ທັບນັກກິລາແຂວງຊຽງຂວາງ ເຈົ້າພາບ ສ້າງຜົນງານໄດ້ຢ່າງໂດດເດັ່ນເກີນຄາດໝາຍ ດ້ວຍການປະກາດ ສັກດາຄອງເຈົ້າຫຼຽນຄຳ ງານມະຫະກຳກິລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ທີ່ແຂວງຊຽງຂວາງ ເປັນເຈົ້າພາບ ຫຼັງນັກກິລາບານສົ່ງໃນຮົ່ມປະເພດທີມຊາຍ ຄວ້າຫຼຽນຄຳປິດທ້າຍໃຫ້ກັບເຈົ້າພາບ ຊ່ວຍໃຫ້ກວາດ ມາໄດ້ເຖິງ 62 ຫຼຽນຄຳ, 60 ຫຼຽນເງິນ ແລະ 95 ຫຼຽນທອງ ລວມ 217 ຫຼຽນ ເປັນອັນດັບ 1 ຂອງຕາຕະລາງ. ຂະນະທີ່ກະຊວງປ້ອງກັນປະເທດ ແຊ໋ມເກົ່າ ຍາດໄດ້ 51 ຫຼຽນຄຳ, 49 ຫຼຽນເງິນ ແລະ 36 ຫຼຽນທອງ ລວມ 136 ຫຼຽນ ຈົບພຽງອັນດັບທີ 3 ໃນປີນີ້. ສ່ວນທັບນັກກິລາ ນະຄອນຫຼວງວຽງຈັນ ຕ້ອງຜິດຫວັງອີກຄັ້ງໃນການທ່ວງ ຕຳແໜ່ງເຈົ້າຫຼຽນຄຳກິລາແຫ່ງຊາດ ຫຼັງຍາດມາໄດ້ພຽງ 58 ຫຼຽນຄຳ, 51 ຫຼຽນເງິນ ແລະ 97 ຫຼຽນທອງ ລວມ 206 ຫຼຽນ ຈົບອັນດັບທີ 2 ອີກສະໄໝ.
ສຳລັບງານມະຫະກໍາກິລາແຫ່ງຊາດ ຄັ້ງທີ 11 ແມ່ນແຂ່ງຂັນທັງໝົດ 25 ປະເພດກິລາ ຄື: ຍິງປືນ, ລອຍນໍ້າ, ບານບ້ວງ, ເທຄວັນໂດ, ໝາກແລ້, ຍິງທະນູ, ໜ້າເກັກ, ແລ່ນ-ລານ, ມວຍສາກົນ, ໝາກເສິກ, ປັນຈັກສີລັດ, ມວຍປໍ້າ, ຄາຣາເຕໂດ, ກະຕໍ້-ຊິນລອນ, ບານເຕະ, ໝາກຂ່າງ, ເປຕັງ, ກັອບ, ດອກປີກໄກ່, ເທັນນິດ, ລົດຖີບ, ປິ່ງປ່ອງ, ມວຍລາວ, ຢູໂດ ແລະ ວູຊູ. ຊຶ່ງມີນັກກິລາ ຈຳນວນ 3.093 ຄົນຈາກ 17 ແຂວງ, 1 ນະຄອນຫຼວງ ແລະ 4 ກະຊວງ ເປັນຕົ້ນ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງພະລັງງານ ແລະ ບໍ່ແຮ່ ແລະ ກະຊວງສາທາລະນະສຸກ ເຂົ້າຮ່ວມຊີງຫຼຽນທັງໝົດ 2.598 ຫຼຽນ. ຊຶ່ງໄດ້ເລີ່ມແຂ່ງຂັນຕົວຈິງມາແຕ່ວັນທີ 14 ພະຈິກ 2022 ຢູ່ນະຄອນຫຼວງວຽງຈັນ ຄື: ກິລາລອຍນ້ຳ ແລະ ກິລາຍິງປືນ. ສ່ວນຢູ່ແຂວງຊຽງຂວາງ ເລີ່ມມາແຕ່ວັນທີ 1-22 ທັນວາ 2022 ຈຶ່ງສຳເລັດ.
ຜ່ານການແຂ່ງຂັນຜົນປະກົດວ່າ ທັບນັກກິລາແຂວງຊຽງຂວາງ ເຈົ້າພາບ ສ້າງຜົນງານໄດ້ຢ່າງໂດດເດັ່ນ ເກີນຄາດໝາຍທີ່ວາງໄວ້ ຍາດມາໄດ້ເຖິງ 62 ຫຼຽນຄຳ, 60 ຫຼຽນເງິນ ແລະ 95 ຫຼຽນທອງ ລວມ 217 ຫຼຽນ ເປັນອັນດັບທີ 1 ຂອງປະເທດ. ສ່ວນອັນດັບທີ 2 ຕົກເປັນຂອງທັບນັກກິລານະຄອນຫຼວງວຽງຈັນ ເຈົ້າພາບ ງານກິລາແຫ່ງຊາດ ຄັ້ງທີ 12 ຍາດໄດ້ 58 ຫຼຽນຄຳ, 51 ຫຼຽນເງິນ ແລະ 97 ຫຼຽນທອງ ລວມ 206 ຫຼຽນ; ອັນດັບທີ 3 ກະຊວງປ້ອງກັນປະເທດ ແຊ໋ມເກົ່າ ຍາດໄດ້ 51 ຫຼຽນຄຳ, 49 ຫຼຽນເງິນ 36 ຫຼຽນທອງ ລວມ 136 ຫຼຽນ; ອັນດັບທີ 4 ແຂວງຄຳມ່ວນ 36 ຫຼຽນຄຳ, 26 ຫຼຽນເງິນ ແລະ 47 ຫຼຽນທອງ ລວມ 109 ຫຼຽນ; ອັນດັບທີ 5 ແຂວງສະຫວັນນະເຂດ 24 ຫຼຽນຄຳ, 32 ຫຼຽນເງິນ ແລະ 37 ຫຼຽນທອງ ລວມ 93 ຫຼຽນ; ອັນດັບທີ 6 ກະຊວງປ້ອງກັນຄວາມສະຫງົບ ຍາດໄດ້ 23 ຫຼຽນຄຳ, 17 ຫຼຽນເງິນ ແລະ 29 ຫຼຽນທອງ ລວມ 69 ຫຼຽນ; ອັນດັບທີ 7 ແຂວງຈຳປາສັກ ຍາດໄດ້ 17 ຫຼຽນຄຳ, 21 ຫຼຽນເງິນ ແລະ 31 ຫຼຽນທອງ ລວມ 69 ຫຼຽນ; ອັນດັບທີ 8 ແຂວງອຸດົມໄຊ ຍາດໄດ້ 15 ຫຼຽນຄຳ, 6 ຫຼຽນເງິນ ແລະ 11 ຫຼຽນທອງ ລວມ 32 ຫຼຽນ; ອັນດັບທີ 9 ແຂວງສາລະວັນ ຍາໄດ້ 13 ຫຼຽນຄຳ, 13 ຫຼຽນເງິນ ແລະ 10 ຫຼຽນທອງ ລວມ 36 ຫຼຽນ; ອັນດັບທີ 10 ແຂວງຫຼວງພະບາງ ຍາດໄດ້ 12 ຫຼຽນຄຳ, 21 ຫຼຽນເງິນ ແລະ 42 ຫຼຽນທອງ ລວມ 75 ຫຼຽນ; ອັນດັບທີ 11 ແຂວງໄຊສົມບູນ ຍາດໄດ້ 8 ຫຼຽນຄຳ, 4 ຫຼຽນເງິນ ແລະ 2 ຫຼຽນທອງ ລວມ 14 ຫຼຽນ; ອັນດັບທີ 12 ແຂວງວຽງຈັນ ຍາດໄດ້ 7 ຫຼຽນຄຳ, 6 ຫຼຽນເງິນ ແລະ 26 ຫຼຽນທອງ ລວມ 39 ຫຼຽນ; ອັນດັບທີ 13 ແຂວງບໍລິຄຳໄຊ ຍາດໄດ້ 6 ຫຼຽນຄຳ, 2 ຫຼຽນເງິນ ແລະ 12 ຫຼຽນທອງ ລວມ 20 ຫຼຽນ; ອັນດັບທີ 14 ແຂວງຫົວພັນ ຍາດໄດ້ 5 ຫຼຽນຄຳ, 8 ຫຼຽນເງິນ ແລະ 7 ຫຼຽນທອງ ລວມ 20 ຫຼຽນ; ອັນດັບທີ 15 ແຂວງເຊກອງ ຍາດໄດ້ 4 ຫຼຽນຄຳ, 9 ຫຼຽນເງິນ ແລະ 13 ຫຼຽນທອງ ລວມ 26 ຫຼຽນ; ອັນດັບທີ 16 ແຂວງອັດຕະປື ຍາດໄດ້ 4 ຫຼຽນຄຳ, 4 ຫຼຽນເງິນ ແລະ 4 ຫຼຽນທອງ ລວມ 12 ຫຼຽນ; ອັນດັບທີ 17 ກະຊວງພະລັງງານ ແລະ ບໍ່ແຮ່ ຍາດໄດ້ 3 ຫຼຽນຄຳ, 12 ຫຼຽນເງິນ ແລະ 10 ຫຼຽນທອງ ລວມ 25 ຫຼຽນ; ອັນດັບທີ 18 ແຂວງບໍ່ແກ້ວ ຍາດໄດ້ 3 ຫຼຽນຄຳ, 7 ຫຼຽນເງິນ ແລະ 13 ຫຼຽນທອງ ລວມ 23 ຫຼຽນ; ອັບດັບທີ 19 ແຂວງຜົ້ງສາລີ ຍາດໄດ້ 3 ຫຼຽນຄຳ, 4 ຫຼຽນເງິນ ແລະ 1 ຫຼຽນທອງ ລວມ 8 ຫຼຽນ; ອັນດັບທີ 20 ແຂວງຫຼວງນ້ຳທາ ຍາດໄດ້ 3 ຫຼຽນຄຳ, 3 ຫຼຽນເງິນ ແລະ 8 ຫຼຽນທອງ ລວມ 14 ຫຼຽນ; ອັນດັບທີ 21 ກະຊວງສາທາລະນະສຸກ ຍາດໄດ້ 2 ຫຼຽນຄຳ, 5 ຫຼຽນເງິນ ແລະ 3 ຫຼຽນທອງ ລວມ 10 ຫຼຽນ; ອັນດັບທີ 22 ແຂວງໄຊຍະບູລີ ຍາດໄດ້ 2 ຫຼຽນຄຳ, 1 ຫຼຽນເງິນ ແລະ 7 ຫຼຽນທອງ ລວມ 10 ຫຼຽນ.
ຂ່າວໂດຍ: ລູກນ້ຳເຊ ອິນທະດາລິນ