ລັດຖະມົນຕີ 3 ກະຊວງ ຂອງໄທ ພ້ອມໜ້າຕ້ອນຮັບນັກທ່ອງທ່ຽວຈີນເຂົ້າປະເທດຢ່າງອົບອຸ່ນ.
ອີງຕາມການລາຍງານຂອງ ກະຊວງສາທາລະນະສຸກ ປະເທດໄທ ໃຫ້ຮູ້ວ່າ: ໃນຕອນບ່າຍ ຂອງມື້ນີ້ (9/01/2023), ທ່ານ ອຸທິນ ຊານນິລະກຸນ ຮອງນາຍົກລັດຖະມົນຕິ ແລະ ລັດຖະມົນຕີກະຊວງສາທາລະນະສຸກ, ທ່ານ ສັກສະຫຍາມ ຊິດຊອບ ລັດຖະມົນຕີ ກະຊວງຄົມມະນາຄົມ, ທ່ານ ພິພັດ ລັດຊະກິດປະການ ລັດຖະມົນຕີ ກະຊວງການທ່ອງທ່ຽວ ແລະ ກິລາ ຕ້ອນຮັບນັກທ່ອງທ່ຽວຈາກ ສປ ຈີນ ເຊິ່ງມາຈາກເມືອງ ເຊຍເໝີນ ຈຳນວນ 269 ຄົນ.
ນອກຈາກນີ້, ທັງສາມທ່ານ ຍັງໄດ້ກວດກາເບິ່ງຄວາມພ້ອມກ່ຽວກັບມາດຕະການຮັບຮອງນັກທ່ອງທ່ຽວ ພ້ອມທັງແຈ້ງວ່າ ໄທມີຄວາມພ້ອມ ທັງຄວາມປອດໄພ ແລະ ລະບົບສາທາລະນະສຸກຕາມມາດຕະການຂອງການສະກັດກັ້ນ ແລະ ປ້ອງກັນພະຍາດໂຄວິດ-19 ເພື່ອອຳນວຍຄວາມສະດວກແກ່ນັກທ່ອງທ່ຽວ.
ພ້ອມກັນນັ້ນ, ຍັງໄດ້ປະກາດໃຫ້ຍົກເລີກການກວດເອກະສານ ຫຼື ບັດສັກວັກຊີນໂຄວິດ-19 ຄົບ 2 ເຂັມ ຂອງນັກທ່ອງທ່ຽວທີ່ເດີນທາງເຂົ້າປະເທດ ທັງນີ້ກໍເພື່ອຫຼຸດຜ່ອນຄວາມຫຍຸ້ງຍາກຂອງເຈົ້າໜ້າທີ່ ແລະ ນັກທ່ອງທ່ຽວເອງ ໃນການເຂົ້າປະເທດ ທີ່ ສະໜາມບິນສຸວັນນະພູມ.