ແຈ້ງການຈາກພະແນກເຕັກໂນໂລຊີ ແລະ ການສື່ສານ ເຖິງບັນດາບໍລິສັດ ທີ່ໃຫ້ບໍລິການດ້ານໂທລະຄົມມະນາຄົມ ຢູ່ນະຄອນຫຼວງວຽງຈັນ.
ເລື່ອງ: ການແກ້ໄຂລະບົບສາຍໂທລະຄົມມະນາຄົມ ຢູ່ ນະຄອນຫລວງວຽງຈັນ.
ອີງຕາມ ຂໍ້ຕົກລົງຂອງເຈົ້າຄອງ ນະຄອນຫຼວງວຽງຈັນ, ເລກທີ 146/ຈນວ, ລົງວັນທີ 03 ກຸມພາ 2023 ວ່າດ້ວຍ ການຈັດຕັ້ງ ແລະ ການເຄື່ອນໄຫວ ຂອງພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ. ອີງຕາມ ຫນັງສືສະເໜີ ສະບັບເລກທີ 042/LXCD, ລົງວັນທີ 15 ມີນາ 2023 ຂອງ ບໍລິສັດ ພັດທະນາສວນ ວັດທະນະທໍາລ້ານຊ້າງ ຈໍາກັດ.
ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ຂໍຖືເປັນກຽດແຈ້ງມາຍັງບັນດາ ບໍລິສັດ ທີ່ໃຫ້ ບໍລິການດ້ານໂທລະຄົມມະນາຄົມ ຢູ່ ນະຄອນຫຼວງວຽງຈັນ ທີ່ມີສາຍໂທລະສັບ, ສາຍເຄເບີ້ນ, ສາຍອິນເຕີເນັດ ແລະ ສາຍອື່ນໆ ຂອງຕົນທີ່ເກາະຫ້ອຍຕາມເສົາໄຟຟ້າ ຕາມທາງເລກ 13 ໃຕ້ ເຂດສວນວັດທະນະທໍາລ້ານຊ້າງ ເຊິ່ງຕັ້ງຢູ່ ກົງກັນຂ້າມກັບສະໜາມກິລາແຫ່ງຊາດຫຼັກ 16.
ດັ່ງນັ້ນ, ຈຶ່ງຂໍຄວາມຮ່ວມມືມາຍັງບັນດາທ່ານ ຈົ່ງຮີບຮ້ອນລົງໄປແກ້ໄຂ ແລະ ນໍາເອົາລະບົບສາຍໂທລະຄົມມະນາຄົມ ຂອງຕົນອອກ ຫຼື ເອົາລົງດິນ ໃຫ້ສໍາເລັດກ່ອນ ວັນທີ 26 ມີນາ 2023 ຖ້າຫາກກາຍກໍານົດເວລາທາງຄະນະຮັບຜິດຊອບໂຄງການ ຈະຮື້ຖອນເສົາໄຟຟ້າ ອອກຈາກບໍລິເວນດັ່ງກ່າວ ແລະ ຈະບໍ່ຮັບຜິດຊອບຕໍ່ຄວາມເສຍຫາຍໃດໆ.
