ໃນຕອນເຊົ້າຂອງວັນທີ 19 ພະຈິກ 2022 ຜ່ານມາ, ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ໄດ້ ລົງຕິດຕາມຊຸກຍູ້ເບິ່ງການກໍ່ສ້າງ ເສັ້ນທາງປູເບຕົງລະຫວ່າງສາມແຍກກອງບັນຊາການທະຫານແຂວງຫາທາງລົງວັດປ່າດົງອີໂຊບ້ານໂພນສະອາດ ນະຄອນໄກສອນ ພົມວິຫານ ຮ່ວມຕິດຕາມ ທ່ານເຈົ້ານະຄອນຄັ້ງນີ້ ມີທ່ານ ອະນຸຊາ ໄກສອນ ຫົວໜ້າຫ້ອງການ ໂຍທາທິການ ແລະ ຂົນສົ່ງ ນະຄອນ ,ມີຫ້ອງວ່າການແຂວງ,ທ່ານ ທອງຂັນ ດາລານຸວົງ ຜູ້ອຳນວຍການບໍລິສັດ ມຸກມະນີກໍ່ສ້າງຈຳກັດຜູ້ດຽວ,ໂດຍການຕ້ອນຮັບຂອງທ່ານ ສົມສະໜຸກ ນາຍບ້ານໆບ້ານໂພນສະອາດ ພ້ອມດ້ວຍຄະນະ.
ໂຄງການກໍ່ສ້າງເສັ້ນທາງປູເບຕົງລະຫວ່າງສາມແຍກກອງບັນຊາການທະຫານແຂວງຫາທາງລົງວັດປ່າດົງອີໂຊ ໄດ້ແບ່ງອອກເປັນສອງໄລຍະການກໍ່ສ້າງຄື:ໄລຍະທີ 1, ມີຄວາມຍາວ 600 ແມັດ ,ໜ້າທາງກວ້າງ 06 ແມັດ , ໜາ 18 ຊັງຕີແມັດ, ໂດຍແມ່ນບໍລິສັດ ມຸກມະນີກໍ່ສ້າງ ຈຳກັດຜູ້ດຽວ (ເປັນຜູ້ຮັບເໜົາການກໍ່ສ້າງທາງເບຕົງ)ແລະຈະໃຫ້ໄດ້ມາດຕະຖານເຕັກນິກ ຂອງຫ້ອງການ ຍທຂ ນະຄອນ ໄກສອນ ພົມວິຫານ ເພື່ອໃຫ້ໄດ້ ມີການພັດ ທະນາດ້ານພື້ນຖານ ໂຄງລ່າງຂອງບ້ານເປັນຕົ້ນກໍແມ່ນເສັ້ນທາງທ່ຽວໃຫ້ມີຄວາມສະດວກສະບາຍ, ສຳລັບທຶນຮອນເຂົ້າໃນການກໍ່ສ້າງແມ່ນໄດ້ຈາກຫຼາຍພາກສ່ວນຄື:ໄດ້ຈາກງົບປະມານຂອງແຂວງຟື້ນຟູສ້ອມແປງເສັ້ນທາງຈຳນວນ 1 ຕື້ກວ່າກີບ,ໄດ້ການປະກອບສ່ວນຂອງທ່ານເກຍ ອູ່ສິດທິເດດ ເຈົ້ຂອງໂຮງງານນໍ້າດື່ມນ້ຳກ້ອນປາໂລມາຄຳ ຈຳນວນ 100 ລ້ານກີບ ແລະໄດ້ປຸກລະດົມຂົນຂວາຍນຳພໍ່ແມ່ປະຊາຊົນພາຍໃນບ້ານມີສ່ວນຮ່ວມ ຈຳນວນ 300ລ້ານກີບ.
ໃນໂອກາດທີ່ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ໄດ້ລົງມາຕິດຕາມເບິ່ງການ ກໍ່ສ້າງເສັ້ນທາງປູເບຕົງ ກໍ່ໄດ້ ຍ້ອງຍໍຊົມເຊີຍທຸກພາກສ່ວນທີ່ມີ ຄວາມຕັດສິນໃຈສູງມີຄວາມສາ ມັກຄີໜັກແໜ້ນ ໃນການພັດທະນາ ພ້ອມນັ້ນໃຫ້ອຳນາດການປົກ ຄອງທຸກຂັ້ນຕ້ອງໄດ້ເອົາໃຈໃສ່ ຕໍ່ການນຳພາຈັດຕັ້ງປະຕິບັດ ສ້າງຄວາມເຂົ້າໃຈອັນຖືກຕ້ອງໃຫ້ປະຊາຊົນ ແລະໃນນັ້ນ ທ່ານເຈົ້ານະຄອນ ກ່ໍຍັງໄດ້ເນັ້ນໜັກໃຫ້ບໍລິສັດຜູ້ຮັບເໜົາ ເອົາໃຈໃສ່ເບິ່ງ ຄືນຢ່າງລະອຽດໃນການກໍ່ສ້າງໃຫ້ໄດ້ຮັບປະກັນທົນທານນຳໃຊ້ໄດ້ຢ່າງຍາວນານ.
ແຫຼ່ງຂ່າວ: mediaLAOS