ໃນວັນທີ 1 ທັນວາ ທີ່ຜ່ານມານີ້, ສານປະຊາຊົນແຂວງວຽງຈັນ ໄດ້ຕັດສິນຄະດີຈຳເລີຍ ຈຳນວນ 4 ຄົນໃນຄະດີຢາເສບຕິດ ໃນນີ້ 3 ຈຳເລີຍ ຖືກຕັດສິນປະຫານຊີວິດ, ອີກ 1 ຈຳເລີຍແມ່ນຕັດສິນຈຳຄຸກ ພ້ອມທັງປັບໃໝ.
3 ຈຳເລີຍ ປະກອບມີ: ທ້າວ ຮືລໍ່ ອາຍຸ 21 ປີ ອາຊີບ ຊາວນາ ຢູ່ບ້ານຫຼັກ 52 ເມືອງໂພນໂຮງ, ທ້າວ ສີຫວ່າງໄຊ ອາຍຸ 27 ປີ ອາຊີບ ຊາວນາ, ຢູ່ບ້ານ ນາມອນເໜືອ ເມືອງວັງວຽງ ແຂວງວຽງຈັນ, ທ້າວ ລົງມົວ ອາຍຸ 26 ປີ ອາຊີບກໍາມະກອນ ຢູ່ບ້ານດອນໄຊ ເມືອງໄຊ ແຂວງອຸດົມໄຊ.
ຈໍາເລີຍທັງ 3 ຄົນ ຖືກກັກຕົວໃນຄັ້ງວັນທີ 7 ພະຈິກ 2019 ໃນຂໍ້ກ່າວຫາຄ້າ-ຂາຍຢາເສບຕິດ ແລະ ມີຂອງກາງຢາເສບຕິດປະເພດ ຢາບ້າ ຈຳນວນ 102.000 ເມັດ ສານປະຊາຊົນ ແຂວງວຽງຈັນ ຕັດສິນລົງໂທດຕັດອິດສະຫຼະ ພາບ ຈຳເລີຍທັງ 3 ຄົນ ປະຫານຊີວິດ.
ອີກ 1 ຈຳເລີຍ ຊື່: ທ້າວ ກື່, ອາຍຸ 27 ປີ, ອາຊີບ ຊາວນາ, ຢູ່ບ້ານ ສົມສະໜຸກ ເມືອງຫິນຫີບ ແຂວງວຽງຈັນ ຖືກກັກຕົວໃນວັນທີ 18 ພະຈິກ 2020 ໃນຂໍ້ກ່າວຫາຄ້າ-ຂາຍຢາເສບຕິດ ຂອງກາງຢາເສບຕິດປະເພດຢາບ້າ ຈໍານວນ 85 ເມັດ, ສານປະຊາຊົນແຂວງວຽງຈັນ ຕັດສິນລົງໂທດຕັດອິດສະຫຼະ ພາບ 5 ປີ ປັບໃໝ 10.000.000 ກີບ.
Cr. ຄວາມສະຫງົບ Lao Security News