ລັດຖະສະພາຂອງຣັດເຊຍ ຮັບຮອງເອົາຮ່າງກົດໝາຍ ຫ້າມສົ່ງເສີມ “ການໂຄສະນາຊວນເຊື່ອຂອງກຸ່ມ LGBTQ” ໃຫ້ກັບເດັກນ້ອຍ.
ສຳນັກຂ່າວ the Moscow Times ຂອງຣັດເຊຍ ໄດ້ລາຍງານວ່າ: ວັນທີ 24 ພະຈິກ 2022 ຣັດເຊຍປະກາດ ຮັບຮອງເອົາຮ່າງກົດໝາຍສະບັບໃໝ່ ທີ່ຜ່ານການພິຈາລະນາວາລະທີ 3 ເຊິ່ງເປັນວາລະສຸດທ້າຍຂອງລັດຖະສະພາຂອງຣັດເຊຍ ວ່າດ້ວຍຫ້າມສົ່ງເສີມການໂຄສະນາຊວນເຊື່ອຂອງກຸ່ມ LGBTQ ເຊິ່ງການຈັດງານໃດໆ ຫຼື ການກະທຳໃດໆ ທີ່ເປັນຄວາມພະຍາຍາມເພື່ອສົ່ງເສີມການຮັກຮ່ວມເພດ ຫຼື ກຸ່ມ LGBTQ ລວມເຖິງການສົ່ງເສີມເລື່ອງນີ້ທາງອອນລາຍ, ໜັງ, ໜັງສື, ການໂຄສະນາ ຫຼື ຢູ່ບ່ອນສາທາລະນະ ຈະຕ້ອງຖືກປັບໄໝຢ່າງໜັກ.
ກົດໝາຍນີ້ ກຳນົດໂທດປັບສູງສຸດ 400,000 ລູເບິນ ຫຼື ປະມານ 114 ລ້ານກວ່າກີບ ສຳລັບບຸກຄົນ ແຕ່ຖ້າເປັນນິຕິບຸກຄົນມີໂທດປັບສູງສຸດ 5 ລ້ານລູເບິນ ຫຼື ປະມານ 1,4 ຕື້ກວ່າກີບ ສຳລັບຄົນຕ່າງປະເທດທີ່ກະທຳລະເມີດກົດໝາຍດັ່ງກ່າວ ຈະຖືກຈຳຄຸກ 15 ມື້ ຫຼັງຈາກນັ້ນຈະຖືກຫ້າມເຂົ້າປະເທດ.
ນັກວິເຄາະເຫັນວ່າ ກົດໝາຍນີ້ເປັນຄວາມພະຍາຍາມທີ່ຈະຂົ່ມຂູ່ໃຫ້ກັບກຸ່ມ LGBTQ ທີ່ເປັນຄົນກຸ່ມນ້ອຍໃນຣັດເຊຍ ພ້ອມທັງຫ້າມເດີນຂະບວນ Gay Pride.
ສະມາຊິກລັດຖະສະພາຂອງຣັດເຊຍລະບຸວ່າ ການຮັບຮອງກົດໝາຍນີ້ ເພື່ອເປັນການປົກປ້ອງສິນລະທຳພາຍໃນຣັດເຊຍ ແລະ ຫຼີກລ່ຽງຄ່ານິຍົມທີ່ເຊື່ອມໂຊມ.
ຢ່າງໃດກໍຕາມ ໃນເດືອນແລ້ວນີ້ ຣັດເຊຍກໍໄດ້ປັບໄໝແອັບ TIKTOK ປະມານ 3 ລ້ານລູເບິນ ຫຼື 856 ລ້ານກວ່າກີບ ຖານສົ່ງເສີມວິດີໂອທີ່ມີເນື້ອຫາກ່ຽວກັບ LGBTQ.