ວັນທີ 16 ມີນາ 2023 ນີ້ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ໄດ້ຖະແຫຼຂ່າວ ຕໍ່ສື່ມວນຊົນກ່ຽວກັບການ ຈັດງານບຸນປີໃໝ່ລາວ ປະຈຳປີ ພສ 2566 ຄສ 2023 ທີ່ນະຄອນ ຫຼວງພະບາງ ທ່ານກ່າວວ່າ: ການຈັດງານບຸນປີໃໝ່ລາວ ທີ່ນະຄອນ ຫຼວງພະບາງ ປີນີ້ ຈະໄດ້ຈັດໃນລັກຊະນະເຕັມຮູບແບບ ພາຍຫຼັງບໍ່ໄດ້ຈັດສາມປີທີ່ຜ່ານມາ ຍ້ອນສະພາບຄວມຫຍຸ້ງຍາກ ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ປັດຈຸບັນຄະນະຮັບຜິດຊອບແຕ່ລະພາກສ່ວນ ໄດ້ການກະກຽມໃຫ້ແກ່ການຈັດງານບຸນ ຕາມໜ້າວຽກທີ່ຕົນຮັບຜິດຊອບ, ສຳລັບລາຍການເຄື່ອນໄຫວບຸນ ຄະນະຮັບຜິດຊອບ ໄດ້ກຳນົດເອົາແຕ່ວັນທີ 11-20 ເມສາ 2023 ໃນນັ້ນ:
-ວັນທີ 11-12 ເມສາ 2023 ຕອນຄໍ່າ, ມີງານປະກວດນາງສັງຂານ -ວັນທີ 13 ເມສາ ຕອນເຊົ້າ ມີພິທີແຫ່ຊ້າງຮຽງເກີຍຈາກວັດໃໝ່ສຸວັນນະພູມາຣາມ ຫາ ວັດຊຽງທອງ, -ວັນທີ 14 ເມສາ ຕອນເຊົ້າມີການໂລະລາດ ຫຼື ລົງຕະຫຼາດນັດແບບມວນຊົນ ແຕ່ສີ່ແຍກບ້ານປ່າຂາມ ຫາ ສາມແຍກພະແຍກ ພະແນກໂຍທາທິການ ແລະ ຂົນສົ່ງ, ຈາກນັ້ນ ມີພິທີອາລາດທະນາອັງເຊີນພະພຸດທະຮູບ ລົງຫົດສົງຢູ່ຕາມວັດແຕ່ລະແຫ່ງ, ຕອນບ່າຍ ລົງຕົບພະທາດຊາຍທີ່ດອນຊາຍມຸງຄຸນ ເມືອງຈອມເພັດ ໄຫວ້ພະ-ເຫດສະຫຼອງຕາມຮີດຄອງປະເພນີ -ວັນທີ 15 ເມສາ ຕອນເຊົ້າ ມີງານບຸນເຜົ່າລື້ ບ້ານຜານົມ, ຕອນບ່າຍມີ ຂະບວນແຫ່ຫວໍ ຕາມເສັ້ນທາງສີສະຫວ່າງວົງ ແຕ່ວັດທາດນ້ອຍ ຫາ ວັດຊຽງທອງ -ວັນທີ 16 ເມສາ ຕອນເຊົ້າ ການນຳພັກ-ລັດ, ປະຊາຊົນບັນດາເຜົ່າຮ່ວມກັນໃສ່ບາດຢູ່ໜ້າວັດແສນສຸຂາຣາມ, ຂຶ້ນບູຊາພະທາດຈອມສີ (ພະທາດສັກສິດມິ່ງບ້ານຂວັນເມືອງຂອງຊາວຫຼວງພະບາງ) ເພື່ອເປັນສິລິມຸງຄຸນ, ຕອນບ່າຍ ມີຂະບວນແຫ່ຫວໍ ຕາມເສັ້ນທາງສີສະຫວ່າງວົງ ແຕ່ວັດຊຽງທອງ ຫາ ວັດທາດນ້ອຍ, ຕອນຄໍ່າ, ມີພິທີແຫ່ຮູບຈຳລອງພະຍານາກ, ໂຄມໄຟ ແຕ່ພະທາດຈອມສີ ລົງມາເຂົ້າສູ່ໜອງໃນຫໍພິພິດທະະພັນ, ຮັບຊົມການສະແດງຢູ່ໜ້າຫໍພະບາງ
-ວັນທີ 17 ເມສາ ຕອນເຊົ້າ, ມີພິທີອາລາດທະນາອັງເຊີນພະບາງ ຈາກຫໍພະບາງ ລົງປະດິດສະຖານຢູ່ວັດໃໝ່ສຸວັນນະພູມມາລາມ ແລະຈັດຕັ້ງພິທີຫົດສົງ ຈົນເຖີງວັນທີ່ 20 ເມສ ຈື່ງຈະມີພິທີອາລາດທະນາອັງເຊີນພະບາງ ກັບຄືນປະດິດສະຖານຢູ່ຫໍພະບາງຕາມເດີມ. ໂອກາດນີ້ ທ່ານໄດ້ຮຽກຮ້ອງໃຫ້ນັກທ່ອງທ່ຽວທັງພາຍໃນ ແລະຕ່າງປະເທດ ພ້ອມກັນກຽມຄວາມພ້ອມ ເພື່ອມາທ່ຽວຊົມຫຼວງພະບາງ ຮັບຮອງວ່າເມື່ອທ່ານໄດ້ມາທ່ອງທ່ຽວ ຈະມີຄວາມປະທັບໃຈຢ່າງບໍ່ມີວັນລືມ.
ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ໃຫ້ຮູ້ຕື່ມວ່າ: ບຸນປີໃໝ່ລາວ ເປັນປາງບຸນໃຫຍ່ຂອງປວງຊົນລາວທັງຊາດ ສະເພາະຢູ່ນະຄອນ ຫຼວງພະບາງ ຈະມີກິດຈະກຳທີ່ຫຼາກຫຼາຍ ແລະມີເອກະລັກສະເພາະ ທີ່ໄດ້ສືບທອດກັນມາຫຼາຍເຊັ່ນຄົນ ເຊີ່ງທຸກກິດຈະກຳແມ່ນຊ່ອງແສງໃຫ້ເຫັນເຖີງວັດທະນະທຳ ແລະຮີດຄອງປະເພນີທີ່ເປັນເອກະລັກສະເພາະ ເຮັດໃຫ້ນັກທ່ອງທ່ຽວທັງພາຍໃນ ແລະຕ່າງປະເທດ ໄດ້ມີຄວາມປະທັບໃຈເມື່ອໄດ້ມີທ່ອງທ່ຽວ ແລະສຳພັດຕົວຈີງ.
ທີ່ມາ: ວິທະຍຸກະຈາຍສຽງແຂວງຫຼວງພະບາງ