ໃນວັນທີ 3 ທັນວາ 2022 ຜ່ານມາ, ລັດຖະບານລາວໄດ້ຈັດພິທີ ສະຫຼຸບຜົນງານການເປີດນໍາໃຊ້ທາງລົດໄຟລາວ-ຈີນ ຄົບຮອບ 1 ປີ, ທ່ານ ສອນໄຊ ສີພັນດອນ, ຄະນະບໍລິຫານງານສູນກາງພັກປະຊາຊົນປະຕິວັດລາວ, ຮອງນາຍົກລັດຖະມົນຕີລາວໄດ້ກ່າວໃນພິທີດັ່ງກ່າວວ່າ: ເສັ້ນທາງລົດໄຟລາວ-ຈີນ ໄດ້ກາຍເປັນຄວາມພາກພູມໃຈຂອງປະຊາຊົນລາວ ແລະ ປະເທດລາວ.
ນັບແຕ່ເປີດນຳໃຊ້ເສັ້ນທາງລົດໄຟລາວ-ຈີນເປັນເວລາ 1 ປີເປັນຕົ້ນມາ, ໂດຍຜ່ານການດໍາເນີນທຸລະກິດທີ່ມີປະລິມານຫຼາຍ ແລະ ຜ່ານການທົດສອບໜັກໜ່ວງຈາກສະພາບແວດລ້ອມພາຍນອກ, ຈິ່ງໄດ້ສະແດງໃຫ້ເຫັນຄຸນນະພາບການກໍ່ສ້າງ ແລະ ມາດຕະຖານຈີນ, ໄດ້ສະແດງໃຫ້ເຫັນເຖິງປະສິດທິພາບຂອງການຄຸ້ມຄອງທາງລົດໄຟຈີນ.
ການເປີດນໍາໃຊ້ ແລະ ດໍາເນີນທຸລະກິດບໍລິການຂອງທາງລົດໄຟລາວ-ຈີນ, ມັນໄດ້ປ່ຽນໂສມໜ້າໃຫມ່ຂອງການຄົມມະນາຄົມຂົນສົ່ງຂອງ ສປປ ລາວ, ສາມາດບັນລຸຄວາມມຸ່ງມາດປາຖະໜາ ໃນການ “ຫັນຈາກ
ປະເທດທີ່ບໍ່ມີຊາຍແດນຕິດກັບທະເລ ເປັນປະເທດເຊື່ອມຕໍ່” ຂອງລາວ, ໄດ້ເປີດສັງກາດໃໝ່ແຫ່ງການຂົນສົ່ງທາງລົດໄຟລາວ-ຈີນ. ໄລຍະທາງເສັ້ນທາງລົດໄຟສະເລ່ຍຕໍ່ຫົວຄົນຂອງລາວໄດ້ຈາກອັນດັບສຸດທ້າຍຂຶ້ນເປັນອັນດັບ 28 ໃນຈໍານວນ 149 ປະເທດ ໃນໂລກທີ່ມີເສັ້ນທາງລົດໄຟ ແລະ ເປັນອັນດັບ 1 ຂອງອາຊຽນ, ກາຍເປັນຈຸດເຊື່ອມຕໍ່ດ້ານຄົມມະນາຄົມຂົນສົ່ງທີ່ສໍາຄັນຂອງແຫຼມອິນດູຈີນ.
ທ່ານ ສອນໄຊ ສີພັນດອນ ຍັງໄດ້ກ່າວຕື່ມອີກວ່າ: ໃນໄລຍະເວລາ 1 ປີ ທີ່ເປີດນໍາໃຊ້ ແລະ ດໍາເນີນທຸລະກິດຂອງທາງລົດໄຟລາວ-ຈີນ, ມັນເປັນທັງຂອດສໍາຄັນ ທັງເປັນຈຸດເລີ່ມຕົ້ນໃໝ່. ພາກສ່ວນທີ່ກ່ຽວຂ້ອງຂອງລັດຖະບານລາວຈະ ສືບຕໍ່ສະໜັບສະໜູນບັນດາວຽກງານຂອງບໍລິສັດທາງລົດໄຟລາວ-ຈີນ, ເພີ່ມທະວີການຮ່ວມມື, ດໍາເນີນການປົກປັກຮັກສາ, ດໍາເນີນທຸລະກິດ ແລະ ພັດທະນາເສັ້ນທາງລົດໄຟລາວ-ຈີນ ໃຫ້ໄດ້ດີ, ນໍາເອົາຜົນປະໂຫຍດທີ່ແທ້ຈິງ ແລະ ນໍາເອົາຄວາມຮັ່ງມີມາສູ່ປະຊາຊົນສອງປະເທດ, ປະກອບສ່ວນສໍາຄັນໃໝ່ເຂົ້າໃນການສ້າງຄູ່ຮ່ວມຊະຕາກໍາລາວ-ຈີນ!
ໃນພິທີດັ່ງກ່າວ, ບໍລິສັດເສັ້ນທາງລົດໄຟລາວ-ຈີນໄດ້ນຳສະເໜີການບໍລິການໃໝ່ສອງຢ່າງ, ເພື່ອຊ່ວຍຍົກລະດັບການບໍລິການຂົນສົ່ງໂດຍສານ ແລະ ຂົນສົ່ງສິນຄ້າຂອງເສັ້ນທາງລົດໄຟລາວ-ຈີນໃຫ້ສູງກວ່າເກົ່າ. ໃນນັ້ນ, “LCR ticket APP” ສາມາດໂຫຼດໃນຮ້ານandroid, ກວດຫາຂໍ້ມູນສະຖານີລົດໄຟ. ໃນທ້າຍເດືອນທັນວາປີນີ້, ສາມາດໂຫຼດໃນຮ້ານແອເປິນ, ທັງສາມາຊື້ປີ້ຜ່ານທາງອິນເຕີເນັດໄດ້. ການບໍລິການໃໝ່ດ້ານການຂົນສົ່ງສິນຄ້າ ຄື “ປີ້ດຽວສຳລັບການຂົນສົ່ງທາງລົດໄຟແມ່ນ້ຳລ້ານຊ້າງ-ແມ່ນ້ຳຂອງ” ຄືໃຊ້ໃບຂົນສົ່ງທາງລົດໄຟສາກົນ ຫຼື ໃບຂົນສົ່ງແບບປະສົມຫຼາຍຮູບການ, ໃຊ້ຫຼາຍຮູບການເພື່ອຂົນສົ່ງສິນຄ້າຂ້າມຊາດດ້ວຍປີ້ດຽວ, ປະສານງານບັນດາຂອດທີ່ກ່ຽວຂ້ອງກັບການຂົນສົ່ງສິນຄ້າຂອງຂະບວນລົດໄຟສາກົນ, ຊຸກຍູ້ການຂົນສົ່ງສິນຄ້າລະຫວ່າງສອງປະເທດລາວ-ຈີນ.
ຕາມຂ່າວແຈ້ງໃຫ້ຮູ້ວ່າ, ນັບມາຮອດວັນທີ 3 ທັນວາປີ 2022, ເສັ້ນທາງລົດໄຟລາວ-ຈີນໄດ້ຂົນສົ່ງຜູ້ໂດຍສານ 8,5 ລ້ານເທື່ອຄົນ, ຂົນສົ່ງສິນຄ້າ 11,2 ລ້ານໂຕນ, ບົດບາດທີ່ເປັນເສັ້ນທາງຄຳພົ້ນເດັ່ນຂຶ້ນ, ກາຍເປັນຜະລິດຕະພັນສາທາລະນະສາກົນ ແລະ ເວທີຮ່ວມມືສາກົນທີ່ໄດ້ຮັບຄວາມນິຍົມຊົມຊອບຢ່າງຫຼວງຫຼາຍ.
ແຫຼ່ງຂ່າວ: CRI