ອັງກິດພົບໄຂ້ຫວັດສັດປີກລະບາດໃນຟາມເປັດ ພ້ອມຢືນຢັນບໍ່ແມ່ນສາຍພັນ H5N1 ທີ່ລະບາດສູ່ຄົນໄດ້ ກຽມ
ຂ້າເປັດກ່ວາ 6,000 ໂຕ ປ້ອງກັນການລະບາດຕໍ່.
ໃນວັນທີ 18 ພະຈິກນີ້ ສຳນັກຂ່າວຕ່າງປະເທດລາຍງານວ່າ ອັງກິດໄດ້ພົບໄຂ້ຫວັດສັດປີກລະບາດໃນຟາມເປັດ ຢູ່
ທາງພາກເໜືອຂອງປະເທດ ຄາດວ່າເປັນສາຍພັນດຽວກັນກັບທີ່ພົບເຫັນໃນໂຮນລັງ ແລະ ເຢຍລະມັນໃນຊ່ວງ
ກ່ອນໜ້ານີ້ ເຮັດໃຫ້ເກີດມີຄວາມວິຕົກວ່າ ຈະສາມາດລະບາດສູ່ຄົນໄດ້ ຫລື ບໍ່.
ລາຍງານໄດ້ລະບຸວ່າ ທາງການອັງກິດໄດ້ກວດພົບພະຍາດດັ່ງກ່າວ ໃນຟາມແຫ່ງໜຶ່ງຂອງແຂວງຢອກເຊຍ ແລະ
ໄດ້ຢືນຢັນແລ້ວວ່າ ບໍ່ແມ່ນໄຂ້ຫວັດສັດປີກສາຍພັນ H5N1 ທີ່ລະບາດໃນອາຊີ ແລະ ເຮັດໃຫ້ຄົນເສຍຊີວິດໄປແລ້ວ
ຫລາຍສິບຄົນເມື່ອປີທີ່ຜ່ານມາ.
ຢ່າງໃດກໍຕາມ ທາງການໄດ້ສັ່ງກັກກັນສັດປີກໃນພື້ນທີ່ອ້ອມຮອບ ລັດສະໝີ 10 ກິໂລແມັດ ຈາກຟາມດັ່ງກ່າວ
ແລະ ກຽມກຳຈັດເປັດກ່ວາ 6,000 ໂຕ ໃນຟາມທີ່ລະບາດ ເພື່ອປ້ອງກັນການແຜ່ເຊື້ອອອກສູ່ວົງກວ້າງຕໍ່ໄປ.