ແຂວງບໍລິຄໍາໄຊ ຈັດພິທີນຳສົ່ງອັດຖິ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມ ຢູ່ ສປປ ລາວ ຈຳນວນ 10 ອັດຖິ ໃນນັ້ນຂຸດຄົ້ນໄດ້ຈາກແຂວງບໍລິຄຳໄຊ 9 ອັດຖິ ແລະ ນະຄອນຫຼວງວຽງຈັນ 1 ອັດຖິ ກັບຄືນປະເທດ ໃນວັນທີ 22 ພຶດສະພາ 2023 ນຳໂດຍ ສະຫາຍ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍຄະນະນຳຂອງແຂວງ, ສະຫາຍ ຫງວຽນຮົ່ງຫຼິງ ຮອງປະທານຜູ້ປະຈໍາການ ຄະນະກໍາມະການປະຊາຊົນ ແຂວງຮ່າຕິ່ງ, ສະຫາຍ ພົນຈັດຕະວາ ສີພອນ ຈັນສົມວົງ ຫົວໜ້າຄະນະປະຕິບັດງານພິເສດ ນະຄອນຫຼວງວຽງຈັນ ພ້ອມດ້ວຍນາຍ ແລະ ພົນທະຫານ-ນາຍແລະ ພົນຕຳຫຼວດ ເຂົ້າຮ່ວມ.
ຂະບວນນຳສົ່ງອັດຖິ ທະຫານອາສາສະໝັກ ແລະ ຊ່ຽວຊານຫວຽດນາມ ດັ່ງກ່າວ ໄດ້ເຄື່ອນອອກຈາກສະໂມສອນໃຫຍ່ແຂວງບໍລິຄໍາໄຊ ແລະ ເດີນທາງໄປແຂວງຮ່າຕິ່ງ ສສ ຫວຽດນາມ ທີ່ເປັນບ້ານເກີດເມືອງນອນຢ່າງສົມກຽດ, ດ້ວຍຄວາມອາໄລຮັກ ຕໍ່ດວງວິນຍານຂອງພວກສະຫາຍ, ປະຊາຊົນລາວ ໂດຍສະເພາະ ແຂວງບໍລິຄຳໄຊ ມີຄວາມຊາບຊຶ້ງ ແລະ ຈົດຈຳຈາລຶກ ບຸນຄຸນຢ່າງບໍ່ມີວັນຫຼົງລືມໄດ້, ມູນເຊື້ອການຮ່ວມມືສຳພັນສູ້ຮົບ ລະຫວ່າງສອງຊາດ ລາວ-ຫວຽດນາມ ແມ່ນເປັນສັນຍາລັກທີ່ສະຫວ່າງ ສະໄຫວ ແລະ ຢືນຢັນໄດ້ວ່າ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງກອງທັບປະຊາຊົນລາວ ແລະ ກອງທັບປະຊາຊົນຫວຽດນາມ ແມ່ນການປະສານສົມທົບທີ່ມີປະສິດທິຜົນສູງ, ເຊິ່ງຜົນງານ ແລະ ຄຸນງາມຄວາມດີຂອງບັນດາສະຫາຍພະນັກງານ ນັກຮົບ ຈະກາຍເປັນແວ່ນແຍງອັນໃສແຈ້ງ ໃຫ້ແກ່ລູກຫລານຄົນຮຸ່ນຫລັງໄດ້ຮ່ຳຮຽນ ແລະ ສືບທອດເອົາຊົ່ວກາລະນານ.
ແຫຼ່ງຂ່າວ ຂປລ