ສະຫະລັດອາເມລິກາ ພ້ອມຈະໃຫ້ການສະໜັບສະໜູນ ສປປ ລາວໃນການເປັນປະທານຈັດກອງປະຊຸມສຸດຍອດອາຊຽນ (ASEAN SUMMIT) ຄັ້ງທີ 43 ໃນປີ 2024 ໃນຂະນະທີ່ອີກຫຼາຍປະເທດ ເລີ່ມສະແດງເຈດຈຳນົງຈະປະກອບສ່ວນຊ່ວຍເຫຼືອລາວເຊັ່ນກັນ.
ໂດຍ ທ່ານ ໂຍຮານເນັສ ອາບຣາຮໍາ ເອກອັກຄະລັດຖະທູດ ສະຫະລັດອາເມລິກາ ປະຈໍາ ອາຊີຕາເວັນອອກສຽງໃຕ້ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 18-20 ພຶດສະພາ 2023, ທ່ານໄດ້ກ່າວວ່າ: ສະຫະລັດອາເມລິກາ ມີຄວາມຕັ້ງໃຈ ແລະ ພ້ອມຈະໃຫ້ການຊ່ວຍເຫຼືອ ສປປ ລາວ ຢ່າງເຕັມທີ່ ເພື່ອກະກຽມໃສ່ ການຈັດກອງປະຊຸມສຸດຍອດ ອາຊຽນ ຄັ້ງທີ່ 43 ທີ່ ສປປ ລາວ ຈະໄດ້ຮັບກຽດ ເປັນເຈົ້າພາບ ໃນປີ 2024 ໃຫ້ໄດ້ຮັບຜົນສໍາເລັດ ແລະ ສະຫະລັດອາເມລິກາ ພ້ອມແລ້ວ ທີ່ຈະເຮັດວຽກຢ່າງໃກ້ຊິດ ກັບຝ່າຍລາວ ແລະ ອາຊຽນ ເພື່ອກະກຽມໃສ່ກອງປະຊຸມດັ່ງກ່າວ ໂດຍໃນໄລຍະຢ້ຽມຢາມລາວ ທ່ານຍັງໄດ້ເຂົ້າພົບປະສົນທະນາກັບ ກະຊວງການຕ່າງປະເທດ, ກະຊວງອຸດຫາຫະກໍາ ແລະ ການຄ້າ ແລະ ກະຊວງເຕັກໂນໂລຊີ ແລະ ການສື່ສານ ຕື່ມອີກ.
ນອກນັ້ນ ກໍສືບຕໍ່ພັດທະນາການສຶກສາ, ສາທາລະນະສຸກ, ເກັບກູ້ລະເບີດບໍ່ທັນແຕກ, ຍົກລະດັບຄວາມຮູ້ ຄວາມສາມາດ ໃຫ້ພະນັກງານ ແລະ ຜູ້ປະກອບການໃນລາວ ແລະ ອື່ນໆ.
ແຫຼ່ງຂ່າວ ຂປລ