ເຈົ້າໜ້າທີ່ແຂວງໜອງຄາຍ ປະເທດໄທ ໄດ້ເລັ່ງສືບສວນສອບສວນ ເພື່ອຂະຫຍາຍຜົນເຄືອຂ່າຍຄະດີຢາເສບຕິດ ພາຍຫຼັງຈັບກຸມລົດບັນທຸກນ້ຳມັນຈາກຝັ່ງລາວ ທີ່ຂົນສົ່ງຢາເສບຕິດ 3,8 ລ້ານເມັດ ມີຢາບ້າ ຢາໄອສ ແລະ ຢາອີ ເຂົ້າປະເທດໄທ.
ວັນທີ 27 ພະຈິກ 2022 ເຈົ້າໜ້າທີ່ແຂວງໜອງຄາຍ ກ່າວວ່າ ກໍລະນີວັນທີ 23 ພະຈິກ ທີ່ຜ່ານມາ ທາງເຈົ້າໜ້າທີ່ສູນລະກາກອນໜອງຄາຍ ໄດ້ຈັບ ທ້າວ ປະສິດ ປັນພູມີ (ຄົນຂັບລົດບັນທຸກນ້ຳມັນ) ທີ່ມີຂອງກາງເປັນຢາບ້າ 3,8 ລ້ານເມັດ ໂດຍເຊື່ອງໄວ້ໃນລົດບັນທຸກນ້ຳມັນ ເພື່ອທີ່ຈະນຳເຂົ້າປະເທດໄທ ຜ່ານຂົວມິດຕະພາບລາວ-ໄທ ແຫ່ງທີ 1.
ຈາກການສືບສວນ ທ້າວ ປະສິດ ໄດ້ໃຫ້ສາລະພາບວ່າ: ໄດ້ກະທຳຜິດແທ້ ເຊິ່ງມີໝູ່ຊັກຊວນໃຫ້ເຮັດ ໝູ່ກໍຕິດຄຸກແລ້ວ ມີເມຍເປັນຄົນລາວ ແລະ ເປັນຄົນປະສານໃນການຂົນສົ່ງຢາເສບຕິດເພື່ອນຳເງິນໄປຈ່າຍສ່ວນຕົວ ທັ້ງນີ້ ຍັງຍອມຮັບວ່າຕົນເອງເຮັດຄົນດຽວ ບໍ່ກ່ຽວຂ້ອງກັບບໍລິສັດນ້ຳມັນ ໃນເວລາຂົນສົ່ງຢາເສບຕິດ ກໍໄດ້ແກະ GPS ອອກຈາກລົດຂົນສົ່ງ ເພື່ອບໍ່ໃຫ້ບໍລິສັດຮູ້ພຶດຕິກຳ ແລະ ຕິດຕາມກວດສອບໄດ້.
ແຕ່ວັນທີ 23 ພະຈິກ ທາງຜູ້ຂັບລົດນັ້ນໄດ້ໃຫ້ຄຳສາລະພາບວ່າ: ໄດ້ຮັບຄ່າຈ້າງ 5 ໝື່ນບາດ ຈາກຍິງສາວລາວທີ່ມີຊື່ສຽງໂດ່ງດັງ, ພາຍຫຼັງເອົານໍ້າມັນອອກແລ້ວ ຜູ້ກ່ຽວໄດ້ນັດກັນໄປຮັບເອົາຢາບ້າຢູ່ຂ້າງທາງ ບໍລິເວນເສັ້ນທາງ 450 ປີ.
ຈາກຄຳສາລະພາບດັ່ງກ່າວ ໃນຕອນທຳອິດຜູ້ກ່ຽວວ່າມີຄົນຈ້າງໃຫ້ຂົນສົ່ງ ແຕ່ປັດຈຸບັນ ຜູ້ກ່ຽວແມ່ນຍອມຮັບຜິດແຕ່ຜູ້ດຽວ.
ນອກນີ້ ຜູ້ກ່ຽວໄດ້ລັກລອບຂົນສົ່ງຢາເສບຕິດຕັ້ງແຕ່ປີ 2014 ໂດຍຈະເຮັດວຽກຕາມບໍລິສັດຕ່າງໆ ເພາະອາໄສຄວາມຊຳນານໃນການຂັບລົດບັນທຸກ, ກ່ອນຖືກຈັບ ຜູ້ກ່ຽວໄດ້ເຮັດວຽກໃຫ້ກັບ NTP Trading Petroleum Public Company ມາໄດ້ເກືອບປີ ແລ້ວກໍເລີ່ມແກະ GPS ອອກຈາກລົດຂົນສົ່ງໄດ້ປະມານ 3-4 ເດືອນ ແລະ ເລີ່ມຂົນສົ່ງຢາເສບຕິດ.
ແຫຼ່ງຂ່າວ ໄທໂພສ