ວັນທີ 26 ມັງກອນ 2023 ເຮືອຫ້ວຍຊາຍ ຄວ້າລາງວັນທີ 1 ໃນການແຂ່ງຂັນຊ່ວງເຮືອຊາຍຊີງຂັນເຈົ້າແຂວງບໍ່ແກ້ວ ປະເພດ 30-35 ສີພາຍ ໄລຍະ 800 ແມັດ 4 ປະເທດ ໄທ ຈີນ ລາວ ແລະ ມຽນມາ ໃນເທສະການດອກງິ້ວບານ ຄັ້ງທີ 20 ປະຈຳປີ 2023.

ການແຂ່ງຂັນຄັ້ງນີ້ມີຊ່ວງເຮືອຊາຍປະເພດ 30-35 ສີພາຍ ແລະ ມີ 8 ທີມເຂົ້າຮ່ວມຊີງໄຊຄື: ທີມເມືອງຕົ້ນເຜິ້ງ 1, ທີມ ເມືອງຕົ້ນເຜິ້ງ 2, ທີມ ເມືອງປາກທາ 1, ທີມເມືອງປາກທາ 2, ທີມເມືອງຫ້ວຍຊາຍ, ທີມເມືອງແສນ ປະເທດໄທ ທີມຕົວແທນ ສປ ຈີນ ແລະ ທີມທະນາຄານພັດທະນາລາວ.

ຜ່ານການແຂ່ງຜົນປາກົດວ່າ: ທີມເມືອງຫ້ວຍຊາຍສາມາດຍາດໄດ້ລາງວັນທີ 1 ( ໄດ້ຮັບເງິນສົດ 150 ລ້ານກີບ ພ້ອມຂັນລາງວັນ) ອັນດັບທີ 2 ແມ່ນທີມເມືອງປາກທາ 2 (ໄດ້ຮັບເງິນສົດ 100 ລ້ານກີບ ພ້ອມຂັນລາງວັນ) ແລະ ອັນດັບທີ 3 ໄດ້ແກ່ທີມເມືອງຕົ້ນເຜິ້ງ 1 ໄດ້ເງິນສົດ 50 ລ້ານກີບ ພ້ອມຂັນລາງວັນ ສ່ວນທີມທີ່ຕົກຮອບຈະໄດ້ຮັບລາງວັນຊົມເຊີຍທີມລະ15 ລ້ານກີບມີທັງໝົດ 5 ທີມ.

ສຳລັບເທສະການດອກງິ້ວບານ ຄັ້ງທີ 20 ປະຈຳປີ 2023 ຈັດຂຶ້ນວັນທີ 26 ມັງກອນ 2023 ທີ່ທ່ານໍ້າດອນຊາວ (ເຂດເສດຖະພິເສດສາມຫຼຽມຄຳ) ເມືອງຕົ້ນເຜິ້ງ ແຂວງບໍ່ແກ້ວ ມີທ່ານ ຄຳແຍງ ຄອນໄຊຍະກິດ ເຈົ້າເມືອງຕົ້ນເຜິ້ງ ທ່ານ ບຸນທອງ ແສງສີກອງ ພ້ອມດ້ວຍຂະແໜງການກ່ຽວຂ້ອງ ແລະ ມວນຊົນເຂົ້າຮ່ວມ.