ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ຕິດຕາມຈັບ 2 ເປົ້າໝາຍ ທີ່ຮ່ວມກັນເຄື່ອນໄຫວຊິງຊັບ ປຸ້ນຊັບ ຢູ່ພາຍໃນນະຄອນຫຼວງວຽງຈັນ ລວມທັງໝົດ 46 ຄັ້ງ ມາດຳເນີນຄະດີ.
ເຈົ້າໜ້າທີ່ ປກສ ເມືອງສີໂຄດຕະບອງ ໃຫ້ຮູ້ວ່າ: ຜູ້ຖືກຫາທັງສອງ ຊື່ທ້າວ ສຸກປະເສີດ ຫຼື ຕະ ຢູ່ບ້ານໂພນສົມບູນ ແລະ ທ້າວ ໄທເກີ ຢູ່ບ້ານໂນນສະຫວ່າງ ທັງສອງບ້ານ ຂຶ້ນກັບເມືອງສີໂຄດຕະບອງ ນະຄອນຫຼວງວຽງຈັນ. ໃນເບື້ອງຕົ້ນ ຄະດີດັ່ງກ່າວນີ້, ນັບແຕ່ຕົ້ນປີ 2022 ໄດ້ຮັບແຈ້ງຄວາມຈາກຜູ້ຖືກເສຍຫາຍຫຼາຍຄົນ ວ່າ ມີຄົນຮ້າຍ 2 ຄົນ ໄດ້ນໍາໃຊ້ລົດຈັກ ເຄື່ອນໄຫວກໍ່ເຫດຊີງຊັບ-ປຸ້ນຊັບ ປະຊາຊົນທົ່ວນະຄອນຫຼວງວຽງຈັນ.
ດັ່ງນັ້ນ ເຈົ້າໜ້າທີ່ວິຊາສະເພາະ ປກສ ເມືອງສີໂຄດຕະບອງ ກໍໄດ້ປະສານສົມທົບກັບພາກສ່ວນທີ່ກ່ຽວຂ້ອງ ລົງເກັບກຳຂໍ້ມູນຫຼັກຖານ ແລະ ໄດ້ຄັດຈ້ອນຂຶ້ນບັນຊີເປົ້າໝາຍຕິດຕາມ, ມາຮອດວັນທີ 7 ທັນວາ 2022 ກໍສາ ມາດຈັບເປົ້າໝາຍ ຊື່ ທ້າວ ສຸກປະເສິດ ໄດ້ຢູ່ຮ້ານກິນດື່ມແຫຼ່ງໜຶ່ງ ແລະ ມື້ຕໍ່ມາ ກໍຕິດຕາມຈັບ ທ້າວ ໄທເກີ ພ້ອມເກັບກູ້ລົດຈັກ ຄືນມາໄດ້ 2 ຄັນ.
ຜ່ານການສອບສວນ ພວກກ່ຽວ ສາລະພາບວ່າ: ນັບແຕ່ຕົ້ນປີ 2022 ໄດ້ເຄື່ອນໄຫວຊິງຊັບມາແລ້ວ 42 ຄັ້ງ, ປຸ້ນເອົາລົດຈັກ 4 ຄັ້ງ ແລະ ກ່ອນຈະຖືກຕິດຕາມຈັບ ແມ່ນໄດ້ຊິງຊັບ ຢູ່ຕະຫຼາດລາວອົດຊີ ແລ້ວພາກັນລົບໜີໄປຢູ່ຕ່າງແຂວງ.
ປັດຈຸບັນຄະດີດັ່ງກ່າວ,ເຈົ້າໜ້າທີ່ ປກສ ເມືອງ ສີໂຄດຕະບອງ ໄດ້ສອບສວນຂະຫຍາຍຜົນ ເພື່ອຊອກຫາພວກຮ່ວມຂະບວນການ ມາດຳເນີນຄະດີຕາມຂັ້ນຕອນຂອງກົດໝາຍ.
ແຫຼ່ງຂ່າວ ປກສ ນະຄອນຫຼວງ