ໃນອາທິດຜ່ານມາ, ພົຈວ ຄໍາແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ ພ້ອມດ້ວຍຄະນະ ໄດ້ລົງກວດກາສະຖານທີ່ຕັ້ງສູນບໍາບັດຜູ້ຕິດຢາເສບຕິດ 4 ເມືອງເໜືອ ຢູ່ເມືອງຊຽງຮ່ອນ ແຂວງໄຊຍະບູລີ.
ສະຖານທີ່ຕັ້ງສູນບໍາບັດຢາເສບຕິດ 4 ເມືອງເໜືອ ຂອງແຂວງໄຊຍະບູລີ ຕັ້ງຢູ່ຂອບ ເຂດບ້ານປາກເປັດ ເມືອງຊຽງຮ່ອນ ແຂວງໄຊຍະບູລີ, ຈາກການລົງກວດກາພື້ນທີ່ຕົວຈິງເຫັນວ່າ ມີຄວາມເໝາະສົມໃຫ້ແກ່ການຕັ້ງເປັນສູນບໍາບັດຜູ້ຕິດຢາເສບຕິດ 4 ເມືອງເໜືອຂອງແຂວງ ແລະ ເຫັນວ່າມີຄວາມເໝາະສົມແກ່ການທໍາການຜະລິດ, ປູກຝັງ, ລຽ້ງສັດ ແລະ ກະສິກໍາອື່ນໆ, ເຊິ່ງມີເນື້ອທີ່ທັງໜົດ 28,67 ເຮັກຕາ.
ການລົງກວດກາສະຖານທີ່ຕັ້ງສູນບໍາບັດຢາເສບຕິດໃນຄັ້ງນີ້, ກໍເພື່ອເປັນການກວດກາສະຖານທີ່ຕົວຈິງໃນແຕ່ລະຈຸດທີ່ຈະບຸກເບີກ ແລະ ກຽມປຸກສ້າງໃຫ້ຖືກຕາມພື້ນ ຖານໂຄງຮ່າງທີ່ໄດ້ກໍານົດໄວ້. ໃນວັນດຽວກັນນັ້ນ, ຍັງໄດ້ລົງກວດກາສະຖານທີ່ຈະບຸກເບີກ ແລະ ກຽມກໍ່ສ້າງຫ້ອງການປະສານງານຊາຍແດນຢູ່ລະຫ່ວາງເມືອງເງິນ ແຂວງໄຊຍະບູລີ ແລະ ເມືອງປາກແບງ ແຂວງອຸດົມໄຊ ຕື່ມອີກ.
ທີ່ມາ: ຄວາມສະຫງົບ Lao Security News