ລາວ-ຈໍເຈຍ ເລີ່ມບັງຄັບໃຊ້ສັນຍາຍົກເວັ້ນ ວີຊາ

0
691

ອິງຕາມສຳນັກຂ່າວປະເທດລາວ ລາຍງານວ່າ: ສັນຍາຍົກເວັ້ນວີຊາ ສໍາລັບ ຜູ້ຖືໜັງສືຜ່ານແດນການທູດ ແລະ ລັດຖະການ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ຊອກຊີ (Georgia) ທີ່ໄດ້ຮັບການລົງນາມ ໃນວັນທີ 31 ພຶດສະພາ 2022 ທີ່ ກົວລາລໍາເປີ, ໄດ້ມີຜົນບັງຄັບໃຊ້ ນັບແຕ່ວັນທີ 1 ຕຸລາ 2022 ເປັນຕົ້ນໄປ.

ເນື້ອໃນສັນຍາດັ່ງກ່າວ ລະບຸໄວ້ວ່າ: ຄົນສັນຊາດຂອງພາຄີຝ່າຍໜຶ່ງ ທີ່ຖືໜັງສືຜ່ານແດນການທູດ ແລະ ລັດຖະການ ທີ່ມີອາຍຸການນໍາໃຊ້ຢ່າງໜ້ອຍ 6 ເດືອນ ສາມາດເດີນທາງເຂົ້າ-ອອກ, ຜ່ານ ແລະ ພັກເຊົາ ໃນດິນແດນຂອງຄູ່ພາຄີອີກຝ່າຍໜຶ່ງ ໂດຍບໍ່ຈໍາເປັນຂໍວີຊາ ພາຍໃນໄລຍະເວລາບໍ່ເກີນ 90 ວັນ ໃນໄລຍະ 180 ວັນ ນັບແຕ່ວັນທີ່ເດີນທາງເຂົ້າ ຊຶ່ງໄລຍະເວລາ 180 ວັນ ແມ່ນນັບລວມຈາກການພັກເຊົາແຕ່ລະຄັ້ງກ່ອນໜ້ານັ້ນ.

ຄົນສັນຊາດຂອງພາຄີຝ່າຍໜຶ່ງ ທີ່ຖືໜັງສືຜ່ານແດນການທູດ ແລະ ລັດຖະການ ທີ່ມີອາຍຸນໍາໃຊ້ຢ່າງໜ້ອຍ 6 ເດືອນ ທີ່ໄດ້ຮັບການແຕ່ງຕັ້ງໃຫ້ມາປະຕິບັດໜ້າທີ່ ຢູ່ສໍານັກງານຜູ້ຕາງໜ້າການທູດ, ສໍານັກງານຜູ້ຕາງໜ້າກົງສຸນ ແລະ ອົງການຈັດຕັ້ງສາກົນ ຢູ່ໃນດິນແດນຂອງພາຄີຝ່າຍໜຶ່ງ ລວມທັງສະມາຊິກຄອບຄົວທີ່ຖືໜັງສືຜ່ານແດນການທູດ ແລະ ລັດຖະການ ທີ່ມີອາຍຸການນໍາໃຊ້ຢ່າງໜ້ອຍ 6 ເດືອນ, ໃນຄັ້ງທໍາອິດ ແມ່ນຈະຕ້ອງໄດ້ຂໍວີຊາ ກ່ອນເດີນທາງເຂົ້າດິນແດນຂອງພາຄີຝ່າຍໜຶ່ງ. ບຸກຄົນທີ່ກ່າວໄວ້ຂ້າງເທິງ ແມ່ນຈະຕ້ອງໄດ້ຮັບອະນຸມັດທີ່ຈໍາເປັນຕ່າງໆ ພາຍໃນ 30 ວັນ ຈາກມື້ເດີນທາງເຂົ້າ.