ທ່ານ ຢຸນ ຊັອກຢອລ ປະທານາທິບໍດີເກົາຫຼີໃຕ້ ອອກມາເຕືອນເກົາຫຼີເໜືອທົດສອບນິວເຄຼຍ ພ້ອມທັງຮຽກຮ້ອງໃຫ້ຈີນຊ່ວຍຫ້າມເກົາຫຼີເໜືອບໍ່ໃຫ້ພັດທະນາອາວຸດນິວເຄຼຍ ລວມເຖິງລູກສອນໄຟທີ່ຖືກສັ່ງຫ້າມພາຍໃຕ້ຂໍ້ມັດຕິຂອງສະຫະປະຊາຊາດ (UN).
ວັນທີ 29 ພະຈິກ 2022 ສຳນັກຂ່າວ ຣອຍເຕີ ໄດ້ລາຍງານວ່າ: ທ່ານ ຢຸນ ໄດ້ຮຽກຮ້ອງໃຫ້ຈີນ ເຊິ່ງເປັນພັນທະມິດກັບເກົາຫຼີເໜືອໃຫ້ດຳເນີນຕາມກົດລະບຽບຂອງ ສະຫະປະຊາຊາດ (UN).
ສິ່ງທີ່ທ່ານ ຢຸນ ໝັ້ນໃຈກໍຄື ຈີນມີຄວາມສາມາດໃນການເວົ້າຊັກຈູງໃຫ້ເກົາຫຼີເໜືອ ແລະ ຈີນມີໜ້າທີ່ຈະຕ້ອງຮັບຜິດຊອບຕໍ່ການມີສ່ວນຮ່ວມກັບຂະບວນການດັ່ງກ່າວ, ດັ່ງນັ້ນ ຈຶ່ງຂຶ້ນກັບຈີນ ທີ່ຈະໃຊ້ອິດທິພົນຂອງຕົນເພື່ອສັນຕິພາບຫຼືບໍ່.
ທ່ານຍັງກ່າວຕື່ມວ່າ ການປະຕິບັດຂອງເກົາຫຼີເໜືອເຮັດໃຫ້ມີການເພີ່ມຄ່າໃຊ້ຈ່າຍດ້ານປ້ອງກັນປະເທດຕ່າງໆ ລວມເຖິງຍີ່ປຸ່ນດ້ວຍ ຍັງນຳໄປສູ່ການທີ່ ອາເມຣິກາ ສົ່ງເຮືອບິນ ລົດ ແລະ ເຮືອ ເຂົ້າມາໃນປະເທດຫຼາຍຂຶ້ນ ດັ່ງນັ້ນມັນຈຶ່ງເປັນຜົນປະໂຫຍດຂອງຈີນເອງ ທີ່ຈະຕ້ອງໃຊ້ຄວາມພະຍາຍາມ ເພື່ອໃຫ້ເກົາຫຼີເໜືອຢຸດໃຊ້ອາວຸດນິວເຄຼຍ.
ທ້າຍນີ້ ທ່ານ ຢຸນ ຊັອກຢອລ ປະທານາທິບໍດີເກົາຫຼີໃຕ້ ກ່າວວ່າ ຈະບໍ່ສະຫຼາດຢ່າງຍິ່ງ ຖ້າເກົາຫຼີເໜືອຍັງຈະທົດສອບນິວເຄຼຍ ຄັ້ງທີ 7.