ຊາວຝຣັ່ງໄອເດຍດີ ຄິດຄົ້ນຢາສະກັດຈາກທຳມະຊາດ ຊ່ວຍປ່ຽນກິ່ນຕົດໃຫ້ກາຍເປັນກິ່ນຫອມຂອງດອກໄມ້ ຫລື
ກິ່ນຊ໊ອກໂກແລັດ.
ສຳນັກຂ່າວຕ່າງປະເທດລາຍງານ ໃນວັນທີ 27 ພະຈິກນີ້ວ່າ ທ່ານ ຄຣິສຕີຍັອງ ປົວເຊີວານ (Christian Pointcheval)
ຊາຍຊາວຝຣັ່ງ ອາຍຸ 65 ປີ ໄດ້ພັດທະນາສູດຢາຫລຸດກົດໃນກະເພາະອາຫານ ທີ່ຊ່ວຍປ່ຽນກິ່ນຕົດໃຫ້ອັນບໍ່ເພິ່ງປະສົງ
ໃຫ້ກາຍເປັນກິ່ນຫອມ ໂດຍໄດ້ຮັບແຮງບັນດານໃຈຈາກເຫດການທີ່ເຂົາກຳລັງຮັບປະທານອາຫານກັບໝູ່ເພື່ອນ ແຕ່
ຢູ່ດີໆກໍມີໝູ່ຄົນໜຶ່ງຕົດອອກມາໂດຍບໍ່ໄດ້ຕັ້ງໃຈ ໂດຍເຂົາໄດ້ບອກວ່າ ກິ່ນຕົດໃນຄັ້ງນັ້ນເໝັນມະຫຶມາ ຈົນເຂົາເກືອບ
ຈະຫາຍໃຈບໍ່ອອກ.
ຫລັງຈາກນັ້ນເຂົາຈິ່ງໄດ້ພະຍາຍາມຫາທາງແກ້ປັນຫາ ຈົນສາມາດຄິດຄົ້ນຢາ ທີ່ຊ່ວຍໃຫ້ທຸກຄົນສາມາດຕົດໄດ້ແບບ
ບໍ່ຕ້ອງເຂີນອາຍຕໍ່ໄປອີກ ເຊິ່ງຢາຫລຸດກົດນີ້ ສະກັດຂຶ້ນຈາກສ່ວນປະສົມຂອງທຳມະຊາດຫລາຍຊະນິດ ເຊິ່ງຈະຊ່ວຍ
ເຮັດໃຫ້ກິ່ນຕົດກາຍເປັນກິ່ນດອກໄມ້ ຫລື ກິ່ນຊ໊ອກໂກແລັດ ແລະ ຍັງມີສັບພະຄຸນຊ່ວຍຍ່ອຍ ຫລື ຫລຸດແກ໊ສໃນກະ
ເພາະອາຫານ ລວມເຖິງແກ້ທ້ອງອືດໄດ້ອີກດ້ວຍ.
ປັດຈຸບັນເຂົາໄດ້ວາງຈຳໜ່າຍຜ່ານເວັບໄຊ້ສ່ວນຕົວ ທາງ www.pilulepet.com ເຊິ່ງໃນຕອນທຳອິດນີ້ ແມ່ນມີພຽງ
ກິ່ນດອກກຸຫລາບ ແລະ ດອກໄວໂອເລ໊ດ ໂດຍເຂົາສາມາດຂາຍໄດ້ແບບເທນ້ຳເທທ່າ ເຮັດໃຫ້ລ່າສຸດເຂົາໄດ້ເພີ່ມກິ່ນ
ຊ໊ອກໂກແລັດເຂົ້າໄປອີກກິ່ນໜຶ່ງ ເພື່ອວາງຈຳໜ່າຍໃນໄລຍະເທສະການຄຣິສມາສນີ້.