ສາລະພັນບັນຫານັບເປັນນ້ຳແຈ່ວຂອງຊີວິດໃຫ້ເຮົາໄດ້ຕໍ່ສູ້ດິ້ນຮົນ ແຕ່ຮູ້ຫລືບໍ່ວ່າ ຍິ່ງຄຽດຫລາຍກໍຍິ່ງ ຕຸ້ຍຫລາຍ ເພາະຫລາຍຄົນອາດເຂົ້າໃຈວ່າ ຄຽດ? ຈົນກິນບໍ່ໄດ້ນອນບໍ່ຫລັບ ແລ້ວຄວາມຄຽດຈະເຮັດໃຫ້ ຕຸ້ຍ ໄດ້ແນວໃດ ມາເບິ່ງກັນເລີຍ
ທັກທາຍຄວາມຄຽດ
ໃນແຕ່ລະມື້ ເຮົາທຸກຄົນຕ້ອງປະເຊີນໜ້າກັບຄວາມຄຽດ ເຊິ່ງຈະຄຽດຈາກງານ ຈາກລູກ ຫລືບັນຫາອື່ນໆ ກໍນັບວ່າເປັນຄວາມຄຽດຢ່າງໜຶ່ງ ທີ່ຊ່ວຍກະຕຸ້ນໃຫ້ມີຄວາມມຸງໝັ້ນທີ່ຈະຜ່າອຸປະສັກຕ່າງໆ ແຕ່ຖ້າວ່າ ຄວາມຄຽດລະດັບນ້ອຍໆເຫລົ່ານີ້ ເດີນໜ້າມາຢ່າງສະໝໍ່າສະເໝີ ແລະ ກໍບໍ່ສາມາດຫາທາງແກ້ໄຂໄດ້ ຄວາມຄຽດນີ້ແຫລະທີ່ຈະກໍ່ບັນຫາດ້ານສຸກຂະພາບຕາມມາຕິດໆ ບໍ່ວ່າຈະເປັນເລື່ອງຂອງສຸຂະພາບຈິດໃຈ ສົ່ງຜົນຕໍ່ຫົວໃຈ ພູມຕ້ານທານຕ່ຳ ຫລື ແມ່ນແຕ່ລົບກວນຄວາມຮູ້ສຶກຢາກຫາອາຫານ ເຊິ່ງບາງຄົນເມື່ອຮູ້ສຶກຄຽດກໍຈະບໍ່ຍອມກິນຫຍັງເລີຍ ໃນຂະນະທີ່ບາງຄົນຈະສັນຫາສາລະພັດຂອງກິນມາກິນແກ້ຄຽດ
ສະຫມອງສັ່ງຕຸ້ຍໄດ້
ເມື່ອເກີດຄວາມຄຽດ ທຸກສິ່ງທຸກຢ່າງຈະຖືກກັກຕຸນໄວ້ທີ່ສະຫມອງ ໂດຍສະຫມອງທີ່ສະຫລາດຈະສົ່ງສັນຍານໄປທີ່ຕ່ອມ ແອດລິນາລີນ ເຊິ່ງຢູ່ກາຍບໍລິເວນຫມາກໄຂ່ຫລັງໃຫ້ຫລັ່ງຮໍໂມນຄວາມຄຽດຊະນິດໜຶ່ງອອກມາ ນັ້ນຄື ‘ຄໍຕິໂຊລ’ ທີ່ຈະສົ່ງສັນຍານບອກຈຸຸລັງໄຂມັນໃນບໍລິເວນທ້ອງໃຫ້ສ້າງໄຂມັນສະສົມເພີ່ມຂຶ້ນເພື່ອເປັນທີ່ເກັບພະລັງງານ ເມື່ອຖືກກະຕຸ້ນໃຫ້ເກີດຄວາມຮູ້ສຶກຂອງການຕໍ່ສູ້ ຫລື ເປັນກົນໄກໃນການປົກປ້ອງຕົນເອງ ຄືກັບການຍົກຕູ້ເຢັນໜີໄຟໄໝ້ ແຕ່ທັງນີ້ທັງນັ້ນ ສະຫມອງຂອງເຮົາບໍ່ສາມາດແຍກຄວາມແຕກຕ່າງລະຫວ່າງຄວາມຄຽດທີ່ເກີດຈາກການເອົາໂຕລອດ ແລະຄວາມຄຽດທີ່ເກີດຂຶ້ນໃນທຸກໆມື້ ເຊິ່ງຈະເຮັດໃຫ້ຮ່າງກາຍຮູ້ສຶກຢາກອາຫານໂດຍສະເພາະອາຫານທີ່ເນັ້ນແຄລໍລີ ແລະ ໄຂມັນ ຈົນໃນທີ່ສຸດຄວາມຄຽດກໍຈະສະສົມໄຂມັນຫລາຍກວ່າຄົນປົກກະຕິ ຫລື ຄົົນທີ່ມີອາລົມດີ
ນອກຈາກນີ້ ຮໍໂມນ ຄໍຕິໂຊນ ຍັງສາມາດເຂົ້າໄປກະຕຸ້ນໃຫ້ປະລິມານຂອງ ອິນຊູລິນ ແລະ ເລບຕິນ ເພີ່ມຂຶ້ນ ໂດຍ ອິນຊູລິນ ຄື ຮໍໂມນທີ່ຖືກຂັບອອກມາໃນຕັບອ່ອນ ເຊິ່ງຈະສົ່ງຜົນໃຫ້ຮູ້ສຶກຢາກອາຫານຢູ່ຕະຫລອດເວລາ ໃນຂະນະທີ່ ເລບຕິນ ເຊິ່ງເປັນຮໍໂມນທີ່ຈະຄອຍຖ້າບອກກັບສະຫມອງວ່າ ເມື່ອໃດຈຶ່ງຄວນຢຸດຄວາມຢາກອາຫານ ເມື່ອໃດຈະເລັ່ງອັດຕາການເຜົາຜານອາຫານ ແລະ ເມື່ອໃດຮ່າງກາຍຕ້ອງເຜົາຜານໄຂມັນທີ່ສະສົມໄວ້ ແຕ່ເມື່ອຄວາມຄຽດກະຕຸ້ນໃຫ້ຮູ້ສຶກຢາກອາຫານໄຂມັນສູງ ຮ່າງກາຍ ກໍຈະຢຸດຕອບໂຕ້ ເລບຕິນ ເຊິ່ງເຮັດໃຫ້ລະບົບສັ່ງການແປປວນ ຈຶ່ງສົ່ງຜົນໃຫ້ມີແນວໂນ້ມວ່າ ຈະກິນບໍ່ຢັ້ງ ໂດຍສະເພາະຊາຍຍິງໃນໄວກາງຄົນ
ຫລຸດຄຽດ ຫລຸດຮູບຮ່າງ
ເມື່ອຄວາມຄຽດຄືໜຶ່ງໃນໂຕການແຫ່ງຄວາມຢາກອາຫານ ດັ່ງນັ້ນ ການເຮັດຈິດໃຈໃຫ້ແຈ່ມໃສ ເຊັ່ນ ເບິ່ງຮູບເງົາ ຟັງເພງ ອາດເປັນທາງອອກທີ່ດີເພື່ອປິ່ນປົວຮູບຮ່າງໃຫ້ງາມ ແຕ່ວິທີທີ່ດີສຸດໆ ເພື່ອຫລຸດຄວາມຄຽດແຖມດ້ວຍຮູບຮ່າງງາມກໍຄື ປ້ອງກັນການຫລັ່ງຂອງຮໍໂມນແຫ່ງຄວາມຄຽດດ້ວຍການອອກກຳລັງກາຍ ເພາະໄລຍະເວລາທີ່ອອກກຳລັງກາຍ ຮ່າງກາຍຈະຜະລິດສານເອັນໂດນຟິນ ເຊິ່ງຈະຊ່ວຍສະກັດການຫລັ່ງ ຮໍໂມນຄໍຕິໂຊນ ໂດຍການອອກກຳລັງກາຍນັ້ນ ກໍຄວນເປັນໄປໃນລັກສະນະຂອງການເຮັດເປັນປະຈຳ ຄືຢ່າງນ້ອຍອາທິດລະ 3 ເທື່ອ ເທື່ອລະປະມານ 30 40 ນາທີ
ນອກຈາກນີ້ ການຮັບປະທານອາຫານທີ່ມີປະໂຫຍດ ແລະ ເພີ່ມພູນຄວາມສຸກດ້ວຍ ຖົ່ວ ກ້ວຍ ນົມສົດ ກໍເປັນອີກວິທີທີ່ຄວນເຮັດຄວບຄູ່ໄປກັບການປັບອາລົມໃຫ້ເຂົ້າໃຈເຖິງສິ່ງເຮັດໃຫ້ຄຽດ ເພາະຖ້າເຮົາສາມາດແກ້ໄຂຈຸດທີ່ກໍ່ໃຫ້ເກີດຄວາມຄຽດໄດ້ ເຊິ່ງນັ້ນໝາຍເຖິງວ່າ ຄວາມຄຽດບໍ່ແມ່ນບັນຫາໃຫຍ່ ແລະ ຮູບຮ່າງງົດງາມ ກໍຈະຢູ່ກັບເຮົາຕະຫລອດໄປ