ຫຼັງຈາກລັດຖະບານກຳນົດເອົາວັນທີ 17-30 ພະຈິກ 2014 ເປັນວັນສັກຢາກັນພະຍາດໝາກແດງນ້ອຍ ແລະ ໝາກແດງ
ໃຫຍ່ໃນຂອບເຂດທົ່ວປະເທດຢູ່ແຂວງຫົວພັນກໍຂຸ້ນຂ້ຽວເລັ່ງ ສັກວັກຊິນກັນພະຍາດດັ່ງກ່າວໃຫ້ໄດ້ 70 ພັນກວ່າຄົນ.
ທ່ານ ດຣ. ນາງ ພວງສີ ພົມມະວັນ ຫົວໜ້າຂະແໜງແມ່ ແລະ ເດັກ ແຂວງຫົວພັນໃຫ້ສຳພາດກັບນັກຂ່າວສັງຄົມຜ່ານ
ທາງໂທລະສັບວ່າ: ເພື່ອໃຫ້ບັນລຸຕາມເປົ້າໝາຍຂອງລັດຖະບານວາງໄວ້ ໂດຍໃຫ້ອັດຕາການສັກຢາກັນພະຍາດໝາກ
ແດງກັບເດັກທີ່ມີເກນອາຍຸ ລະຫວ່າງ 9 ເດືອນ-10 ປີ ບັນລຸ 95% ທາງແຂວງຫົວພັນກໍຄືຄະນະກຳມະການສຸຂະພາບແມ່
ແລະ ເດັກ (ຄມດ) ໄດ້ເອົາໃສ່ປະຕິບັດໜ້າວຽກຂອງຕົນໃຫ້ໄດ້ຕາມແຜນພັດທະນາ ເສດຖະກິດ-ສັງຄົມ ໂດຍເລັ່ງລົງໄປ
ສັກວັກຊິນກັນພະຍາດໝາກແດງນ້ອຍ ແລະ ໝາກແດງໃຫຍ່ຢູ່ເຂດທີ່ຫ່າງໄກສອກຫຼີກກ່ອນຄາດວ່າຢູ່ແຂວງຫົວພັນ
ຈະ ສັກວັກຊິນດັ່ງກ່າວໃຫ້ ໄດ້ 71.274 ຄົນ ໃນ 10 ເມືອງ ແລະ ໃຫ້ສຳເລັດກ່ອນວັນທີ 30 ພະຈິກນີ້.
ທ່ານ ດຣ. ນາງ ພວງສີ ພົມມະວັນ ໃຫ້ຮູອີກວ່າ: ການທີ່ຈະເຂົ້າເຖິງກຸ່ມຄົນທີ່ອາໄສຢູ່ເຂດຫ່າງໄກສອກຫຼອກກໍຄື ຊົນນະ
ບົດໄດ້ມັນບໍ່ແມ່ນເລື່ອງງ່າຍ ແລະ ອີກຢ່າງຄົນທີ່ຢູ່ອາໄສຢູ່ສະຖານທີ່ແຫ່ງຕ່າງໆນັ້ນລ້ວນແຕ່ເປັນ ຊົນເຜົ່າຈະຕ້ອງອາ
ໄສທີມງານ ຄມດ ສຸຂະສຶກສາຊົນເຜົ່າໄປອະທິບາຍເຖິງຜົນຮ້າຍຂອງພະຍາດໝາກແດງນີ້ ໃຫ້ເຂົາເຈົ້າເຂົ້າໃຈ ແລະ ນຳ
ເອົາລູກຫຼານໃນເກນອາຍຸ 9 ເດືອນ-ລຸ່ມ 10 ປີ ໄປຮັບວັກຊິນກັນພະຍາດໝາກແດງນ້ອຍ ແລະ ໝາກແດງໃຫຍ່.
ເປົ້າໝາຍກໍເພື່ອເຮັດໃຫ້ສຸຂະພາບຂອງແມ່ຍິງ ແລະ ເດັກນ້ອຍ ປອດໄພຈາກການຕິດພະຍາດທີ່ສາມາດກັນໄດ້ ດ້ວຍ
ວັກຊິນ ສະນັ້ນ ຈິ່ງຮຽກຮ້ອງໃຫ້ພໍ່ແມ່ຜູ້ປົກຄອງຕື່ນຕົວ ແລະ ໃຫ້ຄວາມຮ່ວມມືໂດຍນຳພາລູກຫຼານເຂົ້າຮ່ວມ ສັກຢາ
ກັນພະຍາດດັ່ງກ່າວ.
ແຫລ່ງຂ່າວ: ເສດຖະກິດ – ສັງຄົມ