ໂຄງການເຂື່ອນໄຟຟ້າ ເຊລະນອງ III ເຊິ່ງມີທີ່ຕັ້ງຢູ່ບ້ານຕັ່ງເອີ້ນ ເມືອງນອງ ແຂວງສະຫວັນນະເຂດ ທີ່ຫ່າງຈາກ
ຕົວເມືອງເຊໂປນ ໄປປະມານ 60 ກິໂລແມັດ ແລະ ເຂື່ອນດັ່ງກ່າວ ໄດ້ຄາດຄະເນມີກຳລັງຕິດຕັ້ງປະມານ 80 ເມກາ
ວັດ ແລະ ສະເລ່ຍການຜະລິດໄຟຟ້າໄດ້ປະມານ 305,62 GWh ຕໍ່ປີ ແລະ ມູນຄ່າລວມການກໍ່ສ້າງທັງໝົດ 162ລ້ານ
ໂດລາສະຫະລັດ ຫຼື ປະມານ 1.310 ຕື້ກີບ.
ພາຍຫຼັງທີ່ບໍລິສັດ ສີເມືອງກຣຸບ ຈຳກັດ ໄດ້ເຊັນບົດບັນທຶກຄວາມເຂົ້າໃຈກັບລັດຖະບານ ກໍ່ຄືກະຊວງແຜນການ
ແລະ ການລົງທຶນແລ້ວ ທາງບໍລິສັດກໍ່ໄດ້ເລີ່ມເຮັດສັນຍາການເກັບກຳຂໍ້ມູນທາງອຸທົກກະສາດ ກັບບໍລິສັດ ໄຮໂດຣ
ລາວ ໃນຕົ້ນປີ 2014 ແລະ ໄດ້ລົງມືຈັດຕັ້ງປະຕິບັດຈົນເຖິງປັດຈຸບັນ ແລະ ຜ່ານການຊອກ ແລະ ຄົ້ນຄວ້າຫາບໍລິ
ສັດທີ່ມາສຳຫຼວດ ກໍ່ເປັນເວລາດົນນານພໍສົມຄວນ ຈຶ່ງສາມາດຄັດເລືອກເອົາສະຖາບັນສຳຫຼວດສຶກສາ ແລະ ອອກ
ແບບຂອງກຸ່ມບໍລິສັດ ຊີໂນໄຮໂດຣ ເລກ 14 ແຂວງຢຸນນານ ມາຮ່ວມເຊັນສັນຍາ ເພື່ອສຳຫຼວດໂຄງການດັ່ງກ່າວ
ເຊິ່ງມີມູນຄ່າໃນການສຳຫຼວດ 2,2 ລ້ານໂດລາ ຫຼື ປະມານ 17 ຕື້ກີບ ຈະເລີ່ມລົງມືສຳຫຼວດໂຄງການໃນຕົ້ນເດືອນ
ທັນວາ 2014 ແລະ ຈະໃຊ້ເວລາໃນການສຳຫຼວດເຖິງ 18 ເດືອນ.
ພິທີເຊັນສັນຍາຮັບເໝົາການສຳຫຼວດສຶກສາຂໍ້ມູນ ແລະ ອອກແບບຄວາມເປັນໄປໄດ້ຂອງໂຄງການ ໄດ້ຈັດຂຶ້ນ
ວັນທີ 14 ພະຈິກ 2014 ທີ່ຮ້ານອາຫານຟູມານໂຫຼ ນະຄອນຫຼວງວຽງຈັນ ລະຫວ່າງທ່ານ ສຳລີ ມະຫາວົງ ຜູ້ອຳນວຍ
ການບໍລິສັດທີ່ປຶກສາບີອີທີ-ພະລັງງານ ແລະ ບໍ່ແຮ່ ຕາງໜ້າໃຫ້ບໍລິສັດ ສີເມືອງກຣຸບ ແລະ ທ່ານ ຫຼວນ ຍິ່ງ ປິງ
ຮອງຫົວໜ້າວິສາວະກອນ ຂອງສະຖາບັນສຳຫຼວດອອກແບບເຂື່ອນໄຟຟ້ານ້ຳຕົກ ໂດຍຕາງໜ້າໃຫ້ກຸ່ມບໍລິສັດ
ຊີໂນໄຮໂດຣ ເລກ 14 ແຂວງຢຸນນານ ມີຜູ້ຕາງໜ້າຈາກກະຊວງແຜນການ ແລະ ການລົງທຶນ ກະຊວງພະລັງງານ
ແລະ ບໍ່ແຮ່ ພ້ອມດ້ວຍພະນັກງານກ່ຽວຂ້ອງທັງສອງຝ່າຍເຂົ້າຮ່ວມເປັນພິຍານ.
ແຫລ່ງຂ່າວ: ວຽງຈັນໃໝ່