ສັງຄົມອອນລາຍສົງໄສ ສາເຫດການຕາຍຂອງທ້າວ ສີລະສອນ ຫຼື ອາກົງ ເປັນຜູ້ກໍ່ເຫດປຸ້ນຄຳຮ້ານຄຳພໍໃຈ ທີ່ໄດ້ຕັດສິນໃຈຈົບຊີວິດຂອງຕົນໃນວັນທີ 12 ມິຖຸນາ ທີ່ຜ່ານມາ.
ກ່ອນໜ້ານີ້ ໃນວັນທີ 8 ມິຖຸນາ 2023 ເກີດເຫດໂຈນບຸກປຸ້ນຮ້ານຄຳພໍໃຈ ທີ່ບ້ານທົ່ງສາງນາງ ເມືອງຈັນທະບູລີ ນະຄອນຫຼວງວຽງຈັນ ເຮັດໃຫ້ຄຳເສຍຫາຍຫຼາຍເຖິງ 54 ບາດ ແລະ ທາງຮ້ານຄຳກໍໄດ້ອອກຄ່າຈັບຕົວໂຈນເຖິງ 100.000.000 ລ້ານກີບ ຫຼື 200.000 ບາດ ໃຫ້ແກ່ຄົນທີ່ຈັບໂຈນໄດ້.
ຕໍ່ມາຊ່ວງເຊົ້າຂອງວັນທີ 9 ມິຖຸນາ ທາງດ້ານເຈົ້າຂອງຮ້ານຄຳກໍອອກມາໂພສກ່ຽວກັບຂໍ້ມູນໂຈນທີ່ປຸ້ນຄຳໄດ້ໜີໄປຝັ່ງໄທ ແລະ ພາຍໃນມື້ດຽວກັນ ເຈົ້າໜ້າທີ່ຝັ່ງໄທກໍສາມາດຈັບຕົວຜູ້ກ່ຽວ ແລະ ນຳສົ່ງກັບຄືນປະເທດ.
ພໍຕົກມາວັນທີ 12 ມິຖຸນາ ກໍໄດ້ມີຂ່າວການເສຍຊີວິດຂອງ ທ້າວ ສີລະສອນ ຫຼື ອາກົງ ທີ່ຕັດສິນໃຈຈົບຊີວິດ ດ້ວຍການຜູກຄໍຕາຍ, ທັ້ງນີ້ ເຮັດໃຫ້ປະຊາຊົນ ຫຼື ສັງຄົມອອນລາຍ ບໍ່ວ່າຈະເປັນຝັ່ງໄທ ແລະ ລາວ ກໍຕ່າງສົງໄສເຖິງສາເຫດທີ່ຜູ້ກ່ຽວນັ້ນຂ້າຕົວຕາຍ ຍ້ອນຫຍັງ? ຄຸກ ຫຼື ບ່ອນກັກຂັງ ເປັນຫຍັງຄືມີເຊືອກຜູກຄໍ? ແລະ ຍັງມີຄຳຖາມອີກຫຼາຍທີ່ສັງຄົມອອນລາຍຕັ້ງຂໍ້ສົງໄສຕໍ່ເຫດການນີ້.
ຢ່າງໃດກໍຕາມ ປະຊາຊົນກໍຍັງລໍຖ້າຄຳຖະແຫຼງການຈາກເຈົ້າໜ້າທີ່ ເພື່ອຄວາມຊັດເຈນຕໍ່ກັບເຫດການນີ້.