ອີງຕາມສຳນັກຂ່າວ BBC ລາຍງານເມື່ອວັນທີ 12 ມິຖຸນາ 2023 ຜ່ານມາ, ເກີດເລື່ອງທີ່ໜ້າເຫຼືອເຊື່ອຂຶ້ນໃນປະເທດເອກວາດໍ ເມື່ອແມ່ຕູ້ທີ່ມີຊື່ວ່າ ນາງເບວລາ ມອນໂທຍາ ທາເປຍ ອາຍຸ 76 ປີ ປ່ວຍໄດ້ເຂົ້າໂຮງໝໍ, ແພດບໍ່ສາມາດປິ່ນປົວແມ່ຕູ້ຄົນນີ້ໄດ້ຈຶ່ງເສຍຊີວິດ ຕໍ່ມາຍາດພີ່ນ້ອງກໍໄດ້ນຳສົບຂອງແມ່ຕູ້ໄປເຮັດພິທີທາງສາສະໜາ ແຕ່ປາກົດວ່າ: ແມ່ຕູ້ໄດ້ກັບມາຫາຍໃຈແຮງ ແລ້ວຟື້ນຂຶ້ນຈາກຄວາມຕາຍ ຈຶ່ງເຮັດໃຫ້ຍາດພີ່ນ້ອງຕ່າງພາກັນຕົກໃຈ ແລະ ລູກຊາຍຕ້ອງໂທໄປຖາມດ້ານໂຮງໝໍວ່າມັນເກີດຫຍັງຂຶ້ນ.
ທາງດ້ານ ທ້າວກຶວເບີໂຕ ບາເບົາ ລູກຂອງແມ່ຕູ້ ທາເປຍ ເປີດເຜີຍວ່າ: ສົບຂອງແມ່ຕົນຖືກຫໍ່ດ້ວຍຜ້າ ກ່ອນນຳລົງໂລງສົບເພື່ອປະກອບພິທີທາງສາສະໜາ ແລະ ກຽມນຳໄປຝັງ ແຕ່ທັນໃດນັ້ນກໍພົບວ່າໂລງສັ່ນ ແລະ ເມື່ອເຂົ້າໄປເບິ່ງໃກ້ໆຈຶ່ງເຫັນແມ່ຕູ້ ທາເປຍ ຫາຍໃຈແຮງໃນສະພາບທີ່ຫອບເມື່ອຍ ທາງຍາດພີ່ນ້ອງຈຶ່ງໄດ້ໂທຫາທາງໂຮງໝໍມາຮັບແມ່ຕູ້ໄປຮັັກສາຢ່າງຮີບດ່ວນ.
ທາງດ້ານ ກະຊວງສາທາລະນະສຸກເອກວາດໍ ໄດ້ອອກຖະແຫຼງການໂດຍລະບຸວ່າ: ແມ່ຕູ້ Tapia ໄດ້ເຂົ້າຮັບການຮັກສາຢູ່ໂຮງໝໍ Babahoyo. ຕັ້ງແຕ່ວັນສຸກ, ເດືອນມິຖຸນາ 9, ທີ່ຜ່ານມາ ແລະ ຕ້ອງເຂົ້າໄປໃນຫ້ອງດູແລຜູປ່ວຍວິກິດດ້ວຍອາການຂອງພະຍາດເສັ້ນເລືອດສະຫມອງ. (Cerebrovascular Accident-CVA) ແລະຕໍ່ມາໄດ້ເກີດຫົວໃຈຢຸດເຕັ້ນກະທັນຫັນ. (Cardiorespiratory Arrest) ໂດຍທ່ານຫມໍໄດ້ອອກໃບຢັ້ງຢືນການເສຍຊີວິດໃຫ້ກັບແມ່ຕູ້ຄົນນີ້ແລ້ວ.
ຢ່າງໃດກໍຕາມ, ທາງດ້ານ ກະຊວງສາທາລະນະສຸກໄດ້ສັ່ງໃຫ້ສ້າງຕັ້ງຄະນະກຳມະການກວດກາວຽກງານແພດໝໍ. ແລະໄດ້ອອກໃບຢັ້ງຢືນການເສຍຊີວິດໃຫ້ ແມ່ຕູ້ທາເປຍ ພ້ອມທັງສັ່ງໃຫ້ກວດກາຄືນຂະບວນການເຮັດວຽກຂອງໂຮງໝໍແຫ່ງນີ້.
ວີດີໂອ: ແມ່ຕູ້ຟື້ນຂຶ້ນຈາກໂລງ