ຖືໄດ້ວ່າເປັນກະແສໃນຕອນນີ້, ເມື່ອ ທ່ານ ຮຸນເຊັນ ນາຍົກລັດຖະມົນຕີ ກຳປູເຈຍ ໂພສຕຳນິຫຼານຊາຍທີ່ມີເມຍນ້ອຍ ພ້ອມຍື່ນຄຳຂາດຖ້າບໍ່ເລີກຈະຖືກປົດອອກຈາກຕຳແໜ່ງ ເຮັດໃຫ້ຊາວເນັດເຂົ້າໄປສະແດງຄວາມຄິດເຫັນກັນຢ່າງຫຼວງຫຼາຍ.
ເວັບໄຊ້ຂ່າວ ຂະແມ ທາມ (Khmer Times) ລາຍງານວ່າ: ເມື່ອອາທິດທີ່ຜ່ານມາ ນາຍົກ ຮຸນເຊັນ ໂພສລົງໃນເຟສບຸກທາງການຂອງຕົນເອງ ພ້ອມຕັ້ງຄຳຖາມເຖິງກໍລະນີທີ່ຫຼາຍຊາຍ ພົນໂທ ຮຸນເຈຍ ລົງຮູບຄູ່ກັບຜູ້ຍິງຄົນໜຶ່ງ ທີ່ບໍ່ແມ່ນພັນລະຍາຂອງຕົນເອງ.
ໂດຍໂພສດັ່ງກ່າວມີຂໍ້ຄວາມລະບຸວ່າ: “ເຈົ້າແຕ່ງງານແລ້ວ ແລະ ຍັງບໍ່ໄດ້ຍ່າກັນ ແຕ່ເຈົ້າມາໂພສຮູບຄູ່ກັບຜູ້ຍິງຄົນອື່ນ ຖ້າຍັງຢູ່ກັບຜູ້ຍິງຄົນນີ້ອີກຕໍ່ໄປ ຂ້ອຍຈະປົດເຈົ້າອອກຈາກຕຳແໜ່ງ”
ຫຼ້າສຸດ, ໃນວັນທີ 3 ມັງກອນ 2022 ທ່ານ ຮຸນເຊັນ ໄດ້ໂພສຮູບລົງເຟສສ່ວນຕົວຂອງຕົນອີກຄັ້ງ ພ້ອມຂໍ້ຄວາມລະບຸວ່າ: ຕອນແລງໃຊ້ເວລາສອງຊົ່ວໂມງໃນການຝຶກຊ້ອມກິລາກັອບ ເຊິ່ງປີໃໝ່ບໍ່ໄດ້ພັກຜ່ອນເພາະມີວຽກຫຼາຍ ສຳລັບ ຮຸນເຈຍ ກັບບ້ານພ້ອມພັນລະຍາ ແລະ ລູກ ແລ້ວ, ຂ້ອຍມີຄວາມສຸກຫຼາຍຂຶ້ນທີ່ເຈົ້າຮູ້ວິທີແກ້ປັນຫາຮ່ວມກັນກັບຄອບຄົວໄດ້ເປັນຢ່າງດີ.
ຢ່າງໃດກໍຕາມ, ທ່ານ ຮຸນເຊັນ ໄດ້ອ້າງວ່າທີ່ຕ້ອງເຂົ້າມາຍຸ້ງກ່ຽວເລື່ອງສ່ວນຕົວຂອງຫຼານຊາຍກໍເພາະວ່າ: ບໍ່ຢາກໃຫ້ຫຼານຊາຍກໍ່ເລື່ອງ ແລະ ສ້າງຄວາມເສື່ອມເສຍໃຫ້ກັບວົງຕະກູນ.