ໂຄງການກໍ່ສ້າງສະໜາມບິນອັດຕະປື ພາຍຫຼັງທີ່ໄດ້ເລີ່ມລົງມືປະຕິບັດມາແຕ່ໃນເດືອນພຶດສະພາປີແລ້ວນີ້ ມາຮອດ
ປະຈຸບັນໜ້າວຽກໂດຍລວມມີຄວາມຄືບໜ້າໄວກວ່າແຜນເກືອບ 10% ໂຄງການນີ້ຈະເປັນໃບໜ້າໃໝ່ໃຫ້ອັດຕະປືມີ
ສະໜາມບິນທີ່ສາມາດ ຮອງຮັບສາຍການບິນທັງພາຍໃນ ແລະ ຕ່າງປະເທດໄດ້ນັບຈາກປີ 2015.
ທ່ານ ໂກແມັກ ແກ້ວຈຳປາ ຫົວໜ້າໂຄງການກໍ່ສ້າງສະໜາມບິນອັດຕະປືໃຫ້ຮູ້ວ່າ: ໂຄງການກໍ່ສ້າງສະໜາມບິນອັດ
ຕະປືມີມູນຄ່າການກໍ່ສ້າງທັງໝົດ 289 ຕື້ກວ່າກີບ ຫຼື ປະມານ 36,19 ລ້ານໂດລາສະຫະລັດ ຊຶ່ງເລີ່ມຈັດຕັ້ງປະຕິບັດມາ
ແຕ່ວັນທີ 10 ພຶດສະພາ 2013 ມາຮອດປະຈຸບັນວຽກການກໍ່ສ້າງສາມາດຈັດຕັ້ງປະຕິບັດໄດ້ທັງໝົດ 78,19%, ລື່ນ
ແຜນການ 9,10% ອີງຕາມສັນຍາໂຄງການຈະໃຫ້ສຳເລັດໃນເດືອນພຶດສະພາ 2015.
ໂຄງການກໍ່ສ້າງສະໜາມບິນອັດຕະປື ແມ່ນໂຄງການໜຶ່ງຂອງລັດຖະບານ ເພື່ອຮອງຮັບເຮືອບິນທັງພາຍໃນ ແລະ
ຕ່າງປະເທດ ທັງເປັນການຊຸກຍູ້ສົ່ງເສີມການພັດທະນາເສດຖະກິດ ແລະ ການທ່ອງທ່ຽວຂອງແຂວງອັດຕະປືກໍຄື
ຂອບເຂດທົ່ວປະເທດ ໂດຍສະເພາະແມ່ນການຂົນສົ່ງທາງອາກາດ ທັງນີ້ໃນໄລຍະຍາວແມ່ນເພື່ອຜັນຂະຫຍາຍແຜນ
ພັດທະນາເສດຖະກິດ- ສັງຄົມຂອງລັດຖະບານ ແຕ່ປີ 2010-2020 ຕາມທິດນະໂຍບາຍຫັນ ສປປ ລາວ ຈາກປະເທດ
ທີ່ບໍ່ມີຊາຍແດນຕິດກັບທະເລ ມາເປັນປະເທດບໍລິການທາງຜ່ານ ເພື່ອນຳພາປະເທດຊາດຫຼຸດພົ້ນອອກຈາກປະເທດ
ດ້ອຍພັດທະນາໃນປີ 2020.
ສະໜາມບິນອັດຕະປືກໍ່ເຊັ່ນດຽວກັນກັບຫຼາຍສະໜາມບິນໃຫຍ່ຂອງປະເທດເຮົາ ທີ່ສ້າງໃຫ້ໄດ້ມາດຕະຖານຂອງກົມ
ການບິນພົນລະເຮືອນ ( MOS2009 ) ແລະ ມາດຕະຖານສາກົນ (ICAO) ວາງອອກກໍຄືສະໜາມບິນປະເພດ 3C ຊຶ່ງ
ສາມາດຮອງຮັບເຮືອບິນຂະໜາດ 70-100 ບ່ອນນັ່ງ ເຊັ່ນ: ເຮືອບິນ ATR72, Fokker 70, MA-60, Fokker-100 ຫຼື
ທຽບເທົ່າ.
ໂຄງການກໍ່ສ້າງສະໜາມບິນແມ່ນມີຫຼາຍໜ້າວຽກທີ່ໄດ້ຮັບການຈັດຕັ້ງປະຕິບັດ ໃນນັ້ນ ມີຄວາມຄືບໜ້າຫຼາຍກວ່າ
ໝູ່ແມ່ນວຽກກໍ່ສ້າງສະໜາມບິນ 23,45%, ກໍ່ສ້າງອາຄານຜູ້ໂດຍສານ 13,90%, ນອກນີ້ ຍັງມີການສ້າງຫໍບັນຊາການ
ບິນ, ສ້າງສະຖານີເກັບມ້ຽນພາຫະນະຮັບໃຊ້ສະໜາມບິນ, ລະບົບນ້ຳໃຊ້, ສ້າງເສັ້ນທາງລານຈອດລົດໂຄງ ສ້າງຕ່າງໆ
ນອກອາຄານສະໜາມບິນ, ກໍ່ສ້າງ-ຕິດຕັ້ງລະບົບໄຟຟ້າ, ທາງເຂົ້າສະໜາມບິນລານຈອດລົດສ້າງເສັ້ນ ທາງອ້ອມສະ
ໜາມບິນລະບົບລະບາຍນ້ຳ, ລະບົບໄຟສະໜາມບິນ, ສະຖານີວິທະຍຸ, ສະຖານີໄຟຟ້າສະໜາມບິນ, ສະຖານີອຸຕຸນິຍົມ,
ຮົ້ວອ້ອມສະໜາມບິນ ແລະ ຕິດຕັ້ງອຸປະກອນຕ່າງໆຮັບໃຊ້ສະໜາມບິນກໍກຳລັງມີຄວາມຄືບໜ້າ ຢ່າງຕໍ່ເນື່ອງ.
ແຫລ່ງຂ່າວ: ເສດຖະກິດ – ສັງຄົມ