ທະຫານລາວ ແລະ ຣັດເຊຍ ໄດ້ເກັບກູ້ລະເບີດບໍ່ທັນແຕກ 158 ໜ່ວຍ ຈາກເນື້ອທີ່ 29,2 ເຮັກຕາ ເມືອງນາກາຍ ແຂວງຄໍາມ່ວນ ພາຍຫຼັງທີ່ໄດ້ດໍາເນີນມາເປັນເວລາ 1 ເດືອນ ພາຍໃຕ້ ການຮ່ວມມືຂອງທັງສອງກອງທັບ.
ການສໍາຫຼວດ ແລະ ເກັບກູ້ ເປັນສ່ວນໜຶ່ງຂອງແຜນການທີ່ຈັດຕັ້ງປະຕິບັດຂຶ້ນໂດຍກະຊວງປ້ອງກັນປະເທດລາວ ແລະ ກະຊວງປ້ອງກັນປະເທດຣັດເຊຍ ແລະ ໄດ້ລົງພື້ນທີ່ບໍລິເວນ ອະນຸສາວະລີເຈົ້າເພັດສະລາດ, ໂຮງຮຽນມັດທະຍົມນາກາຍ ແລະ ສະໜາມຂະຫຍາຍຜັງເມືອງໃໝ່ ແລະ ໄດ້ຖືກປະກາດວ່າເປັນເຂດປາສະຈາກ ລະເບີດບໍ່ທັນແຕກ ໃນທີ່ສຸດ.
ພັນເອກ ບຸນສົດ ອິນສີນາ ຮອງຫົວໜ້າກົມຊ່າງແສງ ກົມໃຫຍ່ເສນາທິການກອງທັບ ໄດ້ລາຍງານໃຫ້ລາຍລະອຽດວ່າ: ການກວດສະໜາມອະນຸສອນເຈົ້າເພັດສະລາດເນື້ອທີ່ 22.583 ຕາແມັດ ລະເບີດທີ່ກວດພົບ ລູກປືນຄົກ 60 ມມ 1 ລູກ, ເສດສະເກັດ 520 ຊິ້ນສ່ວນ ແລະ ເຫຼັກເສດທົ່ວໄປ 14.258 ຊິ້ນສ່ວນ, ກວດສະໜາມໂຮງຮຽນມັດທະຍົມຕົ້ນນາກາຍເນື້ອທີ່ 16.315 ຕາແມັດ ລະເບີດທີ່ກວດພົບ: blu 26: 4 ໜ່ວຍ, blu 3b: 1 ໜ່ວຍ, ເສດສະເກັດ 215 ຊິ້ນສ່ວນ ແລະ ເຫຼັກເສດທົ່ວໄປ 250 ຊິ້ນສ່ວນ, ກວດສະໜາມເສັ້ນທາງໂຮງຮຽນ ມັດທະຍົມຕົ້ນ ຫາມັດທະຍົມ ປາຍນາກາຍ ເນື້ອທີ່ 3,112 ຕາແມັດ ລະເບີດທີ່ກວດພົບ blu 26: 1 ໜ່ວຍ, blu 3b: 1 ໜ່ວຍ, ເສດສະເກັດ 125 ຊິ້ນສ່ວນ ແລະ ເຫຼັກເສດທົ່ວໄປ 270 ຊິ້ນສ່ວນ, ທໍາລາຍລະເບີດສຸກເສີນຕາມການແຈ້ງຂອງປະຊາຊົນ 2 ຄັ້ງ: ລະເບີດ: BLU 26: 1 ໜ່ວຍ ແລະ BLU3: 1 ໜ່ວຍ, ການຈັດຕັ້ງປະຕິບັດການກວດກູ້ລະເບີດ ຂອງກໍາລັງ ເພື່ອນ ຣັດເຊຍ 17 ມັງກອນ 2023 – 22 ກຸມພາ 2023 ການກວດກູ້ສະໜາມຂະຫຍາຍຜັງເມືອງໃໝ່ ກວດກູ້ເນື້ອທີ່ໄດ້ 107.781 ຕາແມັດລະເບີດທີ່ກວດພົບ: ລູກປືນຄົກ 60 ມມ: 1 ລູກ, ລູກຈະຫຼວດ 2,75 ນິ້ວ: 13 ລູກ, ລູກຈະຫຼວດ 57 ມມ: 2 ລູກ, ເສດສະເກັດ: 4570 ຊິ້ນສ່ວນ ແລະ ເສດເຫຼັກທົ່ວໄປ: 9,150 ຊິ້ນສ່ວນ, ລວມເນື້ອທີ່ທັງໝົດຝ່າຍລາວ ແລະ ຮັດ ເຊຍ ກວດໄດ້: 29,2 ເຮັກຕາ, ລວມລະເບີດທັງຫມົດ: 158 ໜ່ວຍ ແລະ ໄດ້ກວດກາຄຸນນະພາບຮ່ວມກັບເພື່ອນຣັດເຊຍ ໃນ 3 ສະໜາມສໍາເລັດ ແລະ ຮັບປະກັນ 100% ໂຄງການເກັບກູ້ລະເບີດບໍ່ທັນແຕກຂອງກອງທັບຣັດເຊຍໃນລາວ ເລີ່ມຕົ້ນຕັ້ງແຕ່ ປີ 2018 ຢູ່ທີ່ແຂວງບໍລິຄໍາໄຊ ແລະ ແຂວງຊຽງຂວາງ ມາຮອດປັດຈຸບັນ ມີພື້ນທີ່ປູກຝັງ ແລະ ພື້ນທີ່ ອື່ນໆ ຫຼາຍຮ້ອຍເຮັກຕາ ໄດ້ຮັບການຟື້ນຟູໃຫ້ກັບມາເປັນປົກກະຕິ ແລະ ໄດ້ທໍາລາຍອຸປະກອນທີ່ຍັງບໍ່ລະເບີດ ຫຼາຍກວ່າ 3.000 ຢ່າງ.
ນອກນີ້ທີມເກັບກູ້ລະເບີດຂອງຣັດເຊຍ ຍັງໄດ້ເປີດຫ້ອງຮຽນພິເສດໃຫ້ແກ່ປະຊາຊົນໃນຊຸມຊົນທ້ອງຖິ່ນ ເພື່ອສອນເຂົາເຈົ້າວ່າຈະເຮັດແນວໃດ ຖ້າພວກເຂົາພົບເຫັນລະເບີດທີ່ຍັງບໍ່ທັນແຕກ.
ແຫຼ່ງຂ່າວ ວຽງຈັນທາຍ