ແຂວງອັດຕະປື ມີຜູ້ຕິດຢາເສບຕິດ 890 ຄົນ

0
657

ໃນໄລຍະ 1 ປີຜ່ານມາ, ທາງເຈົ້າໜ້າທີ່ກອງບັນຊາການປ້ອງກັນຄວາມສະຫງົບ ແຂວງ ໄດ້ລົງເຄື່ອນໄຫວເກັບກໍາສະຖິຕິຜູ້ຕິດຢາເສບຕິດ ໄດ້ທັງໝົດ 890 ຄົນ ຍິງ 44 ຄົນ,ໃນນັ້ນ, ຫຼາຍກວ່າໝູ່ແມ່ນຢູ່ເມືອງໄຊເສດຖາ ມີຜູ້ຕິດຢາເສບຕິດເຖິງ 400 ຄົນ, ເມືອງພູວົງ 160 ຄົນ,ເມືອງສາມັກຄີໄຊ 126 ຄົນ, ເມືອງຊານໄຊ 144 ຄົນ ແລະ ເມືອງສະໜາມໄຊ 90 ຄົນ,ໃນຈໍານວນທັງໝົດ ໄດ້ເຂົ້າຮັບການປິ່ນປົວຢູ່ສູນບໍາບັດຂອງແຂວງມີຈໍານວນ 41 ຄົນ ແລະ ໄດ້ສຶກສາອົບຮົມມອບຄືນໃຫ້ຜູ້ປົກຄອງ ແລະ ອໍານາດການປົກຄອງບ້ານແລ້ວຈໍານວນ 32 ຄົນ,ຍັງສືບຕໍ່ບໍາບັດ 9 ຄົນ, ສ່ວນຜູ້ທີ່ມີການມົ້ວສຸມຢາເສບຕິດ ກໍ່ໄດ້ສຶກສາອົບຮົມກ່າວເຕືອນແລ້ວມອບຄືນໃຫ້ຜູ້ປົກຄອງ ແລະ ອົງການຈັດຕັ້ງບ້ານຕິດຕາມຕື່ມ ຈໍານວນ 35 ຄົນ,ຍິງ 4 ຄົນ .ພ້ອມດຽວກັນກໍ່ໄດ້ອອກໜັງສືຢັ້ງຢືນປອດຢາເສບຕິດ ໃຫ້ບຸກຄົນທົ່ວໄປ ໄດ້ຈໍານວນ 110 ສະບັບ .

ທ່ານ ພັນໂທ ອິນທະຫວາ ໂພທິລາດ ຮອງຫົວໜ້າກອງບັນຊາການປ້ອງກັນຄວາມສະຫງົບ ແຂວງອັດຕະປື ຄະນະກໍາມະການກວດກາ ແລະ ຄວບຄຸມຢາເສບຕິດຂັ້ນແຂວງ ໄດ້ລາຍງານຢູ່ໃນພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ເມື່ອບໍ່ດົນຜ່ານມານີ້ ໃຫ້ຮູ້ວ່າ: ຕະຫຼອດໄລຍະຜ່ານມາ ແຂວງອັດຕະປື ກໍຄືກອງບັນຊາການປ້ອງກັນຄວາມສະຫງົບແຂວງ, ໄດ້ຮີບຮ້ອນຊີ້ນໍາ-ນໍາພາກໍາລັງວິຊາສະເພາະ ເຄື່ອນໄຫວຢ່າງຈິງຈັງ ເພື່ອສະກັດກັ້ນ, ທັບມ້າງບັນດາລາຍຄະດີ, ຊ່ວຍເຫຼືອກອບກູ້ເອົາຊີວິດຜູ້ຖືກເຄາະຮ້າຍຕິດຢາເສບຕິດເຂົ້າບໍາບັດ,ຈັດຕັ້ງກໍາລັງລົງເຄື່ອນໄຫວສືບສວນ, ເກັບກໍາ ແລະ ຂື້ນບັນຊີບັນດາເປົ້າໝາຍ ຄ້າ-ຂາຍ ແລະ ເສບຢາເສບຕິດ, ພ້ອມທັງໄດ້ກໍານົດທິດທາງໃນການແກ້ໄຂ ແລະ ເຄື່ອນໄຫວເຮັດວຽກງານໂຄສະນາຜົນຮ້າຍຂອງຢາເສບຕິດ ແລະ ປຸກລະດົມຂົນຂວາຍຊຸກຍູ້ຄອບຄົວຜູ້ຖືກເຄາະຮ້າຍສົ່ງລູກຫຼານເຂົ້າຮັບການບໍາບັດປິ່ນປົວຢູ້ສູນ.

ທ່ານ ພັນໂທ ອິນທະຫວາ ໂພທິລາດ ໄດ້ໃຫ້ຮູ້ຕື່ມວ່າ: ໃນ 1 ປີຜ່ານມາທາງພະແນກກວດກາ ແລະ ຄວບຄຸມຢາເສບຕິດ ກອງບັນຊາການປ້ອງກັນຄວາມສະຫງົບແຂວງ ຍັງໄດ້ສໍາເລັດການເຮັດວຽກງານໂຄສະນາເຜີຍແຜ່ຜົນຮ້າຍຂອງຢາເສບຕິດຕາມຢູ່ບັນດາໂຮງຮຽນ ມສ 14 ແຫ່ງ,ໂຮງຮຽນເຕັກນິກວິຊາຊີບ 1 ແຫ້ງ, ລວມມີຜູ້ເຂົ້າຮ່ວມຮັບຟັງທັງຄູອາຈານ ແລະ ນັກຮຽນ-ນັກສຶກສາ ທັງໝົດ 8.201 ຄົນ,ຍິງ 3.980 ຄົນ,ພ້ອມທັງໄດ້ກະກຽມແຜນການເພື່ອລົງສະນາຢູ່ຕາມກຸ່ມບ້ານ ໂດຍເລັງໃສ່ 29 ກຸ່ມບ້ານ ແລະ 141 ບ້ານທົ່ວແຂວງ ໃຫ້ສໍາເລັດໃນຕໍ່ໜ້ານີ້.

ແຫຼ່ງຂ່າວຈາກ ຄວາມສະຫງົບ