ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຂົ້າຢ້ຽມຢາມພົບປະ ທ່ານ ຟາມ ມິງ ຈິງ ກຳມະການກົມການເມືອງສູນກາງພັກ ນາຍົກລັດຖະມົນຕີ ສສ ຫວຽດນາມ ຢູ່ທີ່ສຳນັກງານນາຍົກລັດ ຖະມົນຕີໃນວັນທີ 26 ເມສາ 2023.
ການເຂົ້າຢ້ຽມຢາມພົບປະຄັ້ງນີ້ ການນຳຂັ້ນສູງຂອງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ-ສອງລັດ ກໍ່ຄືສອງຊາດ ລາວ-ຫວຽດນາມ ໃນຕົ້ນປີນີ້ ນາຍົກລັດຖະມົນຕີ ສສ ຫວຽດນາມ ໄດ້ເດີນທາງຢ້ຽມຢາມ ເຮັດວຽກຢູ່ ສປປ ລາວ ເຖິງ 2 ຄັ້ງ ເຊິ່ງສະແດງເຖິງຄວາມພິເສດທີ່ສຸດ ພ້ອມນີ້ ປະທານ ສນຊ ໄດ້ລາຍງານໃນການພົບປະປຶກສາກັບຄະນະປະຈຳສູນກາງແນວໂຮມ ປະເທດຊາດຫວຽດນາມ ເຫັນວ່າມີ ບັນຍາກາດດີຫຼາຍສອງຝ່າຍໄດ້ປະຕິບັດທິດຊີ້ນຳຂອງ 2 ກົມການເມືອງ ແລະ ລັດຖະບານ ສຳລັບການຈັດຕັ້ງປະຕິບັດບົດບັນທຶກຮ່ວມມືທີ່ສອງຝ່າຍ ໄດ້ເຊັນກັນໃນ ເດືອນກໍລະກົດ 2022 ນັ້ນໄດ້ສຳເລັດ 4 ໃນ 10 ຂໍ້ທີ່ຕ້ອງເຮັດຮ່ວມກັນ ແລະ ໄດ້ພ້ອມກັນສຸມໃສ່ການປະຕິບັດອີກ 3 ຂໍ້ ພາຍໃນປີ 2023 ນີ້.
ຜ່ານການພົບປະສອງຝ່າຍ ໄດ້ປຶກສາຫາລື ແລກປ່ຽນບົດຮຽນບັນດາຫົວຂໍ້ທີ່ສອງຝ່າຍມີຄວາມສົນໃຈ ແລະ ພ້ອມກັນຈັດຕັ້ງປະຕິບັດເພີ່ມຕື່ມຈຳນວນໜຶ່ງ ແຕ່ຕ້ອງມີການປະສານສົບທົບ ວາງແຜນການລະອຽດ ແລະຂໍທິດຊີ້ນຳຈາກການນຳຂອງສອງປະເທດ ເພື່ອຄວາມເປັນເອກະພາບ ໃນການຈັດຕັ້ງປະຕິບັດຕົວຈິງ ໃຫ້ມີຜົນສຳເລັດໃນອານາຄົດ.
ທີ່ມາ VientianeMai