ສະພາບການເກີດອຸບັດເຫດຕາມທ້ອງຖະໜົນຍັງເປັນປະກົດການຫຍໍ້ທໍ້ໜຶ່ງເກີດຂຶ້ນໃນສັງຄົມ, ແກ້ໄຂຍັງບໍ່ທັນໄດ້ດີເທົ່າທີ່ຄວນ ແລະ ຍັງເຫັນໄດ້ວ່າສະພາບການເກີດອຸບັດເຫດທົ່ວປະເທດຍັງນັບມື້ເພີ່ມຂຶ້ນໃນແຕ່ລະມື້ ທີ່ເກີດມາຈາກຫຼາຍສາເຫດ ແລະ ສ້າງຄວາມເສຍຫາຍໃຫ້ແກ່ຊັບສິນ, ພາຫະນະ, ຊີວິດ ລວມເປັນຈຳນວນເງິນມະຫາສານ.
ສະເພາະ ດືອນຕຸລາ ໃນທົ່ວປະເທດມີອຸບັດເຫດເກີດຂຶ້ນ ທັງໝົດ 513 ກໍລະນີ, ເພີ່ມຂຶ້ນ 24 ກໍລະນີ, ພາຫະນະເປ່ເພ 915 ຄັນ, ເພີ່ມຂຶ້ນ 84 ຄັນ, ມີຜູ້ໄດ້ຮັບບາດເຈັບ 783 ຄົນ, ເພີ່ມຂຶ້ນ 33 ຄົນ ແລະ ເສຍຊີວິດ 71 ຄົນ, ເພີ່ມຂຶ້ນ 9 ຄົນ, ຖ້າທຽບໃສ່ເດືອນຜ່ານມາ ຊຶ່ງແຂວງທີ່ອຸບັດເຫດຫຼາຍກວ່າໝູ່ກໍແມ່ນ ນະຄອນຫຼວງວຽງຈັນມີ 83 ກໍລະນີ, ເສຍຊີວິດ 13 ຄົນ, ພາຫະນະເປ່ເພ 165 ຄັນ, ຄົນໄດ້ຮັບບາດເຈັບ 99 ຄົນ, ແຂວງສະຫວັນນະເຂດ 66 ກໍລະນີ, ແຂວງຈຳປາສັກ 58 ກໍລະນີ ແລະ ແຂວງອື່ນໆ ຕາມລຳດັບ.
ເກີດມາຈາກຫຼາຍສາເຫດໂດຍສະເພາະຜູ້ຂັບຂີ່ລົດບາງກຸ່ມຄົນ ຍັງບໍ່ປະຕິບັດກົດລະບຽບຈະລາຈອນທາງບົກຢ່າງເຂັ້ມງວດ, ມີຄວາມປະມາດເຊັ່ນ: ດື່ມເຫຼົ້າເມົາແລ້ວຂັບຂີ່, ຂັບຂີ່ລົດໄວເກີນກໍານົດ, ປ່ຽນທິດທາງເດີນລົດກະທັນຫັນ, ຊີງຂຶ້ນໜ້າບໍ່ຮັບປະກັນ, ບໍ່ປ່ອຍສິດໃຫ້ຜູ້ອື່ນ, ລ່ວງປ້າຍຫ້າມ, ສະພາບເຕັກນິກລົດບໍ່ຮັບປະກັນ ແລະ ອື່ນໆ.
ສ່ວນຫຼາຍເກີດອຸບັດເຫດຂຶ້ນຫຼາຍກວ່າໝູ່ແມ່ນ ໃນເວລາ 1:00 ໂມງ ຫາ 7:00 ໂມງເຊົ້າ, 8:00 ໂມງ ຫາ 16:00 ໂມງແລງ ແລະ 17:00 ໂມງ ຫາ 24:00 ໂມງກາງຄືນ ແລະ ໂມງ ເຂົ້າການ-ເລີກການ ຫຼື ໂມງທີ່ຮີບດ່ວນ.
ສະນັ້ນ, ເພື່ອບໍ່ໃຫ້ເກີດຜົນເສຍຫາຍຕໍ່ຊັບສິນ, ພາຫະນະຂອງທ່ານ ແລະ ຄົນອ້ອມຂ້າງ ຕະຫຼອດຮອດມີຜູ້ເສຍຊີວິດຍ້ອນອຸບັດເຫດຕາມທ້ອງຖະໜົນຫົນທາງຕາມມາ ສັງຄົມຈົ່ງພ້ອມກັນມີສະຕິເຄົາລົບ ປະຕິບັດກົດລະບຽບຈະລາຈອນທາງບົກ ຢ່າງເຂັ້ມງວດ ແລະ ທີ່ສຳຄັນຜູ້ໃຊ້ລົດໃຊ້ຖະໜົນຮ່ວມກັນຍັງຕ້ອງຮູ້ຈັກໃຫ້ກຽດຜ່ອນສັ້ນ-ຜ່ອນຍາວ ຊຶ່ງກັນ ແລະ ກັນ ແລະ ອື່ນໆ, ພ້ອມດຽວກັນນີ້ຖ້າສັງຄົມພ້ອມກັນມີສະຕິໃນການຂັບຂີ່, ໃຊ້ລົດໃຊ້ຖະໜົນແລ້ວ ຍັງຈະເຮັດໃຫ້ອຸບັດເຫດເກີດຂຶ້ນຕາມທ້ອງຖະໜົນ ມີຄວາມຫຼຸດໜ້ອຍຖອຍລົງເທື່ອລະກ້າວ.
ຂໍ້ມູນຈາກ ພະແນກໂຄສະນາ ກົມຕໍາຫຼວດຈະລາຈອນ ນະຄອນຫຼວງວຽງຈັນ