ທຫລ ແລະ ກະຊວງການເງິນ ເພີ່ມທະວີການຄຸ້ມຄອງການເງິນ-ເງິນຕາ

0
664

ທະນາຄານແຫ່ງ ສປປ ລາວ(ທຫລ) ແລະ ກະຊວງການເງິນ ໄດ້ຈັດກອງປະຊຸມຮ່ວມພົບປະປຶກສາຫາລື 2 ຝ່າຍ ຂຶ້ນໃນວັນທີ 22 ພຶດສະພາ ນີ້ ໂດຍການເປັນປະທານຮ່ວມຂອງ ທ່ານ ບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ແລະ ທ່ານ ສັນຕິພາບ ພົມວິຫານ ລັດ ຖະມົນຕີກະຊວງການເງິນ ພ້ອມດ້ວຍຄະນະ.

ການພົບປະໃນຄັ້ງນີ້ເພື່ອຍົກສູງການຮ່ວມມື ເພື່ອແກ້ໄຂວຽກງານການຄຸ້ມຄອງການເງິນ-ເງິນຕາ, ສະຫລຸບຕີລາຄາຄວາມຄືບໜ້າ ການຈັດຕັ້ງປະຕິບັດ ຕາມການຕົກລົງຂອງກອງປະຊຸມ ຄັ້ງວັນທີ 25 ພະຈິກ 2022 ຜ່ານມາ ຊຶ່ງມີວຽກງານການປັບປຸງກົນໄກການກໍານົດມາດຕະການ, ກົນໄກການນໍາເຂົ້າສິນຄ້າຟຸມເຟືອຍ, ການແກ້ໄຂໜີ້ສິນຮ່ວມກັນ, ການປັບປຸງກົນໄກການເກັບລາຍຮັບເປັນເງິນຕາຕ່າງປະເທດ, ການທົບທວນຄືນບັນດານິຕິກໍາ-ລະບຽບການ ລະຫວ່າງ 2 ຂະແໜງການ ແລະ ວຽກງານອື່ນໆ.

ຜ່ານການປຶກສາຫາລືຂອງກອງປະຊຸມໄດ້ຕົກລົງ ແລະ ເປັນເອກະພາບຢ່າງສູງ ຕໍ່ການຈັດຕັ້ງປະຕິບັດວຽກງານໃນຕໍ່ໜ້າ ເພື່ອແກ້ໄຂບັນຫາຂໍ້ຫຍຸ້ງຍາກທາງດ້ານການຄຸ້ມຄອງການເງິນ-ເງິນຕາ ຮ່ວມກັນ ໂດຍການແຕ່ງຕັ້ງຄະນະກຳມະການ ເພື່ອຄົ້ນຄວ້າກຳນົດ ລາຍການສິນຄ້ານຳເຂົ້າ, ປັບປຸງກົດໝາຍ ແລະ ນິຕິກຳອື່ນໆ ທີ່ປິ່ນອ້ອມໃນວຽກງານຄຸ້ມຄອງການນຳເງິນສົດເຂົ້າ-ອອກ ສປປ ລາວ, ການຄຸ້ມຄອງເງິນຕາຕ່າງປະເທດ ຕິດພັນກັບລາຍຮັບງົບປະມານຂອງລັດ ແລະ ວຽກງານອື່ນໆ ເພື່ອໃຫ້ການເຄື່ອນໄຫວວຽກງານຄຸ້ມຄອງການເງິນ-ເງິນຕາ ມີຄວາມຄ່ອງຕົວ ແລະ ຮັດກຸມຍິ່ງຂຶ້ນ.

ພາຍຫຼັງສຳເລັດກອງປະຊຸມທັງສອງຝ່າຍຍັງໄດ້ເຊັນບົດບັນທຶກຄວາມເຂົ້າໃຈ (MOU) ຮ່ວມກັນໃນການປັບປຸງກົນໄກການຮ່ວມມື ແລະ ການເຊັນຢັ້ງຢືນເອກະສານສຳຄັນຮ່ວມກັນ.

ແຫຼ່ງຂ່າວຈາກ ກະຊວງການເງິນ