ປະທານາທິບໍດີອາຟຣິກາໃຕ້ Cyril Ramaposa ກໍາລັງປະເຊີນບັນຫາທາງດ້ານການເມືອງແລະຖືກກົດດັນໃຫ້ລາອອກ. ຫຼັງ​ຈາກ​ຖືກ​ກ່າວ​ຫາ​ວ່າ​ໄດ້​ເຊື່ອງ​ເງິນ​ຫຼາຍ​ລ້ານ​ໂດ​ລາ​ຢູ່​ທີ່​ບ້ານ​ໄຮ່​ລ່າ​ສັດ​ຂອງຕົນ.

ນັບໄດ້ວ່າເປັນເລື່ອງທີ່ສັ່ນ​ສະ​ເທືອ​ນຕຳແໜ່ງຂອງ​ທ່ານ Ramaposa ​ໄວ 70 ປີ ​ທີ່ໄດ້​ເຂົ້າ​ມາ​ດຳ​ເນີນ​ງານ​ໃນ​ປະ​ເທດ​ດ້ວຍ​ພາບລັກ “ປາບປາມການສໍ້ລາດບັງຫຼວງ” ຖືກເປີດເຜີຍເມື່ອເດືອນມິຖຸນາທີ່ຜ່ານມາ. ໂດຍທ່ານ Arthur Fraser ອະດີດຫົວໜ້າສຳນັກງານຄວາມໝັ້ນຄົງແຫ່ງລັດ ຮ້ອງຮຽນຕໍ່ທ່ານ Ramaphosa ໃນຂໍ້ຫາປິດບັງການອາດຊະຍາກຳ ແລະ ສໍ້ລາດບັງຫຼວງ. ເຊິ່ງທ່ານ Fraser ອ້າງວ່າລາວມີຫຼັກຖານວ່າໃນວັນທີ 9 ກຸມພາ 2020, ໄດ້ມີເຫດການການລັກເງິນສົດ 4 ລ້ານໂດລາສະຫະລັດຈາກຟາມລ່າສັດ ພາລາ ພາລາ ຂອງປະທານາທິບໍດີ Cyril Ramaposa ທີ່ຕັ້ງຢູ່ໃນແຂວງ Limpopo ໃນພາກເຫນືອຂອງອາຟຣິກາໃຕ້.

ທ່ານ Fraser ​ໄດ້​ກ່າວ​ຫາ​ປະທານາທິບໍດີ Ramaposa ວ່າ​ໄດ້​ເຊື່ອງ​ເງິນ​ໄວ້​ໃຕ້​ບ່ອນ​ນັ່ງ​ໂຊຟາ, ຕໍ່ມາເງິນນີ້ຖືກລັກ ແຕ່ທ່ານ Ramaposa ບໍ່ໄດ້ແຈ້ງໃຫ້ຕຳຫຼວດຊາບ. ນອກຈາກ​ນີ້, ພາຍຫຼັງ​ເກີດ​ເຫດຍັງໄດ້ສັ່ງ​ຄົນ​ໃຫ້​ຈັບ​ຕົວ​ຜູ້​ຕ້ອງ​ສົງ​ໄສ ພ້ອມ​ກັບ​ການ​ຈ່າຍ​ສິນ​ບົນ​ເພື່ອ​ປົກປິກບໍ່ໃຫ້ໃຜຮູ້ເລື່ອງນີ້, ຫຼັງ​ຈາກ​ການ​ແຈ້ງຄວາມຂອງທ່ານ Fraser​ ໄດ້ມີການຕັ້ງຄະນະ​ກຳມະການ​ສືບສວນ​ອິດສະລະຂຶ້ນ, ​ໂດຍ​ອະດີດ​ຜູ້​ພິພາກສາ​ສານ​ສູງ​ສຸດ​ເປັນ​ປະທານ. ໃນການສືບສວນຂອງຕົນວ່າ ມີ​ບັນ​ຫາ​ທີ່​ໜ້າ​ສົງ​ໄສ​ທີ່​ປະ​ທາ​ນາ​ທິ​ບໍ​ດີ​ຕ້ອງ​ໃຫ້​ຄວາມ​ກະ​ຈ່າງ​ແຈ້ງ.

ທ່ານ Ramaposa, ຜູ້​ທີ່​ລົງ​ແຂ່ງ​ຂັນ​ເປັນ​ຜູ້ນຳ​ສະພາ​ແຫ່ງ​ຊາດ​ອາ​ຟຣິກາ (ANC) ​ໃນ​ວັນ​ທີ 16 ທັນວາ​ນີ້, ​ໄດ້​ປະຕິ​ເສດ​ຕໍ່​ຂໍ້​ກ່າວ​ຫາ​ດັ່ງກ່າວ. ​ແລະ​ຢືນຢັນ​ວ່າ​ຈະ​ດຳລົງແຂ່ງຂັນຊິງ​ຕຳ​ແໜ່​ງ​ເປັນ​ຜູ້ນຳ​ພັກ​ອີກ​ສະ​ໄໝ​ໜຶ່ງ.

ສຳລັບທ່ານ Ramaposa ເປັນຄົນໃກ້ຊິດຂອງທ່ານ Nelson Mandela, ປະທານາທິບໍດີຄົນຜິວດຳຄົນທຳອິດຂອງອາຟຣິກາໃຕ້ ແລະ ເປັນຜູ້ນຳທີ່ຍິ່ງໃຫຍ່ທີ່ສຸດໃນໂລກ. ນັບຕັ້ງແຕ່ປີ 1970, ທ່ານ Ramaposa ໄດ້ມີບົດບາດສໍາຄັນໃນການຕໍ່ຕ້ານການແບ່ງແຍກເຊື້ອຊາດ.

ໂດຍໄດ້​ຮັບ​ເລືອກ​ຕັ້ງດ້ວຍຄະແນນສຽງຈາກ​ລັດຖະສະພາ​ໃຫ້​ເປັນ​ຜູ້ນຳ​ປະ​ເທດ. ຫຼັງຈາກພັກ ANC ໄດ້ຊະນະການເລືອກຕັ້ງໃນວັນທີ 8 ພຶດສະພາ 2019.