ພັທ ສີພອນ ວິໄລສິນ ຮອງຫົວໜ້າພະແນກຕໍາຫຼວດ ປກສ ເມືອງນາຊາຍທອງ ນວ ໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍ 2 ຄົນ ວ່າ: ທ້າວ ໄໝ ອາຍຸ 48 ປີ ກໍາມະກອນ ຢູ່ບ້ານແສນຊຸມ ເມືອງໂພນໂຮງ ແຂວງວຽງຈັນ ໄດ້ຕົວະຍົວະຫຼອກລວງເອົາລົດຈັກ CLICK I ສີດໍາ ໄປຂາຍ ໃນໄລຍະເດືອນຕຸລາ ແລະລົດຈັກເວບ 100 ສີດໍາ ໃນ ເດືອນທັນວາ 2022. ດັ່ງນັ້ນ, ເຈົ້າໜ້າທີ່ຈິ່ງໄດ້ສົມທົບກັບພາກສ່ວນກ່ຽວຂ້ອງລົງກວດກາສະຖານທີ່ເກີດເຫດ ແລະຕິດຕາມເປົ້າໝາຍສົງໄສຕາມຈຸດຕ່າງໆ ຕາມທີ່ໄດ້ຮັບແຈ້ງຄວາມໄວ້.
ມາຮອດວັນທີ 1 ກຸມພາ 2023, ກໍ່ສາມາດກັກຕົວ ທ້າວ ໄໝ ໄດ້ ພ້ອມທັງເກັບກູ້ຂອງກາງລົດຈັກ 2 ຄັນ ຄືນມາໄດ້ໃນເດືອນດຽວກັນ.
ຜ່ານການສອບສວນ ທ້າວ ໄໝ ຮັບສາລະພາບຕໍ່ເຈົ້າໜ້າທີ່ ປກສ ເມືອງນາຊາຍທອງວ່າ: ຕົນໄດ້ຫຼອກລວງເອົາລົດຈັກ 2 ຄັນແທ້ ໂດຍໄດ້ນໍາໄປຂາຍ ແລ້ວເອົາເງິນໄປໃຊ້ຈ່າຍຈົນໝົດ; ເຊິ່ງລົດຈັກຄຣີກໄອ (CLICK I) ສີດໍາ ຂາຍໃຫ້ຄົນຮູ້ຈັກ ຢູ່ບ້ານວຽງທອງ ເມືອງຫີນເຫີບ ແຂວງວຽງຈັນ ແລະ ລົດຈັກ ເວບ 100 (Wave 100) ສີດໍາ ຢູ່ເຂດບ້ານສາຍລົມ ເມືອງຈັນທະບູລີ ໄດ້ເງິນທັງໝົດ 10,000,000 ກີບ.
ປັດຈຸບັນ ລົດຈັກທັງສອງຄັນແມ່ນ ໄດ້ມອບໃຫ້ເຈົ້າຂອງເດີມແລ້ວ ໃນວັນທີ 10 ມີນາ 2023.
ແຫຼ່ງຂ່າວ ປກສ ນວ