ່ງທີ່ສຳຄັນ ພາຍໃນປະເທດແຕ່ຄົນລາວເອງກໍຍັງບໍ່ຮູ້ຊ້ຳ ຖ້າເຮົາເບິ່ງປະເທດມາເລເຊຍຈະເຫັນວ່າ ເຂົາເຈົ້າເອົາໃຈໃສ່ເລື່ອງການທ່ອງທ່ຽວແທ້ໆ ຂະໜາດປະເທດເຮົາເຂົາເຈົ້າກໍຍັງມາດຶງ ໃຫ້ໄປທ່ຽວປະເທດເຂົາເຈົ້າຈົນໄດ້ ເຮົາເຫັນໂຄສະນາການທ່ອງທ່ຽວຂອງມາເລເຊຍ ຫຼາຍກວ່າເຫັນໂຄສະນາການທ່ອງທ່ຽວໃນປະເທດຊ້ຳອີກ.
ມື້ນີ້ ລາວໂພສຕ໌ ຢາກເຊີນຊວນບັນດາທ່ານຜູ້ອ່ານໄດ້ໄປສຳຜັດກັບນ້ຳຕົກຕາດເທວະດາ ເຊິ່ງເປັນນ້ຳຕົກຕາດທີ່ສວຍງາມ ມີຄວາມູງເຖິງ 28 ແມັດ ເຊິ່ງຄວາມສູງດັ່ງກ່າວເຮັດໃຫ້ມີລະອອງປິວ ໄປທົ່ວບໍລິເວນນ້ຳຕົກຕາດ, ບໍລິເວນນ້ຳຕົກນັ້ນຍັງມີກ້ອນຫິນປະຫຼາດ ທີ່ມີລັກສະນະຄ້າຍກັບພົມສີ່ໜ້າ ຈຶ່ງໄດ້ຊື່ຕາດວ່າ ຕາດສາຍໝອກເທວະດາ ຫຼືຕາດເທວະດາ ຫຼືຊາວບ້ານແຖບນັ້ນຍັງເອີ້ນວ່າຕາດຫິນຕັ້ງ. ຕາມການເລົ່າຂານຂອງປະຊາຊົນຕໍ່ໆກັນມາ ໃນສະໄໝກ່ອນນັ້ນມີຫິນປະຫຼາດຕັ້ງຢູ່ 2 ກ້ອນ ແຕ່ກໍເພາະຖືກສົງຄາມທຳລາຍ ຈຶ່ງເຮັດໃຫ້ກ້ອນຫິນດັ່ງກ່າວເຫຼືອພຽງກ້ອນດຽວ ຈາການສຳຫຼວດຂອງນັກວິທະຍາສາດ ກ້ອນຫິນປະຫຼາດດັ່ງກ່າວມີອາຍຸປະມານ 4000 ກວ່າປີ ປັດຈຸບັນນ້ຳຕົກຕາດເທວະດາໄດ້ປັບປຸງໃຫ້ເປັນແຫຼ່ງທ່ອງທ່ຽວ ໃຫ້ຮອງຮັບນັກທ່ອງທ່ຽວທີ່ເດິນທາງເຂົ້າມາ ທ່ຽວຊົມທຳມະຊາດໃນບໍລິເວນນ້ຳຕົກຕາດ ຈຶ່ງເຮັດໃຫ້ນັກທ່ອງທ່ຽວເຂົ້າມາທ່ຽວຈຳນວນຫຼາຍຂຶ້ນ.
ທີ່ຕັ້ງຂອງນ້ຳຕົກຕາດແມ່ນຢູ່ໄກຈາກເທສະບານເມືອງສາລະວັນປະມານ 22 ກິໂລແມັດ ໄປຕາມເສັ້ນທາງເລກທີ 20 ສາລະວັນ-ປາກເຊ ຖ້າຜູ້ໃດໄດ້ມີໂອກາດໄປທ່ອງທ່ຽວທາງພາກໃຕ້ຂໍແນະນຳວ່າ ບໍ່ຄວນພາດຕາດແຫ່ງນີ້ເດັດຂາດ.