ວັນທີ 9 ມັງກອນ 2023 ເວລາ 11:30 ນາທີ ໄດ້ເກີດເຫດໂຈນລັກຊັບຢູ່ຮ້ານບຸນເຕັມວັດຖຸມີຄ່າ ເຊິ່ງລວມມູນຄ່າເສຍຫາຍກວ່າ 3.25 ຕື້ກີບ.
ທາງຮ້ານບຸນເຕັມວັດຖຸມີຄ່າ ໄດ້ອອກມາໂພສຜ່ານທາງເພຈໃນເຟສບຸກ ເລົ່າເຫດການຂອງໂຈນທີ່ມາລັກຊັບນັ້ນ ໂດຍເບື້ອງຕົ້ນ ໂຈນໄດ້ມີການມາເບິ່ງໃນຮ້ານຫຼາຍຄັ້ງ ແລະ ສອບຖາມຂໍ້ມູນຂອງສິນຄ້າຈົນຮູ້ວ່າສິນຄ້າໃດລາຄາສູງທີ່ສຸດ ຕໍ່ມາ ໃນມື້ກໍ່ເຫດກໍໄດ້ມາອີກຄັ້ງໜຶ່ງ ແລ້ວລົງມືລັກຊັບ ແລະ ແລ່ນໜີໄປພ້ອມກັບປືນທີ່ຢູ່ໃນມື.
ເຊິ່ງທາງທີ່ໂຈນໜີອອກໄປ ກໍມີຍາມເຝົ້າຢູ່ ແຕ່ໂຈນໄດ້ຈົກປືນອອກມາຂູ່ ແລະ ໜີໄປໄດ້.
ໃນຊັບສິນທີ່ເສຍຫາຍນັ້ນ ປະກອບມີ ແຫວນເພັດ 5 ກະລັດ ມູນຄ່າ 1,7ຕື້ ແລະ ປະຫຼັກແຂນລວມ 4.2 ກະລັດ ມູນຄ່າ 1,55 ຕື້ກີບ.
ທັ້ງນີ້ ຮ້ານບຸນເຕັມວັດຖຸມີຄ່າ ຍັງໄດ້ມີລາງວັນໃຫ້ ສຳຫຼັບຜູ້ໃດທີ່ສາມາດໃຫ້ຂໍ້ມູນເບາະແສຂອງຜູ້ຮ້າຍຈົນນຳຈັບໄດ້ສຳເລັດ ທາງຮ້ານມີລາງວັນນຳຈັບໃຫ້ 200 ລ້ານກີບ.
ມາຮອດວັນທີ 10 ມັງກອນ ທາງຮ້ານກໍໄດ້ຂໍ້ມູນຂອງໂຈນເພີ່ມເຕີມຄື ໄດ້ມີຜູ້ທີ່ເຄາະຮ້າຍເຄີຍຖືກຄົນດຽວກັນນີ້ປຸ້ນຈີ້ອີກຫຼາຍກໍລະນີ ເຊິ່ງຖ້າແມ່ນຜູ້ຖືກສົງໄສຄົນນີ້ຖືກຕ້ອງ ຜູ້ກ່ຽວໄດ້ກໍເຫດປຸ້ນຈີ້ລັກຊັບມາຫຼາຍກວ່າ 10 ຄະດີ ເຂົ້າຄຸກມາ 2 ຄັ້ງ ແຕ່ກໍຍັງອອກມາກະທຳຜິດຊ້ຳອີກ.
ທາງຮ້ານ ຍັງໄດ້ເລົ່າຕື່ອີກວ່າ ເດືອນຕຸລາທີ່ຜ່ານມາກໍໄດ້ເອົາປືນຈີ້ປຸ້ນຮ້ານຄຳ ສີດາລາດຊະວົງ ແຕ່ກໍຍັງບໍ່ສາມາດນຳຈັບໄດ້.
