ອີງຕາມສຳນັກຂ່າວ ເດລີເມລ ລາຍງານເມື່ອວັນທີ 13 ມິຖຸນາ 2023 ຜ່ານມານີ້ວ່າ: ເກີດເຫດສະເທືອນຂວັນຂຶ້ນ ກັບທ້າວ ວາລາດຶມີ ໂປປອຟ ສັນຊາດຊາວຣັດເຊຍ ອາຍຸ 23 ປີ, ທີ່ຕົກເປັນເຫຍື່ອໃຫ້ປາສະຫຼາມເສືອໂຕໜຶ່ງໄດ້ເຂົ້າທຳຮ້າຍ ແລະ ກັດກິນເຂົາທັງເປັນ, ຂະນະທີ່ເຂົາກຳລັງລອຍນ້ຳທະເລ ທີ່ຢູ່ໃກ້ລີສອດແຫ່ງໜຶ່ງ ທີ່ເມືອງຫູກາດາ ປະເທດເອຢິບ ໃນວັນທີ 8 ມິຖຸນາ 2023 ທີ່ຜ່ານມາ.
ຜູ້ເຫັນເຫດການໄດ້ເລົ່າວ່າ: ໜຸ່ມຊາວຣັດເຊຍໄດ້ຖືກປາສະຫຼາມໂຈມຕີ ແລະ ລອຍວົນໄປມາເພື່ອກັດກິນເຂົາ ເຮັດໃຫ້ລາວຮ້ອງຂໍຄວາມຊ່ວຍເຫຼືອຈາກຜູ້ເປັນພໍ່ດ້ວຍຄວາມຕົກໃຈ ແລະ ຜູ້ເຫັນເຫດການຕ່າງກໍ່ບອກໃຫ້ລາວລອຍເຂົ້າຝັງ ແຕ່ກໍບໍ່ທັນ ປາສະຫຼາມມັນໄດ້ດຶງເຂົາລົງໄປໃນນ້ຳ ແລະ ກັດກິນເຂົາທັງເປັນ.
ຫຼັງເກີດເຫດການນີ້ເຮັດໃຫ້ມີຄົນກຸ່ມໜຶ່ງອອກຕາມລ່າປາສະຫຼາມໂຕນີ້ທັນທີ ແລະ ກໍສາມາດຈັບໄດ້ ຈຶ່ງໄດ້ທຳການທຸບຕີມັນຈົນຕາຍ ເຊິ່ງຜູ້ຊ່ຽວຊານໄດ້ເຮັດການຜ່າທ້ອງຂອງປາສະຫຼາມໂຕດັ່ງກ່າວປາກົດວ່າ: ພົບຊິ້ນສ່ວນຮ່າງກາຍຂອງທ້າວ ໂປປອຟ ຫຼັງຈາກນັ້ນ ກໍໄດ້ນຳຮ່າງຂອງປາສະຫຼາມໄປຫໍ່ເປັນມຳມີ້ ເພື່ອນຳໄປສະແດງໃນພິພິຕະພັນ ຫຼັງຈາກຄວາມດຸຮ້າຍຂອງສະຫຼາມໂຕນີ້ກາຍເປັນຂ່າວສະເທືອນຂວັນໄປທົ່ວໂລກ.
ທີ່ມາ: ເດລີເມລ