ໃນວັນທີ 4 ພຶດສະພາ 2023 ເກີດເຫດຄາຕະກຳທາ້ວ ເນັ່ງທໍ່ຢ່າງ ເປັນນາຍບ້ານທົ່ງນາມີ ເມືອງປາກກະດິງ ແຂວງບໍລິຄຳໄຊ ໄດ້ຖືກລັດຍິງພາຍຫຼັງທີ່ເລີກຈາກກອງປະຊຸມເວລາປະມານ 16:00 ໂມງ ຂອງວັນທີ 4 ພຶດສະພາ ທັ້ງນີ້ເຫດການໄດ້ເກີດຂຶ້ນກ່ອນການເລືອກຕັ້ງນາຍບ້ານ ທີ່ຈະມີການເລືອກຕັ້ງໃນວັນທີ 5 ພຶດສະພານີ້ ຈຶ່ງເຮັດໃຫ້ຄອບຄົວສົງໃສຕໍ່ສາເຫດຂອງການກໍ່ເຫດລັດຍິງໃນຄັ້ງນີ້.
ອີງຕາມຜູ້ໃຊ້ເຟສບຸກຊື່ CH Nny Yang ຜູ້ເປັນຄອບຄົວຜູ້ເສຍຊີວິດໄດ້ອອກມາເລົ່າວ່າ: “ຫຼັງຈາກທີ່ເລີກປະຊຸມໄດ້ເກີດມີກຸ່ມຄົນຮ້າຍລັດຍິງເຮັດໃຫ້ອ້າຍຂອງຂ້າພະເຈົ້າ ຊື່ ເນັ່ງທໍ່ຢ່າງ ໄດ້ເສຍຊີວິດໃນທັນທີ. ຕໍ່ກັບເລື່ອງດັ່ງກ່າວນີ້ ຍັງບໍ່ທັນຮູ້ວ່າເກີດຂື້ນຍ້ອນເລື່ອງໃດ ຜູ້ໃດເປັນຜູ້ກໍ່ຄາຕະກຳ, ສິ່ງທີ່ທັງໝູ່ບ້ານຮູ້ກໍແມ່ນ ເນັ່ງທໍ່ຢ່າງ ເປັນນາຍບ້ານທີ່ດີ ຄອງໃຈປະຊາຊົນມາເປັນເວລາ 26-27 ປີ, ຜູ້ກ່ຽວເຮັດວຽກຊ່ວຍເຫຼືອປະຊາຊົນ, ຊ່ວຍເຫຼືອບ້ານເມືອງມາເປັນເວລານານກວ່າ 2 ທົດສະວັດ ບໍ່ເຄີຍມີຊີວິດທີ່ດີ, ບໍ່ເຄີຍມີລາຍໄດ້ທີ່ດີ ບໍ່ເຄີຍມີລົດນຳ ເປັນບຸກຄົນຊື່ສັດ ເຮັດວຽກຊ່ວຍລັດ ດ້ວຍຄວາມບໍລິສຸດທີ່ສຸດ ແຕ່ມື້ນີ້ທີ່ໃກ້ຈະຮອດວັນເລືອກຕັ້ງພັດມີເຫດການແບບນີ້ເກີດຂື້ນກັບທັງຄອບຄົວ ຍາດພີ່ນ້ອງພວກເຮົາ, ສະນັ້ນ ພວກເຮົາຈະສູ້ ແລະ ຂໍຄວາມເປັນທຳນຳທັງເຈົ້າໜ້າທີ່ຕຳຫຼວດ ເພື່ອນຳຕົວຄົນຮ້າຍ ແລະ ຜູ້ບົງການມາດຳເນີນຄະດີ ພ້ອມໃຊ້ກຳທີ່ໄດ້ກະທຳໄວ້ໃຫ້ໄດ້”.
ທັ້ງນີ້ກໍຂໍໃຫ້ເຈົ້າໜ້າທີ່ ສືບສວນສອບສວນ ແລະ ນຳຈັບຄົນຮ້າຍໃຫ້ໄດ້ໄວທີ່ສຸດ.
