ກອງປະຊຸມລະດົມທຶນ ຄັ້ງທີ 3 ສໍາລັບການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ໃນປີ 2025 ໄດ້ຈັດຂຶ້ນໃນວັນທີ 17 ພະຈິກ 2022 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ທ່ານນາງ ມາລຽມ ເອ ຄານ ຜູ້ຕາງຫນ້າອົງການ UNFPA ປະຈໍາ ສປປ ລາວ ມີພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ເພື່ອລາຍງານຄວາມຄືບໜ້າໃນການກະກຽມການສໍາຫຼວດພົນລະເມືອງ ແລະ ນໍາສະເໜີກ່ຽວກັບວິທີການປະຕິບັດ ແລະ ການນໍາໃຊ້ເຄື່ອງມືເຕັກໂນໂລຊີເຂົ້າໃນການສໍາຫຼວດຄັ້ງນີ້ ແລະ ເພື່ອປຶກສາຫາລືກັບບັນດາຄູ່ຮ່ວມພັດທະນາກ່ຽວກັບຄວາມເປັນໄປໄດ້ໃນການປະກອບສ່ວນທາງດ້ານງົບປະມານ ແລະ ວິຊາການ ມາຮອດປັດຈຸບັນ ສປປ ລາວ ຍັງມີຄວາມຕ້ອງການທຶນຮອນເພື່ອປະກອບສ່ວນເຂົ້າໃຫ້ການຈັດຕັ້ງປະຕິບັດການສໍາຫຼວດຄັ້ງນີ້ໃຫ້ສໍາເລັດຕາມວັດຖຸປະສົງ ແລະ ລະດັບຄາດຫມາຍທີ່ກໍານົດໄວ້.
ທ່ານ ຄໍາເຈນ ວົງໂພສີ ກ່າວວ່າ: ການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ແມ່ນການສໍາຫຼວດໃຫຍ່ລະດັບຊາດໃນທຸກໆ 10 ປີ ເປົ້າໝາຍຂອງການສໍາຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ V 2025 ແມ່ນຈົດນັບທຸກຄົນທີ່ດໍາລົງຊີວິດຢູ່ ສປປ ລາວ ແລະ ມີຫນ້າຢູ່ ເປັນປະຈໍາ 6 ເດືອນຂຶ້ນໄປ (De Jure) ແລະ ເກັບກໍາຂໍ້ມູນທາງດ້ານເສດຖະກິດ-ສັງຄົມຂອງບຸກຄົນ ແລະ ຄົວເຮືອນໃຫ້ຄົບຖ້ວນ ຖືກຕ້ອງ ແລະ ຊັດເຈນ.
ທີ່ຜ່ານມາເຄີຍສໍາຫຼວດ 4 ຄັ້ງ:
ຄັ້ງທີ I ໃນປີ 1985
ຄັ້ງທີ II ໃນປີ 1995
ຄັ້ງທີ III ໃນປີ 2005
ຄັ້ງທີ IV ປີ 2015
ທັ້ງນີ້ ກໍເພື່ອສະໜອງຂໍ້ມູນທີ່ສໍາຄັນກ່ຽວກັບການຂະຫຍາຍຕົວຂອງພົນລະເມືອງ ຄຸນລັກສະນະຂອງພົນລະເມືອງ ໂຄງປະກອບທາງດ້ານເພດ ໝວດອາຍຸ ສະພາບການເກີດ ການເສຍຊີວິດ ການຍົກຍ້າຍ ຄຸນລັກສະນະຂອງທີ່ຢູ່ອາໄສ ການປະກອບອາຊີບ ແລະ ການເຂົ້າເຖິງການບໍລິການຕ່າງໆຂອງປະຊາຊົນບັນດາເຜົ່າໃນຂອບເຂດທົ່ວປະເທດ.
ຈາກການສໍາຫຼວດພົນລະເມືອງ ແລະ ທີ່ຢູ່ອາໄສໃນໄລຍະຜ່ານມາ ເຫັນວ່າຕະຫຼອດໄລຍະ 3 ທົດສະວັດຜ່ານມາ ອັດຕາການເພີ່ມຂຶ້ນຂອງພົນລະເມືອງແມ່ນມີທ່າອ່ຽງທີ່ຫຼຸດລົງ ໃນໄລຍະແຕ່ປີ 1985-1995 ອັດຕາການເພີ່ມຂຶ້ນຂອງພົນລະເມືອງ ສະເລ່ຍແມ່ນ 2,47% ຕໍ່ປີ ແຕ່ໃນ ທົດສະວັດຕໍ່ມາ ໃນໄລຍະປີ 1995-2005 ເຫັນວ່າ ອັດຕາການເພີ່ມຂຶ້ນຂອງພົນລະເມືອງຫຼຸດລົງມາເປັນ 2,08% ຕໍ່ປີ ແລະ ໃນໄລຍະປີ 2005-2015 ອັດຕາການເພີ່ມຂຶ້ນຂອງພົນລະເມືອງ ຫຼຸດລົງມາເປັນ 1,45% ຕໍ່ປີ.
ແຫຼ່ງຂ່າວຈາກ ວຽງຈັນໃໝ່