ໃນວັນທີ 11 ພຶດສະພາ 2023 ນີ້, ຄະນະຮັບຜິດຊອບການຊ້ອມຮົບຮ່ວມລາວ-ຈີນ ໃນຫົວຂໍ້ “ໂລ້ກໍາບັງມິດຕະພາບ 2023” ໄດ້ຈັດພິທີເປີດການຊ້ອມຮົບຮ່ວມລາວ-ຈີນ ຂຶ້ນຢ່າງເປັນທາງການ, ໂດຍການເປັນປະທານຂອງ ສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ, ຮອງຫົວໜ້າຄະນະຊີ້ນໍາຊ້ອມຮົບຮ່ວມ ລາວ-ຈີນ “ໂລ້ກໍາບັງ ມິດຕະພາບ 2023” ມີທ່ານ ຈຽງ ຈ້າຍຕົງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປ ຈີນ ປະຈຳ ສປປ ລາວ, ພົນຕີ ຢາງເຫວີນຫລີນ ຮອງຫົວໜ້າແມ່ທັບ 75 ເຂດສູ້ຮົບພາກໃຕ້ ສປ ຈີນ, ພ້ອມດ້ວຍແຂກ, ນາຍ ແລະ ພົນທະຫານ ກອງທັບປະຊາຊົນລາວ, ບັນດາສະຫາຍນາຍ ແລະ ພົນທະຫານກອງທັບປົດປ່ອຍປະຊາຊົນຈີນ ທີ່ເຂົ້າຮ່ວມ.
ໂອກາດນີ້ ສະຫາຍ ພົນຕີ ພັນແສງ ບຸນພັນ ໄດ້ກ່າວວ່າ: ການເຄື່ອນໄຫວຊ້ອມຮົບ “ໂລ້ກໍາບັງມິດຕະພາບ -2023” ຈັດຂຶ້ນຢູ່ທີ່ ສປປ ລາວ ຄັ້ງນີ້ ໂດຍມີຈຸດປະສົງແນໃສ່ເສີມຂະຫຍາຍສາຍພົວພັນມິດຕະພາບການຮ່ວມມືຮອບດ້ານ ລະຫວ່າງສອງຊາດ, ສອງພັກ, ສອງກອງທັບ ແລະ ປະຊາຊົນສອງຊາດ ລາວ-ຈີນ, ຈີນ-ລາວ, ໃຫ້ນັບມື້ເພິ່ມທະວີຄວາມໜັກແໜ້ນ, ໝັ້ນຄົງທະນົງແກ່ນຍິ່ງໆຂື້ນ. ໂດຍສະເພາະແມ່ນການຮ່ວມມືທາງດ້ານການທະຫານ, ສ້າງຄວາມເຊື່ອໝັ້ນເຊິ່ງກັນ ແລະ ກັນ. ເພີ່ມທະວີການຊ່ວຍເຫຼືອເຊິ່ງກັນ ແລະ ກັນ ໃນຂົງເຂດວຽກງານປ້ອງກັນຊາດ, ຍົກສູງບົດບາດອະທິປະໄຕສ້າງຄວາມເຂັ້ມແຂງໝັ້ນຄົງ ໃຫ້ແກ່ສອງປະເທດຢູ່ໃນຂົງເຂດພາກພື້ນອາຊີ ແລະ ໃນໂລກ ໂດຍສະເພາະແມ່ນຄວາມໝັ້ນຄົງຂອງ ສປປ ລາວ ແລະ ສປ ຈີນ ສະນັ້ນການຊ້ອມຮົບ “ໂລ້ກຳບັງມິດຕະພາບ-2023” ແມ່ນມີຄວາມຈໍາເປັນ ແລະ ສໍາຄັນຢ່າງຍິ່ງ ເປັນການຍົກລະດັບການພັດທະນາກຳລັງເພີ່ມທະວີຄວາມເຂັ້ມແຂງ ຮອບດ້ານໃຫ້ແກ່ກອງທັບປະຊາຊົນລາວກ້າວຂື້ນ ຕາມທິດສ້າງກອງທັບປະຊາຊົນລາວໃຫ້ກາຍເປັນກອງທັບປະຕິວັດທີ່ມີແບບແຜນທີ່ທັນສະໄໝ ຄຽງຄູ່ກັບການຫັດແອບດັ່ງກ່າວ ກໍາລັງທັງສອງຝ່າຍກອງທັບລາວ-ຈີນ, ຈີນ-ລາວ ຍັງມີການເຄື່ອນໄຫວໃນຂົງເຂດວຽກງານການເມືອງ-ນໍາພາແນວຄິດ, ເປັນຕົ້ນແມ່ນການແລກປ່ຽນວັດທະນາທຳ, ສີລະປະວັນນະຄະດີ, ກິລາ ແລະ ການເຄືອນໄຫວກິດຈະກຳຕ່າງໆ ຮ່ວມກັນໃນຮູບແບບເພື່ອນສາມັກຄີເພື່ອນ ມິດຕະພາບເຊິ່ງກັນ ແລະ ກັນ” ຕະຫຼອດຮອດການດໍາລົງຊີວິດປະຈຳວັນ ການແລກປຽ່ນຂໍ້ມູນຂ່າວສານ, ການສື່ສານ ການແລກປ່ຽນພາສາຄຳເວົ້າ ໃຫ້ມີຄວາມເຂົ້າໃຈເຊິ່ງກັນ ແລະ ກັນ ລະຫວ່າງນາຍ ແລະ ພົນທະຫານສອງກອງທັບ ລາວ-ຈີນ, ຈີນ-ລາວ ໃຫ້ມີຄວາມສຳພັນ ແລະ ເຂົ້າໃຈກັນຢ່າງເລິກເຊິ່ງ. ພ້ອມດຽວກັນນີ້ ສະຫາຍ ຍັງໄດ້ຮຽກຮ້ອງມາຍັງບັນດາເພື່ອນສະຫາຍ ນາຍ ແລະ ພົນທະຫານ ຂອງສອງກອງທັບ ລາວ-ຈີນ, ຈີນ-ລາວ ຈົ່ງພ້ອມກັນຍົກສູງນ້ຳໃຈຄວາມເປັນເຈົ້າການ ໃນການຮັບຜິດຊອບໜ້າທີ່ຂອງຕົນ, ປະຕິບັດຂໍ້ກຳນົດກົດລະບຽບການເຄື່ອນໄຫວຢ່າງເຂັ້ມງວດ, ຮັກສາແໜ້ນຄວາມສາມັກຄີ ເຊິ່ງກັນ ແລະ ກັນ ຢ່າງແໜ້ນແຟ້ນ ບົນຈິດໃຈເພິ່ມພູນຄູນສ້າງ ແລະ ສົ່ງເສີມສາຍພົວພັນໄມຕີຈິດມິດຕະພາບຂອງສອງຊາດ ລາວ-ຈີນ, ຈີນ-ລາວ ໃຫ້ນັບມື້ຈະເລີນງອກງາມຍິ່ງໆຂື້ນໄປ.
ສອງກອງທັບ ລາວ-ຈີນ ກໍ່ຄືປະຊາຊົນສອງຊາດ ລາວ-ຈີນ ກຳລັງມີຄວາມພາກພູມໃຈ ແລະ ກຽມຕ້ອນຮັບຜົນງານ ແຫ່ງໄຊຊະນະຂອງ “ໂລ້ກຳບັງມິດຕະພາບ 2023” ຢ່າງເປັນຂະບວນຟົດຟື້ນ ພິເສດຕະຫຼອດໄລຍະຫັດແອບ ຕ້ອງຮັບປະກັນຄວາມປອດໄຟ 100%. ໂອກາດນີ້ ພົນຕີ ຢາງເຫວີນຫລີນ ກໍ່ໄດ້ກ່າວວ່າ: ການຊ້ອມຮົບຮ່ວມຈີນ-ລາວຄັ້ງນີ້, ບໍ່ພຽງແຕ່ແມ່ນເວທີທີ່ສໍາຄັນເພື່ອໃນການແລກປ່ຽນບົດຮຽນເຊິ່ງກັນ ແລະ ກັນ. ມັນຍັງເປັນການເສີມຂະຫຍາຍການພົວພັນຮ່ວມມືທາງດ້ານການທະຫານລະຫວ່າງສອງກອງທັບ ຈີນ-ລາວ, ລາວ-ຈີນ,ໃຫ້ກ້າວເຂົ້າສູ່ລວງເລິກ ແລະ ສືບຕໍ່ຮ່ວມມືສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຢ່າງເລີກເຊີ່ງກວ່າເກົ່າອີກດ້ວຍ, ທັງເປັນການຮ່ວມມື ແລະ ປະກອບສ່ວນເຂົ້າໃນການສ້າງປະຊາຄົມຮ່ວມຊະຕາກໍາທີ່ມີມາດຕະຖານສູງ, ຄຸນນະພາບ ແລະ ລະດັບສູງຂອງ ລາວ-ຈີນ. ເຊິ່ງໃນການຊ້ອມຮົບຮ່ວມ ຈີນ-ລາວ “ໂລ້ກຳບັງມິດຕະພາບ 2023” ຈະໄດ້ດໍາເນີນເປັນເວລາ 20 ວັນ, ນັບຕັ້ງແຕ່ 5-25 ພຶດສະພາ 2023 ຈຶ່ງສໍາເລັດ.
ແຫຼ່ງຂ່າວ Lao people’s Army News