ອີງຕາມສຳນັກຂ່າວ Reuters ລາຍງານໃນວັນທີ 19 ມີນາ 2023 ຜ່ານມານີ້ວ່າ ເກີດເຫດພາຍຸໄຊໂຄລນ ເຟດດີ ພັດທະຫຼົ່ມມາລາວີ ຫຼາຍໝູ່ບ້ານ ຖືກກະແສນ້ຳພັດໄດ້ຮັບຄວາມເສຍຫາຍ ຍອດຜູ້ເສຍຊີວິດລວມແລ້ວຫຼາຍກວ່າ 500 ຄົນ ໃນມາລາວີ, ໂມຊຳບິກ ແລະ ມາດາກັສກາ.

ພາຍຸເຟດດີ ເລີ່ມກໍ່ໂຕຕັ້ງແຕ່ວັນທີ 4 ກຸມພາ 2023 ຈົນຮອດວັນທີ 15 ມີນາ 2023, ພາຍຸໄຊໂຄລນ ເຟດດີ ກໍຍັງບໍ່ສະລາຍໂຕທັງທີ່ເຄື່ອນຂຶ້ນຝັ່ງຈາກທະວີບອາຟຣິກາໄປແລ້ວເຮັດໃຫ້ພາຍຸລູກດັ່ງກ່າວຂຶ້ນຊື່ໄດ້ວ່າເປັນພາຍຸທີ່ມີອາຍຸດົນນານທີ່ສຸດ ດົນນານກວ່າພາຍຸ ເຮີລິເຄນ ຈອນ ໃນປີ 1994 ທີ່ໃຊ້ເວລາຕັ້ງແຕ່ເລີ່ມກໍ່ໂຕຈົນສະລາຍໄປລວມ 31 ມື້.

ລົມພາຍຸດັ່ງກ່າວໄດ້ພັດເຂົ້າໃກ້ອິນໂດເນເຊຍ (ທະວີບອາຊີ) ແລະ ໃຊ້ເວລາຫຼາຍກວ່າໜຶ່ງອາທິດເພື່ອເຄື່ອນຂ້າມມະຫາສະໝຸດອິນເດຍໄປສູ່ພາກໃຕ້ຂອງອາຟຣິກາ. ເຫດການ​ນີ້​ເຮັດ​ໃຫ້​ເກີດ​ໄພ​ນ້ຳ​ຖ້ວມ​ຢ່າງ​ຮ້າຍ​ແຮງ​ ແລະ ​ດິນ​ເຈື່ອນ​ຢູ່​ພາກ​ໃຕ້​ຂອງ​ມາ​ລາ​ວີ ແລະ ພາກເໜືອຂອງໂມຊໍາບິກ ​ແລະ​ ໄດ້​ກັບ​ຄືນ​ໄປ​ໂຈມ​ຕີ​ທັງ​ສອງ​ປະ​ເທດ​ເປັນ​ເທື່ອ​ທີ​ສອງ​ພາຍ​ໃນ​ບໍ່​ເຖິງ​ເດືອນ ​ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ກວ່າ 500 ຄົນ.

ທັງນີ້​ເພື່ອ​ຊ່ວຍ​ເຫຼືອ​ໃນການ​ຄົ້ນຫາ ແລະ ພະຍາຍາມກູ້ໄພ ເຮືອ​ບິນ ແລະ ເຮືອຫຼາຍລຳຈາກຕ່າງຊາດ ຖືກສົ່ງມາປະເທດມາລາວີ ໂດຍເຮືອກູ້ໄພຊຸດທຳອິດ ຈະເດີນທາງຈາກ​ປະ​ເທດ​ແຊມ​ເບຍ ​ແລະ​ ສະ​ວິດ​ເຊີ​ແລນ ນອກຈາກນີ້, ສະຫະລັດ ແລະ ອາຟຣິກາໃຕ້ ກະກຽມເພື່ອສົ່ງເຮືອບິນ ແລະ ເຮືອມາຊ່ວຍສົມທົບອີກດ້ວຍ.