ໃນວັນທີ 19 ກຸມພາ 2023 ໜ່ວຍກູ້ໄພຊ່ວຍເຫຼືອຄອບຄົວໃນເມືອງອັນຕາເກຍ ແຂວງຫວັດຮາໄທ ພາກໃຕ້ຂອງຕວັກກີ ພາຍຫຼັງຕິດຢູ່ເສດຊາກເຮືອນທີ່ຖະຫຼົ່ມທັບມາດົນເຖິງ 296 ຊົ່ວໂມງ ຫຼື 12 ມື້.
ຜູ້ເປັນພໍ່ຊື່ ຊາມີ ມູຮຳເໝັດ ອັກຄາ ອາຍຸ 49 ປີ ແລະ ແມ່ຊື່ ຣັກດາ ອາຍຸ 40 ປີ ສອງສາມີພັນລະຍາທີ່ລອດຊີວິດມາໄດ້ຢ່າງປະຕິຫານ ແຕ່ລູກຊາຍອາຍຸ 12 ປີ ໄດ້ເສຍຊີວິດໃນເວລາຕໍ່ມາທີ່ໂຮງໝໍ ເນື່ອງຈາກຂາດອາຫານ-ນ້ຳ ແລະ ໄດ້ຮັບບາດເຈັບຈາກຖືກອາຄານຖະຫຼົ່ມທັບຫຼາຍຊົ່ວໂມງ.
ໂດຍທາງເຈົ້າໜ້າທີ່ກູ້ໄພເປີດເຜີຍວ່າ ພົບທາ້ວມູຮຳເໝັດ ກັບ ພັນລະຍາຂອງລາວ ແລະ ລູກຊາຍໃນວັນເສົາ ທີ 18 ກຸມພາ ເວລາ 11:30 ໂມງ ຕາມເວລາທ້ອງຖິ່ນ.
ຫຼັງຈາກທີ່ຂຸດເອົາໂຕອອກມາໄດ້ກໍຮີບນຳສົ່ງໂຮງໝໍ ແຕ່ຜູ້ເປັນລູກຊາຍມີອາການອ່ອນເພຍຫຼາຍ ແລ້ວເສຍຊີວິດໃນເວລາຕໍ່ມາ ພ້ອມນັ້ນກໍຍັງພົບຮ່າງເດັກນ້ອຍອີກ 2 ຄົນ ທີ່ເສຍຊີວິດຢູ່ເສດອາຄານເຮືອນຫຼັງດຽວກັນ ທີ່ເປັນລູກຂອງມູຮຳເໝັດ.
