ໃນວັນທີ 21 ມີນາ 2023 ຜ່ານມານີ້ ເຈົ້າໜ້າທີ່ພາສີພະແນກສືບສວນ-ສອບສວນ ແລະ ປາບປາມການລັກລອບໜີພາສີ (ພສປ) ປະຈຳຈຸດປະສານງານນາເລົ່າ ເມືອງປາກກະດິງ ແຂວງບໍລິຄຳໄຊ, ໄດ້ຮັບຂໍ້ມູນຈາກແຫຼ່ງຂ່າວພົນລະເມືອງດີວ່າມີລົດກະບະ TOYOTA VIGO 4 ປະຕູ, ຈໍານວນ 2 ຄັນ, ບໍ່ໃສ່ປ້າຍທະບຽນແລ່ນຢູ່ເສັ້ນທາງເຂດເມືອງປາກກະດິງ ແຂວງບໍລິຄຳໄຊ.
ຜ່ານການກວດກາສອບຖາມເບື້ອງຕົ້ນເຫັນວ່າ: ເປັນລົດບໍ່ມີເອກະສານຢັ້ງຢືນເສຍພາສີ-ອາກອນ ແລະ ພັນທະອຶ່ນໆ. ທາງເຈົ້າໜ້າທີ່ພາສີຈຶ່ງໄດ້ນຳເອົາລົດທັງ 2 ຄັນມອບໃຫ້ພາສີປະຈຳແຂວງບໍລິຄຳໄຊ ເພື່ອດຳເນີນຕາມຂັ້ນຕອນຂອງກົດໝາຍ ແລະ ລະບຽບການຕໍ່ໄປ.
ພະແນກສືບສວນ-ສອບສວນ ເເລະ ປາບປາມການລັກລອບໜີພາສີ (ພສປ) ປະກອບດ້ວຍ 3 ຂະແໜງ ແລະ 14 ຈຸດປະສານງານໃນຂອບເຂດທົ່ວປະເທດ ຂຶ້ນກັບກົມພາສີ ກະຊວງການເງິນ, ໂດຍເຄື່ອນໄຫວວຽກງານວິຊາສະເພາະ ຕາມພາລະບົດບາດ, ສິດ, ໜ້າທີ່ຢ່າງເຂັ້ມງວດ.
ທີ່ມາ ກະຊວງການເງິນ