ເມື່ອບໍ່ດົນມານີ້, ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ພ້ອມຄະນະ ໄດ້ລົງເຄື່ອນໄຫວຢ້ຽມຢາມພົບປະຊາຊົນ ທີ່ຖືກຜົນກະທົບຈາກໄພນ້ຳຖ້ວມ ຢູ່ເມືອງນາໝໍ້ ເພື່ອຕິດຕາມສະພາບຜົນເສຍຫາຍ ແລະ ການແກ້ໄຂ ຟື້ນຟູສະພາບການໃນເບື້ອງຕົ້ນ, ພ້ອມທັງຊ່ວຍເຫຼືອປະຊາຊົນທີ່ປະສົບໄພພິບັດ ຢູ່ພາຍໃນເມືອງ.
ໂອກາດດຽວກັນ ກໍຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດຕັ້ງປະຕິບັດສອງວາລະແຫ່ງຊາດ ແລະ ຜົນເສຍຫາຍຈາກໄພພິບັດນ້ຳຖ້ວມ ລວມທັງການແກ້ໄຂ ຟື້ນຟູສະພາບໄພພິບັດໃນເບື້ອງຕົ້ນ.
ຈາກນັ້ນ, ທ່ານເຈົ້າແຂວງອຸດົມໄຊ ກໍໄດ້ມີຄຳຄິດຄຳເຫັນຊີ້ນຳ ໃຫ້ແກ້ໄຂບັນຫາທີ່ພົບເຫັນໃນໄລຍະຜ່ານມາ, ສືບຕໍ່ສຶກສາອົບຮົມການເມືອງ-ແນວຄິດ ໃຫ້ພະນັກງານ ແລະ ປະຊາຊົນບັນດາເຜົ່າໃຫ້ເປັນປົກກະຕິຕໍ່ເນື່ອງ, ສືບຕໍ່ລົງເຄື່ອນໄຫວປັບປຸງກົງຈັກການຈັດຕັ້ງຮາກຖານພັກ, ກຸ່ມບ້ານ, ຄະນະພັກແຕ່ລະຂັ້ນ ໃຫ້ມີຄວາມປອດໃສ ເຂັ້ມແຂງ ໜັກແໜ້ນ ຕິດພັນກັບການຫັນເອົາພະນັກງານລົງກໍ່ສ້າງຮາກຖານການເມືອງ, ສືບຕໍ່ປະຕິບັດສອງວາລະແຫ່ງຊາດ ໃຫ້ປະສົບຜົນສຳເລັດ, ສືບຕໍ່ໃນການຊຸກຍູ້ການຜະລິດກະສິກຳ ລະດູແລ້ງ ເພື່ອທົດແທນຜົນເສຍຫາຍຈາກໄພພິບັດ ແລະ ແກ້ໄຂຄວາມທຸກຍາກ, ສ້າງໃຫ້ປະຊາຊົນມີລາຍຮັບ, ສືບຕໍ່ຊຸກຍູ້-ໃຫ້ການຮ່ວມມືກັບພາກ ສ່ວນທຸລະກິດທີ່ເຂົ້າມາລົງທຶນ ແລະ ສືບຕໍ່ໃນການຕິດຕາມສະພາບຜົນເສຍຫາຍຈາກໄພ ພິບັດ ພ້ອມທັງປຶກສາຫາລືວາງແຜນໃນການຟື້ນຟູ.
ແຫຼ່ງຂ່າວຈາກ ປະເທດລາວ