ໃນວັນທີ 6 ມິຖຸນາ 2023 ຜ່ານມາ, ທີ່ຫ້ອງປະຊຸມ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ໄດ້ມີກອງປະຊຸມ ປຶກສາຫາລືກ່ຽວກັບ ແຜນບໍລິຫານ, ຄຸ້ມຄອງ ແລະພັດທະນາ ແຫຼ່ງທ່ອງທ່ຽວຖໍ້າຕິ່ງຂຶ້ນ ໂດຍການເປັນປະທານຂອງ ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ,ເຈົ້າເມືອງປາກອູ,ຮອງເຈົ້າເມືອງຈອມເພັດ,ວ່າການຫົວໜ້າພະແນກການເງິນ ແລະຫົວໜ້າຫ້ອງການຖວທທັງສອງເມືອງພ້ອມດ້ວຍພະນັກງານວິຊາການຂົງເຂດທ່ອງທ່ຽວເຂົ້າຮ່ວມ.
ກອງປະຊຸມຮອງຫົວໜ້າຂະແໜງ ຄຸ້ມຄອງການທ່ອງທ່ຽວໄດ້ລາຍງານຮ່າງ ແຜນບໍລິຫານ, ຄຸ້ມຄອງ ແລະພັດທະນາແຫຼ່ງທ່ອງທ່ຽວຖໍ້າຕິງ ເຊິ່ງຍົກໃຫ້ເຫັນ ການບໍລິຫານແຫຼ່ງທ່ອງທ່ຽວຖໍ້າຕິ່ງໃນປັດຈຸບັນ, ການບໍລິຫານຈັດການພາຍໃນແຫຼ່ງທ່ອງທ່ຽວ, ການປ້ອງກັນເວນຍາມ, ການຂາຍດອກໄມ້ບູຊາ ແລະນໍ້າດຶ່ມ, ການບໍລິຫານຈັດການຕູ້ບໍລິຈາກ, ການປົກປັກຮັກສາຫ້ອງນໍ້າ, ການຮັກສາສິ່ງແວດລ້ອມ, ການບໍລິການເຮືອຂ້າມ, ການບໍລິການສະຖານທີ່ຈອດລົດ, ການຄຸ້ມຄອງພະພຸດທະຮູບໃນຖໍ້າ, ການພັດທະນາແຫຼ່ງທ່ອງທ່ຽວຖໍ້າຕິ່ງໃນໄລຍະຜ່ານມາ, ການປົກປັກຮັກສາ ແລະຄຸ້ມຄອງ ປະຕິສັງຂອນວັດຖຸບູຮານໃນໄລຍະຜ່ານມາ.
ພ້ອມນັ້ນກໍໄດ້ຍົກໃຫ້ເຫັນຮູບແບບການບໍລິຫານ, ຄຸ້ມຄອງ ແລະພັດທະນາແຫຼ່ງທ່ອງທ່ຽວຖໍ້າຕິງໃນອະນາຄົດ ໂດຍມີ 2 ຮູບແບບ ຄື: ໃຫ້ພາກລັດເປັນຜູ້ບໍລິຫານ ແລະ ຄຸ້ມຄອງໂດຍກົງ ຄືກັບລະບົບການບໍລິຫານ, ຄຸ້ມຄອງຕາດກວາງຊີ, ມີການແຕ່ງຕັ້ງພະນັກງານປະຈຳແຫຼ່ງທ່ອງທ່ຽວ ໂດຍຈ່າຍເປັນເງິນເດືອນ ແລະແບ່ງໜ້າທີ່ ຄວາມຮັບຜິດຊອບໃຫ້ແຕ່ລະຄົນຢ່າງລະອຽດ ໃຫ້ປະຊາຊົນມີສ່ວນຮ່ວມ ໃນການວ່າຈ້າງງານຕາມແຕ່ລະຕໍາແໜງ, ມອບໃຫ້ເອກະຊົນສຳປະທານ ພ້ອມທັງພັດທະນາບໍລິເວນອ້ອມຮອບດັ່ງກ່າວໃຫ້ເປັນທີ່ດຶງດູດກວ່າເກົ່າ ພ້ອມທັງສ້າງໃຫ້ມີກິດຈະກຳໃຫ້ນັກທ່ອງທ່ຽວໄດ້ສຳພັດໃນຫຼາຍຮູບແບບ ບໍ່ວ່າຈະເປັນທາງນໍ້າ ແລະພູຜາປ່າໄມ້, ກິດຈະກຳຍ່າງປ່າ, ຍ່າງເລາະຊົມວິຖີຊີວິດບ້ານທີ່ຢູ່ອ້ອມແອ້ມໃກ້ຄຽງ, ການບໍລິການຈັດການແມ່ນຕ້ອງຂຽນເປັນບົດໂຄງການມາໂດຍຜ່ານການເຫັນດີເປັນເອກະພາບຈາກພາກລັດ.
ເຊິ່ງແຜນງານ ແລະ ໂຄງການ ການບໍລິຫານ, ຄຸ້ມຄອງ ແລະພັດທະນາແຫຼ່ງທ່ອງທ່ຽວຖໍ້າຕິ່ງ ມີ6ແຜນງານ ແລະ 31ໂຄງການຄື: ສ້າງ ແລະ ປັບປຸງສິງອຳນວຍຄວາມສະດວກພາຍໃນ, ປົກປັກຮັກສາ ແລະ ຟື້ນຟູຖໍ້າຕິ່ງ, ປັບປຸງການບໍລິການ ການຂົນສົ່ງນັກທ່ອງທ່ຽວລະຫວ່າງບ້ານປາກອູ ຫາ ຖໍ້າຕິ່ງ, ປົກປັກຮັກສາສິ່ງແວດລ້ອມ ແລະຊີວະນາໆພັນ, ການພັດທະນາບຸກຄະລາກອນ ແລະແຜນງານການໂຄສະນາ ແລະສົ່ງເສີມກິດຈະກຳການທ່ອງທ່ຽວໃນເຂດໃກ້ຄຽງແຫຼ່ງທ່ອງທ່ຽວຖໍ້າຕິ່ງ.
ແຫຼ່ງຂ່າວ: ຂ່າວສານຫຼວງພະບາງ