ໃນວັນທີ 14 ມີນາ 2023, ປກສ ກຸ່ມບ້ານໂດນ ໄດ້ສົມທົບກັບການຈັດຕັ້ງບ້ານທ່າກອກ ແລະບ້ານທຸ່ນລົວ ຈັດພິທີສຶກສາອົບຮົມເປົ້າໝາຍມົ້ວສຸມຢາເສບຕິດ ( ຢາບ້າ ) ຈໍານວນ 12 ຄົນ ທີ່ວັດບ້ານທ່າກອກ ເມືອງປາກງື່ມ ນະຄອນຫຼວງວຽງຈັນ.
ໃນພິທີ ພັຕ ສຸລິວົງ ແດນເຊກອງ ຮອງຫົວໜ້າ ປກສ ກຸ່ມບ້ານໂດນ ກ່າວວ່າ: ໃນການສຶກສາອົບຮົມເປົ້າໝາຍຄັ້ງນີ້ ແມ່ນເປົ້າໝາຍປະເພດ I ເປັນເປົ້າໝາຍມົ້ວສຸມຢາເສບຕິດ, ເຊິ່ງປະຕິບັດຕາມວຽກງານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍສົມທົບກັບການຈັດຕັ້ງບ້ານທັງ 2 ບ້ານ, ໃນການສຶກສາອົບຮົມ ແມ່ນໄດ້ຍົກໃຫ້ເຫັນຜົນຮ້າຍ ແລະໄພອັນຕະລາຍຂອງຢາເສບຕິດ ທີ່ມີຜົນກະທົບຮ້າຍແຮງຕໍ່ຊີວິດ, ຊັບສິນ, ສັງຄົມ ແລະ ເປັນການກະທໍາທີ່ຜິດລະເມີດລະບຽບກົດໝາຍ ເຮັດໃຫ້ເຂົາເຈົ້າເຂົ້າໃຈ ແລະຮູ້ສຶກກິນແໜງແຄງໃຈ ຕໍ່ການກະທໍາທີ່ບໍ່ຖືກຕ້ອງ ແລະໃຫ້ຢຸດເຊົາ, ບໍ່ໄປພົວພັນ ຫຼື ກັບຄືນມາເສບໃໝ່.
ພັຕ ສຸລິວົງ ແດນເຊກອງ ໄດ້ຝາກຮຽກຮ້ອງມາຍັງຜູ້ປົກຄອງ ແລະ ບັນດາເປົ້າໝາຍ ທີ່ຍັງບໍ່ທັນໄດ້ເຂົ້່າຮ່ວມການສຶກສາອົບຮົມ ໃຫ້ມີຄວາມຕື່ນຕົວສະໝັກໃຈ ເຂົ້າມາຮັບຟັງການບັນຍາຍຜົນຮ້າຍ ແລະ ໄພອັນຕະລາຍຂອງຢາເສບຕິດ; ເຊິ່ງມີຜົນກະທົບຕໍ່ຜູ້ເສບ ແລະ ບຸກຄົນອ້ອມຂ້າງຢ່າງຊັດເຈນ ເພື່ອເຮັດໃຫ້ເປົ້າໝາຍຢຸດເຊົາ, ບໍ່ກັບໄປພົວພັນກັບສິ່ງເສບຕິດ ແລະກາຍເປັນຄົນດີຂອງສັງຄົມ.
ແຫຼ່ງຂ່າວ ປ້ອງກັນຄວາມສະຫງົບນະຄອນຫຼວງວຽງຈັນ